Адамның бірінші байлығы – денсаулық. Денсаулығына үлкен жауапкершілікпен қарап, ауырмайтын жол іздейтін адамдардың өмір сүру деңгейі жоғары. Бірақ қоршаған ортаны ластайтын түрлі жағдайларға байланысты қоғамда вирустар тарап, аурулардың пайда болатын сәттері де кездеседі. Бұл ретте медицина саласының қызметкерлерінің еңбегін айта кеткен жөн. Түрлі науқастың диагнозын дәл тауып, жылы сөйлесіп, жанына батқан ауруды тәннен жоқ қылуға асығатын дәрігерлердің жұмысы ерлікпен пара-пар. Ақ халатты абзал жандардың еңбегін ескерген облыс әкімі Нұрлыбек Нәлібев медицина қызметкерлерін кәсіби мерекесімен құттықтады.
— Президентіміз Қасым-Жомарт Кемелұлы Тоқаев «Ұлт саулығы – әділетті Қазақстанды құру жолындағы мемлекеттік саясаттың аса маңызды бір бағыты. Мемлекет медицина қызметкерлеріне жан-жақты қолдау көрсетіп, денсаулық сақтау саласын дамытуға баса назар аударады» – деп дәрігерлердің ел алдындағы беделі мен мәртебесі жоғары екендігін айрықша атап өтті.
Бүгінде аймақта халыққа сапалы медициналық қызмет көрсету үшін қажетті шаралардың барлығы жасалуда. Емдеу-алдын алу мекемелерінде 3000 дәрігер, 11000-ға жуық орта буын маман жұмыс істейді. Мамандандырылған және жоғары технологиялық-медициналық көмек түрлерінің сапалы болуына баса мән берілуде. Өткен жылмен салыстырғанда өңірде жалпы өлім-жітім көрсеткіші 12%-ға, ана өлімі 48%-ға, сәби өлімі 44%-ға, жарақат, жазатайым оқиғалардан және уланудан болатын өлім-жітім 41%-ға, туберкулезден болатын өлім-жітім 33%-ға төмендеді.
Мемлекет басшысының бастамасымен жүзеге асырылатын «Ауылда денсаулық сақтауды жаңғырту» пилоттық ұлттық жобасының маңызы зор,– деді аймақ басшысы.
Салтанатты кеште көпбейінді облыстық аурухананың дәрігер хирургі Абдулла Шүленбаевқа «Қызылорда облысының құрметті азаматы» атағы табысталды. Бірқатар медицина қызметкері облыс әкімінің Алғысымен, ҚР Денсаулық сақтау министрлігінің «Еңбек ардагері» медалімен, «Денсаулық сақтау ісінің үздігі» және «Денсаулық сақтау ісіне қосқан үлесі үшін» төсбелгілерімен және түрлі номинациялармен марапатталды.
Елдің болашағы сау тұрғындар екендігін ескерген Үкімет медицина саласына айтарлықтай қолдаулар көрсетіп жүр. Қызылорда облысында да жергілікті әкімдік әрбір медициналық мекеменің жай-күйіне алаңдап, науқастың толыққанды ем алуына бар жағдайды жасауда. Соңғы жылдары облыста медициналық нысандардың құрылысы жүргізілуде. Ұлттық жоба аясында 2023-2024 жылдары Сыр өңірінде құны 9,7 млрд. теңге болатын 27 денсаулық сақтау нысаны салынады. 2025 жылға дейін Арал, Қазалы, Шиелі, Жаңақорған ауданаралық ауруханаларын көпбейінді ауданаралық аурухана деңгейіне жеткізу жұмыстары жүргізіледі. Ел Президентінің, Үкіметтің қолдауымен Қызылорда қаласында бір ауысымда 100 келушіге арналған емханасы бар 300 орындық көпбейінді аурухана құрылысы басталды. Құны 36,4 млрд. теңге болатын нысан құрылысы 2025 жылы аяқталады. Ана мен бала саулығын жақсарту, жас аналарға жоғары мамандандырылған медициналық көмектің қолжетімділігін арттыру үшін көпбейінді облыстық аурухана жанынан 70 төсектік босану бөлімшесі ашылады.
Президент тапсырмасына сәйкес халықаралық стандарттарға сай 200 төсектік перинаталдық орталық салу мәселесі пысықталып, нысан құрылысына облыс орталығынан 3,7 гектар жер учаскесі бөлінді. Өткен жылы ел ағаларымен бірге Қызылорда қаласының сол жағалауында облыстық Қан орталығының іргетасы қаланған еді. Жаңа нысан келер жылдың бірінші тоқсанында пайдалануға берілмек.
Сыр халқының денсаулығын бақылауда ұстап, көмек сұраған тұрғындардың жағдайын жақсартып, емдік шаралар көрсетіп жүрген дәрігерлердің мерекесі оларға деген құрметтің бір ғана бөлігі. Адам денсаулығына араша түсіп, үлкен жауапкершілікті қажет ететін медицина қызметкерлерінің насихатталып, ел алдында абыройын көтеру өңірімізде оларға деген ілтипаттың көңіл қуантарлықтай екендігін байқатады.
Қазақбай ӘНДЕШ
