Газет-журнал оқитын қала әкімі әріптестеріне үлгі болды

Қызылорда қаласына әкім болып келген азаматтардың осалы жоқ. Біз білетін Жарылқасын Шәріповтен Асылбек Шәменовке дейінгі аралықта қаланы басқарғандар Сырдың бас қаласын дамытуда аянып қалған емес. Рас, қалада мәселе көп. Бір коммуналдық саланың өзі адамды шаршатып жібереді. Қала тазалығы күн тәртібінде. Қаржы тайқазанын толтыру, инвестиция тарту, әлеуметтің әлеуетін көтеру, тізе берсе, атқаруға тиісті жұмыстарды орындау үшін қала әкімінің жұмыс кестесі таңертең сегізден түнгі он екіге дейін созылуы мүмкін. Ал, ол үшін әкімге біліктілік, жан-жақтылық, іскерлік, шыдамдылық, коммуникативтілік, парасаттылық ауадай қажет. Ол адамдармен жылы қарым-қатынас жасаумен, тәжірибемен, кітап, газет, журнал оқып, білімін жетілдіріп, дүниетанымын дамыту арқылы келеді.

Расымен, бүгінгі әкімдер газет пен журнал оқи ма әлде әлеуметтік желіге таңылып қалған ба? Біз оның жауабын сейсенбі күні білдік. Таңертең жұмыстың басын газет-журнал қарап, қала тақырыбын астын сызып тұрып оқитын Асылбек Өмірбекұлы Шәменов қала күнінің қорытындысын айту үшін қаладағы жетекші БАҚ басшыларының басын қосты. Әкімнің өз кабинетінде еркін форматта өткен кездесуге алты редактор жай келмеді, сұрақтары мен ұсыныстарын ала келді.

Шынын айтайық, биылғы қала күні мерекесі ерекше аталып өтті. Қала күнін өткізуде жаңашылдық пен жанашырлықты байқадық. Туған өлкені насихаттауда ақпарат құралдары да белсене кірісті. Мерекеге қатысты жаңалықтар газет пен журнал беттерінде күнделікті насихатталып жатты. Қала әкімі оны оқып отырғанын білдік. Газетіміздегі өткен шаралар туралы жазылған мақалаларға мұқият қарап, ризашылығын білдірді. Журналист еңбегін жоғары бағалайды екен. Мен де өз кезегімде сұрақтар қойып, ұсыныстарымды айттым.

Көпшілікке таныс жайт, қоғамдық көлік мәселесіне байланысты әкім қалаға жаңа автобустардың келіп жатқанын, көліктер тиісінше маршрут бойынша тұрғындарды уақытылы тасымалдайтынын жеткізді. Қаланы дамытуда кәсіпкерлердің ролі зор екенін, қала күнін өткізуде кәсіпкерлердің белсенділігін тілге тиек етті.

Қала күніне орай “Буккроссинг” кітап сөресінің ашылғаны жаңалық болды. Осы күні кітап сөресіндегі кітаптарды алушылар көбейген. Сөреге күнделікті қойылған кітаптарды қаланың тұрғындары алып жатыр. Мен өз тарапымнан енді газет-журналды да оқыту үшін сол маңайға газет киоскісін ашып, оған Қызылордадан жарық көретін басылымдарды қоюды ұсындым. Әр оқырман өзінің оқитын басылымын киоскіден алып, насихаттайтын болады.

Жылда қала әкімінің кубогі үшін Қызылордада спорттық сайыстар өтіп жатады. Енді алдағы уақытта журналистер арасында да бірнеше номинация бойынша қала тақырыбына мақалалар конкурсын өткізіп, қала күні үздік журналистерге «Қызылорданың қарымды қаламгері» статуэткасы табысталса» деген де ұсынысымды жеткіздім. Қала орталығында ашылған «Қаламгерлер аллеясын» қайта жаңғыртып, аллеяда конкурстың қорытындысы өткізілсе, жарасымды болар еді.

Үшінші ұсынысым, Қызылорда қаласының астана болғанына 2025 жылы 100 жыл толады. Жүз жылдыққа дайындықты осы кезден бастау керек екенін айттым. Алғаш Қызылордаға келген Алаш арыстарының тұрған үйлері қазір жоқ, бұзылып кетті. Тіпті, астана орталығы болған ғимарат та бұзылып, жер сипап қалдық. Енді сол олқылықтарды толтыру үшін Алаш арыстарының Қызылорда астана болған тұстағы еңбектерін зерделеу, архивтермен жұмыс жасау және тарихи есімдерді тақтайшаға суреттерімен орнатып, қала көшелеріне ілу секілді жұмыстар қолға алу керектігін әкім назарына салдым.

Біраз жұмыстарды жоспарлап, жүзеге асырып келе жатқан қала әкімі Асылбек Шәменовпен кездесу мазмұнды болды. Әр кезде өзінің тұрғындарға ашық екенін, шынайы әрі нақты ақпарат жеткізіп жүрген барша журналистке рақметін айтты.

Н.Көбегенұлы

Пікір үстеу

Э-пошта мекенжайыңыз жарияланбайды. Міндетті өрістер * таңбаланған