ҰБТ-дан жинаған жоғары балл әкімдер рейтингісіне әсер ете ме?

Бұрын Ұлттық бірыңғай тестілеудің нәтижесі облыс әкімдерінің рейтингісіне әсер ететін. Содан әкімдер арасында балл көтеру жағынан «жарыс» басталып кеткен. «Қарға баласын аппағым» дейтіннің кері, қай әкім үлгірімі нашар оқушының төмен балл жинап, рейтингтің төменгі жағында тұрып, басы салбырап, Үкімет басшысынан сөз естігісі келеді дейсіз?

Кейін бұл қулықтың арты ашылып, ҰБТ нәтижесін рейтингтен алып тастаған. Содан бері тыныштық орнаған еді. Биыл сол үрдіс бейресми жалғасын тапты ма, жоғары балл алғандар әлеуметтік желіде жариялана бастады.

Әлбетте, мектеп бітіруші түлектер үшін ҰБТ-дан алған балл аса қадірлі. Төмен балл алғандардың өз-өздеріне қол жұмсағандары да кездескен. Министрлік осы жағдайларды ескеріп, оқушыларға екі рет тест тапсыруға мүмкіндік берді. Биыл үшінші жыл, екі нәтиженің жоғарысымен грант байқауына қатыса алады.

Сонымен биылғы көрсеткіш Қызылорда облысында көңіл көншітерлік болып тұрғанға ұқсайды. Бұл күндер ұлағатты ұстаздардың сан жылғы еңбегінің жемісін көрер шағы, шәкірт пен ата-ана үшін үлкен толғанысты сәт екені айтпаса да белгілі.

Тестілеудің соңғы күндерінің нәтижесімен жүздеген оқушы 100 ұпайдан жоғары жинап, ұстаздары мен ата-аналарының үкілі үмітін ақтады. Республика бойынша 140 балл жинаған түлек Алматы облысынан болса, Қызылорда облысы бойынша ең жоғары ұпай Қазалы ауданында тіркелді. Ы.Алтынсарин атындағы №204 мектептің түлегі, “Алтын белгі” иегері Нұрболат Жұбатқан 139 балл жинап, өңірдің білім сапасының жоғары екенін дәлелдеді. Химия-биология пәнін таңдаған Н.Нұртуғанұлының келешегінен зор үміт күтеміз.

Н.Меңдібай

Пікір үстеу

Э-пошта мекенжайыңыз жарияланбайды. Міндетті өрістер * таңбаланған