Ақпарат айдынындағы қос басылым

Өткен жұма күні Қызылорда қалалық А.Пушкин атындағы кітапхананың ұйымдастыруымен халықаралық ақпарат күнін орайластырып, «Ақпарат айдынындағы қос басылым» атты ашық есік күні болып өтті. Кітапханашылар оқырмандар үшін «Әлімсақ» журналы мен «Ұстаз мәртебесі» газетінің нөмірлерінен және редакция тарапынан жарық көрген кітаптардан көрме жасады.

«Әлімсақ» журналы 2009 жылы 25 сәуірде, ал «Ұстаз мәртебесі» газеті 2011 жылы 18 наурызда оқырманына жол тартқан болатын. Содан бері үздіксіз жарық көріп келеді. Әр басылымның өз ерекшелігі бар. Оқырмандарына қос басылымның бас редакторы Нұрлан Көбегенұлы ақпараттың мәнін, соның ішінде бұқаралық ақпараттың иесі журналистер екенін, олардың өз аудиториясына шынайы, нақты, тексерілген ақпарат таратынын жеткізді. Сонымен бірге басылымдар туралы, алдағы жоспарларымен бөлісті.

Еркін форматта өткен басқосуда «Өрлеу» БАҰО» АҚ филиалы Қызылорда облысы бойынша кәсіби даму институты директоры Бауыр­жан Елеусінов, «Сыр медиа» ЖШС директорының орынбасары Айжан Абдуллаева, Абылай хан атындағы №140 орта мектебі директорының орынбасары Бақытжан Жақсылық өз ойларымен бөлісті. Т.Есетов атындағы №264 мектептің тарих пәнінің мұғалімі Қанат Аманкелдіұлы ұлттық қолөнерге ақпараттық қолдау білдіруді сұрады.

Басқосуға қос басылымның ойлы оқырмандары – Ә.Тәжібаев атындағы кітапхананың, облыстық архивтің, облыстық зағип және нашар көретін азаматтарға арналған кітапхана қызметкерлері мен қаладағы білім ордаларының ұстаздары, медициналық мекемелердің қызметкерлері келді. Шығып сөйлегендер өз ұсыныстарын ортаға тастады. Н.Көбегенұлы барлық сөйлеушілерге жауабын айтып, ұтымды ұсыныстарға қолдау білдіретінін айтты.

Кездесу соңында зейнеткер, «Әлімсақ» журналының тұрақты оқырманы Райкүл Кембилова редакция ұжымына алғысын айтып, батасын берді.

Б.Бағдатұлы

Пікір үстеу

Э-пошта мекенжайыңыз жарияланбайды. Міндетті өрістер * таңбаланған