Халқызымыздың әл-ауқатын көтеріп, еліміздегі түйткілді мәселелерді шешуде мемлекеттік қызметшілердің жұмысын айта кеткеніміз жөн. Ел тұрғындарының талап-тілектеріне, өтініш-ұсыныстарына дер кезінде назар аударып, оларға қажетті ақпарат беріп, сол тұрғыда жұмыс жасайтын мамандардың жұмысы жауапкершілікті талап етеді. Түрлі эмоцияға берілетін, мәселенің байыбына бармайтын жандардың сұрағына сауатты, толыққанды жауап берумен ерекшеленетін мемлекеттік қызметшілердің берілген тапсырмаларға сәйкес атқарып жатқан жұмыстары жетерлік. Сыр өңіріндегі осы бағытта әрекет ететін мамандарды облыс әкімі Нұрлыбек Нәлібаев мемлекеттік қызметші күнімен құттықтап, арнайы шара өткізілген болатын.
— Таяуда ғана өткен ұлттық Құрылтайдың екінші жиынында Мемлекет басшысы Қасым-Жомарт Кемелұлы Тоқаев мемлекеттік қызметшілердің бойында профессионализм, яғни нағыз маман атану және отаншылдық қасиет болуы керек екенін айтты. Бұл ретте әрбіріміз «Адал азамат» құндылығын бәрінен биік қоюға тиіспіз. Себебі Президент айтқандай, «Біз отаншылдығымызды және елге жанашырлығымызды нақты іспен көрсетуіміз керек. Адал азамат болуға ұмтылуымыз қажет. Сонда әрқайсысымыз Отанымызды өркендетуге үлес қосамыз, – деді Нұрлыбек Машбекұлы.
Іс-шара барысында бірқатар қызметкерге «Үздік мемлекеттік қызметші» төсбелгісі, Құрмет грамотасы және Алғыс хаттар табысталып, «Үздік мемлекеттік қызмет көрсетуші» номинациясына лайық жеңімпаз марапатталды.
Сандарды сөйлетсек, қазіргі таңда өңірде 3000-нан аса мемлекеттік қызметші аймақ дамуына елеулі үлес қосып келеді. Олардың тең жартысы – нәзік жандылар. Мемлекеттік қызметтегі қыз-келіншектердің 325-і басшылық лауазымды абыроймен атқаруда.
Аймақта 29 жасқа дейінгі 300-ден аса жас мемлекеттік қызметші бар. Олардың 20-сы – Президент жанындағы Мемлекеттік басқару академиясының, 3-уі – «Болашақ» бағдарламасының түлегі. Өткен жылы 9 мемлекеттік қызметші Президент жанындағы Мемлекеттік басқару академиясының грантын иеленіп, жаңа білім дағдыларын меңгеруде.
Қызылорда облысының барлық мемлекеттік қызметшілері бір мүдде аясында жұмыс жасауда. Халқымыздың жағдайына немқұрайлы қарамай, Мемлекет басшысының жоспары аясында жұмыла іс тындырып жүр. Мемлекеттік қызметшілерге көрсетілген құрметтің әсерінен, олардың жаңа қарқынмен жұмысқа кірісіп, облысымыздың дамуына үлес қосудан шаршамайды деп сенім білдіреміз.
Қ.МАТАЙ
