Ұлттық бірыңғай тестілеуден кім ҰПАЙ жинап отыр?

Балалардың он жылғы білімі сарапқа салынып, сараланатын шағы, жыл сайын көпті шулатып, біреуге қуаныш сыйлап, біреуге өкініш әкелетін ҰБТ жақындап келеді. Тапсырушы түлекті, мектеп мұғалімдерін, ата-аналарды да алаңдататын тес­тілеудің деңгейі қалай? Болашақ маманның тағдырын бір ғана балл шешетін тестілеудің жүздеген проб­лемасы шықпасын десек, деңгейді көтеруіміз керек. Білімдері мен бақтары қатар шабатын тестілеуге дайындық Қызылорда өңірінде де қыза түсті. Сыр оқушыларының ҰБТ-ны тек қана 3 жерде тапсыруға мүмкіндігі бар. Қызылорда қаласы, Жаңақорған мен Қазалы аудандарында орналасқан UStudy тестілеу орталығы ұлттық бірыңғай тестілеуді өткізеді. Тестілеу үшін басқа ауданға барып, білімін тексеру балаларға қаншалықты тиімді? Неліктен барлық аудандар тестілеу орталығымен қамтылмайды?

Осы мәселе биыл да осы мәселе алдымыздан шықты. Шиелі кентінен бір ата-ана биылғы мектеп бітіретін қызы үшін уайымдайтынын жеткізді. «Шиелі үлкен аудан болғанымен тест тапсыру үшін Жаңақорғанға барды. Алда негізгі тестілеу басталады. Тағы да Жаңақорған. Қашан Шиеліден тестілеу орталығын ашады?» деді. Сұрақ орынды. Артынша Шиелі ауданы білім бөлімінің басшысы Жібек Баймұратовадан осы сауал төңірегінде сұрадық.

– Шиелі ауданының бітіруші түлектерінің жартысы Қызылорда қаласына, қалған оқушылар Жаңақорған ауданында ұлттық тест тапсырады. Менің ұсыныс талабым да осы, Шиелі ауданында тест орталығын ашуға жұмыс жасауымыз керек. Биылғы жылдың өзінде 960 бала Шиелі ауданынан түлеп ұшқалы тұр. Бұл проблема мені де алаңдатады. Мәселені бірнеше жерде көтердім. Жақында ғана ҚР Оқу-ағарту минис­трі Ғани Бейсембаев іссапармен ауданға келгенде де жеке өзіне хабардар еттім,- деді Жібек Орынбайқызы.

Мектеп бітірушілер үшін жаңалық, Қазақстанда ұлттық бірыңғай тестілеуді өткізу қағидалары өзгерді. Енді жаңа ережеге сай тест кезінде мүмкіндігі шектеулі балаларға көмекші беріледі. Бірақ көмекшінің керектігі туралы алдын ала өтініш берілуі қажет. Әрі тағайындалған кісі мұғалім болмауы шарт.

Сондай-ақ, орта, техникалық немесе кәсіптік білімі бар түлектер үшін тест тапсырмаларының саны өзгерген. Енді олар Қазақстан тарихынан 20, математика және оқу сауаттылығы пәндерінен 15, ал бейіндік пәндерден 35 сұраққа жауап беруге тиіс. Демек, Қазақстан тарихы бойынша 5 сауал қосылып, оқу сауаттылығынан 5 сұрақ алынып отыр. Келесі түзету қысқартылған оқу бағдарламалары бойынша оқитындарға қатысты. Яғни, бұдан былай талапкерге алты емес, тек үш дұрыс жауап ұсынылады. Сәйкесінше, бағалау да өзгертіледі. Мәселен, талапкер бір дұрыс жауабы бар тапсырманың дұрыс нұсқасын таңдаса, бір балл беріледі. Бір немесе бірнеше қате жауапты таңдаса, нөл баллмен бағаланбақ.

Төлем бағалары көтеріліп кеткен жоғары оқу орындарының есігін балаларымыз сығаламасын десек, түлектерге жағдай жасап, грант иегері болуына көмегімізді аямауымыз керек. Әрине, ҰБТ тапсырғалы отыр­ған барша түлектерге сәттілік тілейміз. Тек ата-аналарды уайымдатпай, оқушыларға қысым жасалмай, тес­тілеу өткенін дұрыс көреміз. Ал, Қызылорда облысының 7 ауданы мен 1 қаласы үшін үш тестілеу орталығының аз екенін тағы бір мәрте ҚР Оқу-ағарту министрі мен облыстық білім басқармасы басшысының назарына саламыз. Ұпайды тестілеу орталығы емес, мектеп бітіруші түлек жинау керек!

Қ.МАТАЙ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған