Өткенде Қызылорда облысы әкімдігінің фейсбук әлеуметтік желідегі парақшасында биыл «Жайлы мектеп» ұлттық жобасы аясында алдағы үш жылда өңірімізде 21 мектептің салынатыны туралы ақпарат тарады. Бұған дейін Арал ауданы Ақшатау ауылының тұрғындары редакциямызға хабарласып, «жайсыз» мектептері туралы айтып, қаншама жылдан бері «мектеп салынады» деген уәдеге тойып келе жатқанын жеткізген болатын.
Әлбетте, әкімдік үш жылда салынатын 21 мектептің тізімін жарияласа артық болмас еді. Оның үстіне, осы жазбаға төмендегідей пікір қалдырғанмын. «Сол қатардан осыдан 37 жыл бұрын, 1986 жылы балықшылар жатақханасынан бастауыш мектеп жасаған, асханасы, спорт алаңы жоқ Арал ауданы, Ақшатау ауылындағы білім үйі қалып қоймаса екен. Ақшатау мектебі мәселесі уақытында облыстық қоғамдық кеңесте бірнеше рет көтерілді. 2017 жылы ақшатаулықтарға «жаңа мектеп саламыз» деп уәде еткен сол кездегі облыс әкімі Қырымбек Елеуұлының сөзі жүзеге асқан жоқ. Одан кейінгі әкімдерге жергілікті тұрғындар мойын созумен күндері өтті. Енді айтылған әрбір ойлы пікірге, ұтымды ұсынысқа мән беретін және жүзеге асырмай қоймайтын Нұрлыбек Машбекұлы бұл істі қолға алса, 50 орындық 9 жылдық мектеп 20 орындық балабақшасымен салынады деген үміттеміз. Бәріне уақыт — сыншы, уақыт — төреші. Жағымды жаңалықтармен жолығайық». Артынша облыстық білім басқармасы ауылдағы мектеп жобасының бүгінгі күні жалғасып жатқанын хабарлады. Ауыл тұрғындары осыдан кейін қарап жата ма, ауыл мектебінің мүшкіл жағдайын бірінен соң бірі жазды.
Көп ұзамай, ауылға республикалық тәуелсіз арналардың облыстағы тілшілері барып, жағдайды өз көздерімен көріп, ауыл тұрғындарымен, ауыл әкімімен сөйлесіп, ақпарат таратты. Жария болған ақпараттар билікке жай тимейтіні белгілі. Біз сенім артқан облыс басшысы тапсырмасына орай, осыдан кейін білім басқармасының басшысы аудан әкімімен Ақшатау ауылына барғанын естідік. Олар да жағдайды өз көздерімен көріп, ауыл тұрғындарымен сөйлесіп қайтыпты.
Енді, міне, кеше өңірлік коммуникациялар орталығының алаңына Арал ауданының әкімі Серік Сермағамбетов журналистер алдында өткен жылы атқарылған жұмыстардың қорытындысын айтуға келді. Мен бірнеше сұрақтардың ішінен Ақшатаудың мектебіне байланысты сауалымды жолдадым. Біз үшін нақты ақпарат керек әрі шеткері ауылда облыс орталығына құлақ тосып, жағымды хабар естігісі келіп отырған тұрғындар бар.
— Бұл жағдай біздің әр кез назарымызда. Былтыр 26 желтоқсанда Ақшатау ауылы мектебінің жоба-сметалық құжаты жасалынды. Ол кезде биылғы жылдың бюджеті бекітілген болатын. Енді алдағы жылдарға жоспарға қоямыз. 2025 жылға дейін мектеп салынады, мүмкіндік болса, одан ертерек салып, ел игілігіне беретін боламыз. Қазір ауылда 55 оқушы бар, оның 15-і ауылдағы бастауыш мектепте оқиды. Қырық оқушы Аманөткел, Шөмішкөл ауылдары мен Арал қаласында оқып жатыр. Тек мектеп ғана салынады, жанынан балабақша салынбайды,- деп, сұраққа сай жауап қайтарды аудан әкімі Серік Сағитжанұлы.
Аудан әкімінің өзі жағымды жаңалықты жария етті. Тек балабақша салынбайтыны ақшатаулықтарға қалай әсер ететінін білмеймін, дегенмен сең қозғалды. Енді жоғарыда жазғанымдай, бәріне уақыт — сыншы, уақыт — төреші. Жағымды жаңалықтармен жолығайық.
Н.Көбегенұлы
