«Жан жылуын әлемге таратқан аналар»

форумы қоғамдағы ана рөлін арттыруға сеп болды

Жұмақтың кілті – ананың табанының астында. Бізге дейінгілердің айтып кеткен бұл қасиетті сөзін біз де кейінгілерге айтамыз. «Ана» сөзі естігенде адамдардың жүрегіне мейірім ұялатады. Тірісінде анасына жақсылық жасап, алғысын алу – әрбір перзенттің парызы. Дүниедегі барлық перзенттің өсуіне, дамуына, жетістікке жетуіне аналардың қолдауы маңызға ие. Қазақ даласында аналарымыз үлкен құрметке бөленген. «Бір қолымен бесікті, бір қолымен әлемді тербетеді» деген қасиетті сөздің өзі – аналардың өмірден үлкен орын алатынының дәлелі. Қазақ аналарының болмысы жылылыққа, мейірімділікке құралған. Аналарымыздың көңілін тауып, халық алдында қошеметке бөлеу – міндет. Балаларының білімді перзент болып өсуіне үлкен ықпал етіп, болашағының жарқын болуына септігін тигізетін аналардың алғысын тарихтың өзі береді. Отбасының ұйытқысы болып, барлық жұмысқа үлгеріп жүрген аналарымыз құрметке лайық.

Осыған орай 8 наурыз – халықаралық әйелдер күніне орай облыстық білім басқармасының ұйымдастыруымен «Жан жылуын әлемге таратқан аналар» форумы өтті. Форумға қоғамдағы ана рөлін арттырып, аналардың мерейін көтеруді мақсат еткен облыс әкімінің орынбасары Нұрымбет Сақтағанов, облыстық білім басқармасының басшысы Мейрамбек Шермағанбет қатысты. Сонымен қатар ардагерлер, білім беру ұйымдары басшыларының тәрбие ісі жөніндегі орынбасарлары, әлеуметтік педагогтер, психолог мамандар да, қамқоршылық кеңес төрағалары мен белсенді аналар қатысты. Бұл шараның маңызын айта келе, облыс әкімінің орынбасары құттықтау сөзін айтып, отбасылық құндылықтар мен аналарымыздың абыройын көтеретін шара туралы тоқталып өтті. А.Тоқмағамбетов атындағы мәдениет үйіндегі шарада кәсіпкер аналардың жұмыстары көрсетіліп, ұлттық нақышта тігілген киімдер, қолөнер шеберлерінің бұйымдары көрмеге қойылды.

Облыс әкімінің тапсырмасына сәйкес бүгінде тәрбие бағытындағы жұмыстарды күшейту мақсатында кешенді тұжы­рымдама әзірленген болатын. Осы тұжырымдама аясында облыстық аналар форумының өткізілгені көпшілікке жылы әсер қалдырды.

– Бүгінде Сыр елінде де қыз-келіншектер саясатта, бизнесте және шаруашылықтың түрлі саласында ер-азаматтармен қатар еңбекке белсене араласуда. Қазіргі таңда өңіріміздегі халық саны 800 мыңның үстінде болса, оның тең жартысынан астамы әйелдер қауымы. Облыс бойынша мемлекеттік қызметшілердің 40 пайызы, медицина қызметкерлерінің 87 пайызы, педагогтердің 78,3 пайызы – нәзік жандар. Сол үшін адамзат баласына әйелден құдіретті, анадан ардақты, қыз-келіншектерден аяулы ешкім жоқ. Сондықтан әлемдегі ең жоғары мадақ та, құрмет те ару-аналарға арналады,- деді Нұрымбет Аманұлы. Облыс әкімінің орынбасары дарынды балаларды тәрбиелеп отырған көп балалы аналарды марапаттады.

Жиында ҚР Парламенті Сенатының депутаты Ақмарал Әлназарова Сыр аналарына бейнеқұттықтау жолдады. Мұқтаж отбасыларға көмектерін аямай­тын «Розалия және Эмир» аутизм орталы­ғының директоры Розалия Рахимова да сөз сөйледі. Айсұлу Нұрпейісова балаларына жетістікке жеткізуге бар күшін салып, шыңға шығаратын аналардың атынан сөз сөйлеп, білім жанашырларына алғысын білдірді. Жыршы, термеші Айнұр Ерниязова ұлттық салт-дәстүр мен ата-ананың бала өміріндегі рөлі туралы пікірін айтты. Ұлтты тәрбиелейтін аналардың басын қосқан бұл форумның соңы концерттік бағдарламаға ұласты.

Аналар туралы танымал тұлғалардың жүрекжарды әңгімелері көп. Соның бірі жарықшамды ойлап тапқан, әйгілі Томас Эдисонның анасы туралы әңгімесі жүректі қозғап, жанды тебірентеді. «Мені менің анам жасады, ол маған шынайы сенді» дейді ғалым. Ол өзінің анасы туралы үлкен махаббатпен еске алады. Жеті жасында мектеп табалдырығын аттаған Томастың ізденімпаз мінезін ұстаздары жақтырмай, жиі жазалайтын болған. Бір күні бала Томас мұғалімнің хатымен үйіне келіп, хатты анасына береді. Жүзі жасқа толған Томастың анасы көз жасын тыйып, баласына хатты оқып берді. «Эдисон ханым, сіздің данышпан ұлыңызды оқытуға біздің ұстаздардың қабілеті төмен, балаңыздың білімімен өзіңіз айналысыңыз» делінген хатта. Хаттың себебінен Томас үйінде оқып білім алады. Анасы арифметикаға, тарих, география, физика пәндерін Томасқа өзі оқытады. Ғылымда өзінің жаңалықтарымен танымал болған Томас Эдисонның анасы дүниеден өткесін, бала кезіндегі хатты үйіндегі мұрағаттар сақталған заттар арасынан тауып алады. Бірақ хаттың мазмұны анасының айтқан мазмұнынан мүлде ерекше екенін байқайды. «Эдисон ханым, балаңыздың ақылы төмен деңгейде, ендігі кезекте ұлыңызды оқыта алмаймыз, өзіңіз үйде оқытыңыз» деген бұл хаттан кейін Томас көзіне жас алады. Бірде Томас Эдисонға «Сіздің өнертапқыш ғалым болуыңызға кім көмектесті?» деген сұраққа: «Егер менің анам болмағанда, менен ешқандай ғалым шықпас еді, оның шексіз сенімі, махаббаты, мейірімділігі мен жақсылығы болмағанда, мен қазіргі деңгейде болмас едім» деп өз сөзін түйіндейді.

Иә, аналардың ықпалы баланың өміріндегі маңызын осы оқиға көрсетіп тұр. Қазіргі таңда аналарын келемеждеп күлкі қылып, әлеуметтік желіге жүктейтін жастар баршылық. Хайп қуалаймыз деп, ананың алдында айыпты болып жатқан жеткіншектердің көптігі алаңдататын мәселе. Қарттар үйіне жасы егде тартқан анасын апарып, жұмағынан тірідей айырылып жатқан адамдардың қоғамда жүргені ауыр қылмыс. Форумнан түйген ой: аналарымыз аман болып, барлық перзент аналарының разылығын алса екен.

Қ.ӘНДЕШ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған