Әкімияттың төрт бұрышын теңселтіп…

Парламентте қозғалған депутаттың блогер туралы әңгімесі көпшілікке ой салған секілді. Бұл шегіне жеткен соң айтылып отыр. Осыдан он жылдай уақыт бұрын мемлекеттік қызметтегі бір танысымның қызмет орнына барғанымда компьютермен алысып отырғанының үстінен түскенмін. Сөйт­сем сол кездегі желі қолданушы желіге бірдеңе жазыпты. Соған жауап қайтарып отыр екен. «Журналистке келгенде заңға тірелесіңдер, ал блогер десе, жандарың қалмай, тыпырлайсыңдар. Оларды жаман үйретпеңдер, ертең мойындарыңа шығып алады» дегенмін. «Өй, жоғарыдағы басшылар біздің бастыққа жауап жаз деп айтыпты, әйтпесе нем бар?» деп жауап берді.

Айтқаным айдай келді. Биліктің мойнына блогерсымақтар мінді, жай мінген жоқ, екі аяғын жуан мойынға салып алып, орындық етіп отырып алды. Енді зардабын шегіп жатыр.

Ендігі әңгіме жергілікті биліктің журналистерге, қаламгерлерге көзқарасы турасында. 2021 жылы Қызылорда қаласының әкімі Ғанибек Қазантаев БАҚ басшыларымен кездесу өткізген сәтте журналистер аллеясын ашу туралы құлақдар еткенбіз. Себебі 2019 жылы Елордада қаламгерлер аллеясының ашылғанынан хабарымыз бар еді. Айтылған сөзге мән берген Ғанекең сол кезде қаламгерлерге құрметі ретінде аллея ашуға ниеттенді. Ойын жүзеге асырған қала мэрі әкімдік жанындағы Қалтай Мұхамеджанов, Әбділда Тәжібаев, Зейнолла Шүкіровтердің ескерткіші орналасқан аумақтан аллея ашып, салтанатты түрде тұсау кесу рәсімін жасады.

Шарада сөйлеген ақын Шәкизада Әбдікәрімов:

Бүгін менің еңсем тік,

Көңілдердің көкжиегін кең серпіп.

Ертең мұнда жыр оқиды ақындар,

Әкімияттың төрт бұрышын теңселтіп.

Жыр оқиды буырқанып, бұрқырай,

Ел мұңымен сай-сүйегі сырқырай.

Сонда деймін терезеден шенділер,

Мойнын созып қарап тұрса, шіркін-ай!-деп, армандап, өлеңнен өрнек өрген еді.

Содан кейін көз тиді ме, ақындар өлең де оқыған жоқ, шенділер мойнын да созған жоқ. Артынша аллеяның аркасы жоқ болып кетіп, орнын сипап қалдық.

«Апам да аң-таң, мен де аң-таң» боп жүргенде билікте ауыс-түйіс болып, енді Қазантаевтың орнын сипап қалдық. Орынтағын Шәменов ауыстырды. Жаңа әкіммен кездескен сәтте осы жайды құлағына салғанбыз. Қала әкімі Асылбек Шәменов журналистерге көңілінің түзу екенін, аллеяны қалпына келтіретінін айтқан-ды. Арада біраз уақыт болды.

Қыс кетіп, көктем келді. Көшеде көгалдыру жұмыстары қызып жатқан кезде аллея маңында да жұмыс қызыпты. Сұрастырғанымызда, жан-жағын абаттандырып, бұл жерді қаламгерлердің демалыс орнына айналдырмақшы екен. Шәкең ақын бастаған үлкен-кішісі келіп, өлең оқуға да, шахмат, дойбы тартысына түсуге де мүмкіндік берілмекші. Бұл қала әкімінің қаламгерлерге көрсеткен құрметі деп түсіндік.

Айтарымыз, жергілікті билік иелері, болмашыдан проб­лема жасап, өсектің, «домалақ арыздың» ізін аңдыған, стилистикалық, орфографиялық қателерге тұнған желідегі жазба иелерін әулие санағанды қою керек! Идеологияны қалыптастыру жолында жүрген кәсіби журналистерге дем беріп, оларды шынайы ақпаратпен уақытылы әрі бірінші қамтамасыз ету керек. Журналистер мәселе көтерсе, қорықпай жанынан табылып, бірлесе шешуде жұмылу керек. Әйтпесе, блогермін деп жүргендердің «жеміне» айнала бересіздер.

Н.Көбегенұлы

Пікір үстеу

Э-пошта мекенжайыңыз жарияланбайды. Міндетті өрістер * таңбаланған