Қызылорда – жастар қаласы

Қыркүйек айының 9-ы күні Қызылорда қаласының күні басталды. Көпшілікке мәлім, мереке жастар театрының қойылымымен, жастар карнавалымен және орталық алаңда концерттік бағдарламамен ашылды. Қаламыздың мерейлі мерекесі 9 қыркүйек пен 12 қазан аралығында жоғары деңгейде аталып өтілді. Енді 14-15 қазанда қорытындыланбақ. Ең басты айта кетерлігі, бәрімізді тәнті еткен шаралар кәсіпкерлердің демеушілігімен атқарылған. Осы тұста атымтай жомарт жандармен үйлесімді жұмыс істеген қала әкімі Асылбек Шәменовтың іскерлігін айтуымыз керек. Сонымен қала күніне орай ұйымдастырылған шаралар легі қалай өтті? Бір шолып өтейік.

Бір айлық шаралар тізбегі «Қызылорда – жастар қаласы» тақырыбымен бастау алды. Мереке аясында қалалық «Жастар театры» сегізінші маусымын белгілі драматург Жолтай Әлмаштың «Отырардың жасыны» тарихи драмасымен ашып, қала әкімі Асылбек Шаменов спектакльге арнайы барып қатысты. Осы күні Қызылорда қаласының тарихы музейінің ұйымдастыруымен «Шырайы артқан шаһар» атты мерекелік көрменің ашылу салтанаты болды. Көрмеге Қызылорда қаласының оқшылар мен жасөспірімдер үйінің қолөнер шеберлері, «Бегімай» өнер орталығының және Қызылорда облысы білім басқармасының Қызылорда қалалық қосымша білім беру оқу-әдістмелік орталығының үйірме оқушыларының құнды қолөнер туындылары қойылды.

Қала күні мерекесінің кезекті тағылымды шарасы «Өнер арбаты» бойында өтіп, шаһар басшысы Асылбек Шаменов кітап көрмесі мен сатылым акциясына, сондай-ақ “Буккроссинг” кітап сөресінің ашылу салтанатына арнайы қатысты. Қала әкімі арбатты бойлай орналасқан “Өткені сырлы, келешегі нұрлы – Қызылорда” атты кітап көрмесі мен кітап жәрмеңкесін аралап шықты.

Қызылорда қаласы әкімінің жүлдесіне арналған республикалық жайдарман фестивалі де ерекше өтті. Тартысты толы сайыста өңіріміздегі командалармен қатар, Ақтөбе, Шымкент, Қарағанды, Тараз қалаларынан келген жайдарман құрамалары өнер көрсетті.

Биыл Қызылорда қаласы күнін мерекелеудің мәні ерекше. Түрлі форматтағы іс-шаралар бір ай бойы өткізілді. Соның ерекшесі, «Сыр ана» монументінің алаңында 10 мыңнан аса тұрғынның қатысуымен «Ауылым – берекенің ақ бесігі» атты этно бағыттағы мерекелік іс-шара. Ел бұл күнді «қырық қазан» деп атап кетті. Иә, осындай дәстүрді дәріптеген шара елге ерекше серпін берді.

Қызылордада алғаш рет жастардың сұранысы негізінде қала әкімдігінің ұйымдастыруымен «Менің сүйікті қалам» республикалық мобилографтардың фестивалі де өтті. Шарада елімізге танымал мобилограф, режиссер Қыран Талапбек және «Kyran Films» ұжымы жиналған жастарға мобилография саласындағы тәжірибелерімен бөлісті. Кездесу соңында мобилографтардың ортақ тобы құрылып, екі жас кәсіпкерлер тарапынан бірлесіп жұмыс істеуге ұсыныс алды. Айта кету керек, фестиваль аясында өткен байқауға қатысуға 70-тен аса қатысушыдан 100-ден аса өтінім түскен. Қатысушылардың басым бөлігі Қызылорда қаласынан, Арал, Қармақшы, Жаңақорған, Жалағаш аудандары мен Алматы қаласынан келген жастар болды.

Қала күні мерекесі аясында шаһарды жасыл-желекке айналдыру бағытындағы жұмыстарға өз үлестерін аянбай қосып келе жатқан қала тұрғындарын ынталандыру мақсатында «Үздік аулалар» байқауын ұйымдастыру дәстүрге айналған. Аталған байқаудың жеңімпаздарын марапаттауға қала әкімінің орынбасары Ақзира Қасымова арнайы қатысып, аула бағбандарына қала әкімінің дипломын және қаржылай сыйақыларын табыстады.

Қала күніне арналған кезекті тағылымды шарада жергілікті ақындар сөз маржанын төгіп, сүйікті қаламыздың келбетін жырмен әдіптеді. Алашқа белгілі ақындар Оңталап Нұрмаханов, Серік Ыдырысов, Қаршыға Есімсейітова, Қазына Өзденбаева, Елубай Әуезов, Мамыр Байдәулетовтер бастаған жыр көшін Толқын Қабылша, Назгүл Бердіқожа, Мөлдір Айтбай, Ұлықбек Бекұзақұлы, Биболат Сәтжанов, Айдар Сайлауов, Ғабит Кәдірбаев сынды талантты жас ақындар шоғыры жалғастырып, Ақмешіт аспаны ән-жырға бөленді. Поэзия кешін Сыр елінің талантты жас ақыны Ақжол Түменбай жүргізіп, өлең сүйер көрерменге өзгеше жаңа леп сезіндірді.

Қызылорда қаласында бір айға созылған қала күні мерекесі балаларды салауатты өмір салтына баулу мақсатында шаһарда тұңғыш рет ұйымдастырылған «Бала барысы» байрақты бәсекесімен жалғасты.

Қызылорда қаласы бойынша жыл басынан бері 744 мәдени-көпшілік шара ұйымдастырылып, оған 125 мыңға жуық көрермен қатысқан екен. Бұл санға қала күнінің үлесі бар екенін де айта кетейік.

Қала күні «Бірлік пен бақыт арнасы – қазақтың Қызылордасы» атты шарамен түйінделеді. 14 қазан күні сағат 18:30-да Орталық стадионда өтетін қала күні мерекесінің салтанатты гала-концертінің қонақтары – Қайрат Нұртас, Nazima, Raim және Мирас Жүгінісовтер. Бұдан бөлек, концертте жергілікті өнерпаздар да өнер көрсетеді. Қызықты думанды бірге тамашалап, қала күнінде көңіл-күйімізді көтерейік. Қаламыздың мерейлі мерекесі құтты болсын!

А.Сырлыбай

Пікір үстеу

Э-пошта мекенжайыңыз жарияланбайды. Міндетті өрістер * таңбаланған