Жетістіктер шыңы: Абыройлы ауыл мектебі

Шиелі ауданы, Тартоғай ауылындағы Шахмардан Есенов атындағы №153 мектеп-лицейінде «Білім беру парадигмасы: құндылықтар және жаңа дағдылар» тақырыбында «Серіктес директорлар» лигасының облыстық семинары өткізілді. Лиганың семинарына облыстық оқу орталығының директоры Сырым Асқаров, Шиелі аудандық білім бөлімінің басшысы Қанат Әмзеев және «Серіктес директорлар» лигасының мүшелері қатысты.

Семинар қатысушыларына ең алдымен мектептің домбыра үйірмесіндегі «Балдаурен» оркестрі өнерін көрсетіп, оқушылар президенті қонақтарға «Көненің көзі – тарихтың өзі» отбасы жәдігерлерінің көрмесімен таныстырылым жасады. Мұнан соң қатысушылар «Жетекші мектеп: білім, тәжірибе, серіктестік» тақырыбында виртуалды әдістемелік кабинет жобасы бойынша әдістемелік-кейс папкалар таныстырылымын тамашалап, құндылыққа негізделген білім беру бойынша тәрбие үдерісіндегі инновациялық жобалардың мектеп-лицейде іске асуымен танысты.

Тартоғай ауылындағы білімнің қара шаңырағы атанған мектеп бүгінде «Отбасылық құндылықтар мен рухани жаңғыруға бағыт» атты кеңселік жобасын ауқымды әрі тиімді іске асыруда. Жобалық кеңсенің ерекшелігі – мектеп жасындағы оқушыларды ата-аналармен бірлесе отырып, кәсіпке бағыттау. Кеңсе жобасының нәтижесінде семинар барысында оқушылар ауыл ішіндегі сервистік қызмет көрсететін автокөлік жөндеу орынында іс-тәжірибеден өтіп жатқан өз жұмыстарымен таныстырды. Бұдан бөлек, ауылда ашылған наубайханада мектеп оқушылары да іс-тәжірибеден өткізіліп, кәсіпке бағытталуда.

Жиынға қатысушы қонақтарға ғылымға негізделген білім ордасының цифрлық әлеуетін таныстыру мақсатында 3D принтер мен робототехника кабинеттерінің жұмыстары көрсетілді. Үйірмеде тәлім алатын оқушылар 3D принтердің жұмыс процесін таныстыра отырып, бағдарламалау негізінде басып шығару функциясын орындап, қонақтарға баспаға арнайы шығарылған жұмыстарды көрсетті.

Сонымен қатар, шара барысында білім ордасындағы «Оқуға құштар мектеп» жобасы аясында оқушылардың жасаған бук-трейлерден TEDx форматында таныстырылым жасалынды. Ары қарай қонақтар «Ұшқыр ой алаңы» жобасы аясында мектеп-лицей жанынан құрылған «Дарын» дебат клубының жұмыстарымен танысты. Сондай-ақ, білім ошағындағы «Shahmardan Yessenov Foundation» ғылыми-білім беру қорымен ынтымақтастық аясында жасалып жатқан жұмыстар көрсетілді. Мұнан соң «Мектеп театры» жобасы бойынша оқушылардың игілігіне берілген гримдеу бөлмесінің ашылу салтанаты жасалып, қонақтарға мектеп оқушыларының театрландырылған «Махаббат қызық мол жылдар» қойылымы қонақтарға керемет әсер сыйлады.

Шара соңында облыстық оқу орталығының директоры Сырым Құрманғазыұлы алдағы жоспарларымен бөлісе отырып, лицей ұстаздарын академик қорының жұмыстары негізінде ынтымақтастық тәжірибе алмасуға шақырды. Сонымен қатар, ауыл мектебіндегі атқарылып жатқан жұмыстар тәжірибе ретінде басқа білім ошақтарына таратылуы қажеттігін атап өтті.

А.Сырлыбай

Пікір үстеу

Э-пошта мекенжайыңыз жарияланбайды. Міндетті өрістер * таңбаланған