Жүректері ізгілікке толы жандарды тәрбиелейтін білім шаңырағы

Қызылорда медициналық жоғары колледжінің құрылғанына 95 жыл, білікті басшы, дәрігер Сара Төлегенқызы Даутбаеваның 90 жылдығы атап өтілді. ХХ ғасырдың басында, 1928 жылы Қазақстанда оқу орындарының ішінде алғаш рет «Қазақ акушерлік техникумы» деген атпен қазіргі Қызылорда медициналық жоғары колледжі ашылды. Одан бері оқу орнының атауы заман талабына қарай медициналық училище, медициналық колледжі, медициналық жоғары колледжі болып өзгере берді. Оқу орнының миссиясы тұрғындар денсаулығын нығайту, оларға қауіпсіз, сапалы, сұранысқа сәйкес медициналық-санитарлық қызмет ұсыну болып айқындалды.

Ғасырға жуық оқу ордасы өзінің 95 жылдық тарихында 40 мыңнан аса маман даярлаған. Соғыстан кейінгі 50-жылдардағы түлектердің ішінде белгілі дәрігер-ғалымдар, тарихта есімдері қалған ірі тұлғалар Ернияз Омаров, Варлен Исаев, Базарбай Атабаев, Шәріпбай Әлназаровтар, одан кейінгі кезеңдерде облысымызға белгілі дәрігерлер Амангелді Әбдібаев, Сапура Сәрсенбаева, Әмірбек Шамкенов, Аян Егізбаев, Аида Жулаева, Ұлан Байбактин сынды азаматтар бүгінде ел медицинасының жауапты салаларында абыроймен қызмет етті.

Колледждің бүгінгідей кемел келбетінің қалыптасуында әлеуеті мықты педагогикалық қызметкерлер мен басшылық еткен директорлардың еңбегі орасан. Солардың ішінде 60-жылдардан бері директорлық қызметте болған шоқтығы биік, жаны нәзік Даутбаева Сара Төлегенқызын ерекше айтуға болады. «Құрмет белгісі» орденінің иегері, «Қазақ КСР-іне еңбегі сіңген дәрігер» Сара Төлегенқызы 1962-1991 жылдар аралығында 29 жыл директорлық қызмет атқарды, оқу орнының материалдық-техникалық базасын нығайтудағы елеулі істері әріптестері мен студенттердің жадында, оның бастамасымен салынған жаңа оқу ғимараты мен жатахақханасы осы күні оқу орнының игілігіне қызмет етуде. Өмірінде осындай сәулелі істерімен көптің жадында қалған Сара Даутбаеваға арнап колледж ұжымы «Сағынышқа айналған сәулелі ғұмыр» атты естелік өмірбаян-кітабын жарыққа шығарды.

– 1991 жылдан бастап училище директорлығына білікті дәрігер, мықты ұйымдастырушы Рая Әбдешқызы Көзденова келді. Рая Әбдешқызы басқарған жылдары ҚР Тәуелсіздігі жарияланып, барлық сала тың серпілістер мен өзгерістерге сұранып тұрған еді. Сол кездері өзінің авторлығымен 12 оқулық пен оқу құралдарын мемлекеттік тілде баспадан шығарып, кітапхана қорын толықтырды. Бүгінде зейнеттегі дәрігер, медицина саласының ардагері Рая Әбдешқызы ортамызда, ол кісінің бай өмірлік тәжірибесі бізге өнеге.

Ал, “Қазақстан Денсаулық сақтау ісінің үздігі”, қазірде Қазақстан Республикасы Парлементі Сенатының депутаты Ақмарал Шәріпбайқызы Әлназарова басшылық еткен 2007-2013 жылдары оқу ордасы бәсекеге қабілетті, кәсіби әлеуеті жаңарған оқу орнына айналды. Одан кейінгі жылдары басқарған Азима Балтабайқызы Ибраева, Ләйла Айтбайқызы Култаевалардың қолтаңбалары оқу орнының мұрағатын толықтыруда,- дейді Қызылорда медициналық жоғары колледжінің директоры Салтанат Тасмағанбетова.

Иә, 2017 жылдан бастап колледжді білікті менеджер Салтанат Сейтқалиқызы Тасмағанбетова басқарып келеді. Өзінің басқарушылық жолында алдыңғы аға буынның ізін жаңаша сипатта жалғастыруды қолға алды. Әлемдік білім беру стандарттарына сай «Мейіргер ісінің» қолданбалы бакалавр біліктілігі бойынша мамандар даярлау ісін жемісті іске асыруда.

Қазіргі таңда колледжде 9 мамандық даярланады, білім алушылар контингенті 3000-ға жуықтады, сандық-сапалық құрамы жоғары 150-ден аса оқытушы жұмыс жасайды. Жоғары әлеуеті қалыптасқан қазіргі оқу ордасының материалдық-техникалық базасы білім алушының кәсіби машықтануын қалыптастыруға толық жауап беретін деңгейге көтерілді. Мамандықтардың білім беру стандарттарында қарастырылған өндірістік, дипломалды практикалардан білім алушылардың талапқа сай өтуін қамтамасыз ету үшін облысымыздағы 48 емдеу, алдын-алу мекемелерімен келісім-шарттар жасалған, осы келісім-шарттар негізінде студенттер облыс орталығындағы, аудандардағы, тіпті ауылдық елді мекендерге дейін барып, тәжірибеден өте алатын мүмкіндікке ие болды.

Бүгінде колледжде 3 оқу ғимараты бар. 2019 жылы желтоқсан айында «ДилМаш» компаниясы мемлекеттік – жеке серіктестік негізінде 330 орындық жатақхана салып, білім алушылардың тұрмысына берілген болатын. Соған сәйкес бұрынғы жатақхана 3 оқу ғимараты болып қайта жасақталды.

– Қазіргі медицина медицина қызметкерлерінен кәсіби маман болып қана қоймай, үнемі білімдерін жетілдіруді талап етеді. Сондықтанда оқытушы құрамының біліктілік жетілдіруі бүгінгі таңда 100% құрап отыр, ал бітірушілеріміздің соңғы үш жылдағы Ұлттық тәуелсіз емтихан орталығына тапсырған қорытынды аттестаттауы 85-95% аралығын көрсетуде. Сондай-ақ, бітірушілердің жұмысқа орналасу көрсеткіші соңғы үш жылда 80-85% құрады, бұл көрсеткіш еңбек нарығында біздің түлектерге сұраныстың жоғары екенін көрсетеді. Облысымыздағы медициналық білім беретін бірегей оқу орны Қызылорда медициналық жоғары колледжі өзінің 95 жылдық тарихында антына адал мамандарды ғана емес, жүректері ізгілік пен мейірімге толы абзал жандарды да тәрбиелеп шығарды, оқу орнының беделі осымен биік, осымен мәртебелі,- деп, колледж директоры Салтанат Сейтқалиқызы.

Бүгінгі күні Қызылорда медициналық жоғары колледжін бітірген қаншама түлек өмірден өз орындарын тауып, антына берік болып, еміне дауа іздеп келген сырқаттардың жанынан табылып жүргендері оқу орны ұстаздары еңбектерінің ақталғаны. Біз де Қызылорда медициналық жоғары колледжінің 95 жылдық мерейтойымен колледж оқытушыларын құттықтап, айқын мақсатпен, биік талаппен, оң нәтижемен биіктен көріне беретіндеріне сенім білдіреміз.

Н.Естемес

Пікір үстеу

Э-пошта мекенжайыңыз жарияланбайды. Міндетті өрістер * таңбаланған