«Жылдың үздік оқырманы» анықталды

Ә.Тәжібаев атындағы облыстық әмбебап ғылыми кітапханасында ҚР Мемлекеттік қызмет істері агенттігінің Қызылорда облысы бойынша департаменті және Қызылорда облысының мәдениет және спорт басқармасының бірлесуімен «Оқитын ұлт» мәдени жобасы аясында «Жылдың үздік оқырманы» атты облыстық байқауы болып өтті.

Байқаудың мақсаты – мемлекеттік қызметкерлердің кітап оқу мәдениетін қалыптастыру, үздік отандық және әлемдік әдебиеттерді насихаттау.

Байқауға Қармақшы, Жалағаш, Сырдария, Шиелі аудандарындағы мемлекеттік мекемелер қызметшілерімен қатар аумақтық инспекция және баспасөз қызметінің мамандары қатысып, бақ сынады. Байқауға қатысушылар поэзия, проза жанрлары бойынша екі кезеңнен тұратын сайысқа түсті. Абай, М.Дулатов, М.Жұмабаев шығармаларымен бірге М.Әуезов, Ғ.Мүсірепов, М.Мақатаев, Ф.Оңғарсынова, О.Бөкей, Ш.Мұртаза, Т.Әбдік, Ә.Тарази, М.Шаханов, Ж.Ерман, Қ.Сарин, орыс және шетел классиктерінен Эмиль Золя, Оскар Уайльд, Н.Островский, Роберт Рождественский, С.Есенин туындыларын сахнада орындады. Бір байқағанымыз, байқауда Мұқағалидың бес шығармасы таңдалып алынғанынан ақын өлеңдерінің көп оқылатыны байқалды. Қазылар алқасы қойылған талап бойынша қатысушылардың поэзиялық шығармаларды мәнерлеп оқу арқылы тыңдарманның жүрегіне жеткізе білу қабілетіне назар аударса, проза жанры бойынша шығарманы талдау арқылы тақырыпты терең меңгеріп, автордың идеясын аша білуіне ден қойды.

Қазылар алқасының шешімімен  байқаудың бас жүлдесін Шиелі аудандық қоғамдық даму бөлімінің бас маманы Гүлшат Махан жеңіп алды. 1-орынды Жалағаш ауданының мәдениет және спорт бөлімінің сектор меңгерушісі Бибиасия Дүйсенбиева, 2-орынды Төретам кенті әкімі аппаратының жетекші маманы Рауабану Каракеева, 3-орынды Сырдария ауданы, Тереңөзек кенті әкімі аппаратының бөлім басшысы Лаура Смағұлова иеленді.

Байқаудың «Көркем сөз оқу шебері» номинациясымен Шиелі ауданы Жиделіарық ауылдық округі әкімі аппаратының бас маманы Д.Оспанов, «Талғампаз оқырман» номинациясымен Қызылорда қалалық аумақтық инспекциясының бас маманы Е.Абишева, «Шығармашыл оқырман» номинациясымен Қызылорда облысы әкімі аппараты баспасөз қызметінің бас маманы М.Умарова және «Ең жас маман» номинациясымен Сырдария ау­дандық қоғамдық даму бөлімінің бас маманы С.Сыздықова марапатталды.

Байқауға белсене қатысқан өзге де қатысушыларға алғыс хаттар мен сыйлықтар табысталды.

Б.Бағдатұлы

Пікір үстеу

Э-пошта мекенжайыңыз жарияланбайды. Міндетті өрістер * таңбаланған