Халықтың тыныштығы мен қауіпсіздігін күзеткендер

Биыл Қазақстан полициясының құрылғанына – 31 жыл. 1992 жылдың 23 маусымында Қазақстан Республикасының Президенті «Қазақстан Республикасы Ішкі істер органдары туралы» заңды қабылдау Жарлығына қол қойып, Қазақстан полициясы құрылды. Осы күні егеменді елімізде Қазақстан полициясының іргетасын қалаған ардагерлерге құрмет көрсетіп, тыныштық пен азаматтардың қауіпсіздігін сақтауда жан қиған әріптестерімізді еске аламыз.

Тәуелсіздік жылдары қызметтік міндеттерін атқару кезінде Полиция департаментінің 5 қызметкері қаза тапты. Бейбіт уақытта халықтың тыныштығы мен қауіпсіздігі үшін өз өмірлерін құрбан еткен милиция капитаны Кеңесбек Әбішев пен милиция лейтенанты Есен Бектұрсынов, милиция сержанты Қайрат Қалеков, милиция сержанты Оразбек Сансызбаев «Ерлігі үшін» медалімен, ал полиция аға лейтенанты Талғат Қозыбаев ІІ дәрежелі «Айбын» орденімен наградталған.

– Департамент ауласына 1985 жылы қызмет бабында қаза тапқан сақшыларға арналған және 2015 жылы Ұлы Отан соғысына қатысқан ішкі істер органдарының ардагерлеріне арналған ескерткіш-монументтері қойылды. Қазіргі уақытта Полиция департаментінің Ардагерлер кеңесінде 2700-ден аса зейнеткер бар. Олар өз тәжірибелерін ортаға салып, департамент қызметкерлерімен бірге тиісті жұмыстар жүргізіп келеді. Бұл ретте еңбек жолын ішкі істер органдарына арнап, бірнеше жас буынды тәрбиелеген ардақты ардагер ағаларымыз бен апаларымызға алғыс айтамыз,- дейді Қызылорда облысы Полиция департаментінің Ардагерлер Кеңесінің төрағасы Серікбол Қуатбайұлы.

Бүгінде өңірде қоғамдық тәртіпті сақтауда екі мыңнан астам тәртіп сақшылары абыройлы қызмет атқарады. Полиция қатарында ерлермен бірге погон таққан 200-ден аса әйел қызметкер бар. Олар ел тыныштығы, тәуелсіз Қазақстанымыздың өркендеуіне өз үлестерін қосуда.

Облыстық полиция департаментінде отбасымен қызмет етіп жүрген 10-нан аса полицейлер династиясы бар. Бір шаңырақтың өрелі ісін жалғап, ішкі істер органдарында бүгінде абыройлы қызмет атқарып келе жатқан Мұхтаровтар, Анафиндер, Оразовтар, Туляповтар, Искаковтар, Әубәкіровтер, Пірімбетовтер, Нұрбаевтар, Бексейітовтер әулеттерін айта аламыз. Полицейлер династиясының ұстанымы – темірдей тәртіп және өз елінің патриоты болу. Сонда ғана қиындығы мен қатері мол саладағы тынымсыз еңбек жемісін бермек.

– Ішкі істер министрлігінің бастамасымен ішкі істер органдарын жаңғырту жөніндегі жол картасы қабылданып, оның шеңберінде қызметкерлердің әлеу­меттік жағдайы да едәуір жақсарды, жалақысы көбейді, тұрғын үйді жалға алғаны үшін өтемақы алатын қызметкерлердің тізімі артты.Сол себептен полиция қызметкерлері антына адал, еліне адал қызмет атқаратыны сөзсіз,- дейді Қызылорда облысы Полиция департаментінің Кадр саясаты басқармасының аға инспекторы полиция майоры Сабыр Ахметқалиев.

З.АХМЕТ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған