Егемендікті дәріптеген кездесу оқушыларға ой салды

2022 жылдың 16 шілдесінде Ұлттық құрылтайда Қазақстан Республикасы президенті Қасым-Жомарт Тоқаев ұлттық мереке мәртебесін Республика күніне қайтаруды ұсынған болатын. 1990 жылы 25 қазанда Қазақстанның егемендігі туралы Декларация қабылданды. Бабаларымыз үш ғасыр армандаған тәуелсіздік құжат ретінде тіркелді. Осы декларацияның арқасында еліміздің жеке территориясы, халықаралық қатынастағы дербестігі, мемлекеттік рәміздері бекітілді. Республика күні осындай тарихи құндылығымен бағаланды.

Республика күніне орай Қызылорда облысының мемлекеттік архивінің ұйымдастыруымен Абылай хан атындағы №140 орта мектебінде тәуелсіз Қазақстанның егемендік алғаннан кейінгі қалыптасу тарихымен таныстыру, жас ұрпақты Отанын сүюге, еліміздің рәміздерін қастерлеуге, бай-қуатты ел екендігін мақтан етуге үйретіп, туған еліне, жеріне деген сүйіспеншілігін арттыру мақсатында «Мерейі үстем, туы биік Қазақстан» тақырыбында кездесу өтті. Шара Қызылорда облысының 85 жылдығына орай архив қоры құжаттарынан дайындалған «Қызылорда облысына – 85 жыл» атты көрмемені таныстырудан бастау алды.

Жиынды мектеп директоры А.Мұсабаева ашып, қонақтарды ұлттық мереке күнімен құттықтады. «Бұл мереке халқымыздың сан ғасырлық тағдырлы жолының сыйындай сезіледі. Сондықтан республика күнін оқушылар санасына сіңіріп, ұрпақ бойында отаншылдық рухты ояту ұстаздардың басты міндетіміз» деді ол.

Шараға «Қазақ КСР халық ағарту ісінің озық қызметкері», «Ыбырай Алтынсарин» төсбелгісінің иегері, Қызылорда қаласының ардагерлер кеңесі төрағасының орынбасары Күләй Ермағамбетова, Қазақстанның еңбек сіңірген қайраткері, Білім беру ісінің құрметті қызметкері, Қызылорда облысының Құрметті азаматы Әлима Әбдіқалықова, әдеби-мәдени, тарихи-танымдық «Әлімсақ» журналы және республикалық қоғамдық-әлеуметтік «Ұстаз мәртебесі» газетінің бас редакторы, филология ғылымдарының кандидаты Нұрлан Көбегенұлы, жас ақын, халықаралық, республикалық жыр мүшәйраларының жүлдегері, «Самғау» жастар сыйлығының иесі Мақсат Дауылбай, Абылай хан атындағы №140 орта мектебінің ұстаздары, оқушылары және архив қызметкерлері қатысты.

Өз кезеңінде сөз алған Қызылорда қалалық ардагерлер кеңесі төрағасының орынбасары Күләй Сағындыққызы: «Ұлттық мереке мәртебесін алып, ерекше аталып, халықтық мерекеге айналғаны қуантады. Бүгінде бабалар арманына біз жетіп, Қазақстан Республикасының өзге елдермен терезесі тең дәрежеде дамып жатқынының куәсіміз. Тәуелсіз елімізді дамытудағы іргелі істерді жастармен бірлесе атқарудамыз. Сол себепті бұл күннің мән-маңызын жас ұрпаққа көбірек дәріптеп, Жаңа Қазақстан құруда тынбай еңбектеніп, ел үшін жастардың абыроймен қызмет ететіндеріне сенемін», – деп, тебірене сөйледі.

Ал, Әлима Жақыпқызы: «Жас­тарымыз Отанымыздың тағдыры мен болашағы үшін жауапкершілікті өз мойындарына алып және барлық білімін, қабілетін еліміздің өркендеуіне жұмсап еңбек етуде. Дамыған, алдына қойған мақсатқа ұмтылған, жігерлі жастарды тәрбиелеу мен қолдауда атқарылып жатқан жұмыстар да аз емес. Ұлттық құндылықтарды сақтау және оларды насихаттау барысындағы келелі істерде сүбелі үлес қосып жүрген тал бойында рух пен намыс егіз өрілген жастарымыз жетерлік» деп, еліміздің тұрақты дамуы мен кемелденуі жолында барлық игі бастамаларға сәттілік тіледі.

Болар баланың белін бууға еліміздің әр кез даяр болуы керектігін сөзге тиек еткен Нұрлан Көбегенұлы: «Мағжан сенген жастардың бүгінгі күні қайтпас қайсарлығы, өшпес рухы керек болып тұр. Егемен елдің жастарына жасықтық, жылпостық, жарамсақтық жараспайды» деп, жастардың намысын қажай сөйледі. Ал, жас ақын, халықаралық, республикалық жыр мүшәйраларының жүлдегері, «Самғау» жастар сыйлығының иегері Мақсат Дауылбай көпшілікті республика күнімен құттықтап, өз шығармашылығынан Қызылорда облысының 85 жылдығына арнауын оқып берді. Шара соңында оқушылар патриоттық рухты әндер айтып, жүрекжарды өлеңдерін оқыды.

А.Әділжанұлы

Пікір үстеу

Э-пошта мекенжайыңыз жарияланбайды. Міндетті өрістер * таңбаланған