Құрыш қолды құрылысшы қауымының қызметі ең бейбіт, жасампаз мамандықтардың біріне саналады. Бұл мамандық иелерінің жаздың аптап ыстығына, жауын-шашынға, күннің үскірік суықтығына қарамастан еңбек етіп, қалың жұртшылықты жаңа баспана немесе сәулетті мәдениет үйі, мектеп, аурухана секілді нысандармен қуантып жүргендері. Бүкіл әлем көз тігіп, таңдай қаққан тәуелсіз мемлекетіміздің жас астанасы Астананың да сұлу көшелері мен зәулім ғимараттарында, жаңа тұрғын үй кешендерінде құрыш қолды құрылысшылардың қолтаңбасы қалып жатыр. Сондай-ақ, біздің өңірдің де жыл санап өркендеуінде, экономикасының өрге тартуы астарында құрылыс саласының өзіндік үлесі зор екендігі даусыз.
Газетіміздің алдыңғы нөмірлерінде облыс орталығында бірнеше нысанның құрылысы басталғанымен хабардар еткен болатынбыз. Сол жұмыстар бүгінде жоспарға сай алға жылжып келеді. Осыған орай облыс әкімі Нұрлыбек Нәлібаев бірқатар әлеуметтік және өндірістік нысанды аралап, өңірдегі ең ауқымды құрылыстардың бағамын байқап қайтты.
Ең алдымен аймақ басшысы «Қорқыт ата» әуежайының инфрақұрылым мәселелері мен жаңадан салынатын терминалдың жобасы бойынша cала мамандарымен пікірлесті. Бұған дейін облыс әкімі демеушілерді тарта отырып, 70 млн. теңге қаражатқа әуежайдың ескі терминалын ішкі және сыртқы әрлеу жұмыстарын жүргізіліп, нәтижесінде әуежай алаңы жаңарып, ауласы тазаланып, қалыпқа келген болатын.
Жерлесіміз, меценат Болат Өтемұратовтың қоры өңірде халықаралық стандарттарға сай заманауи терминал салуға ниет білдірді. Бұған дейін де облыс әкімі Сыр еліне келген қор өкілдерімен екіжақты кездесулер өткізіп, ортақ жобаны пысықтап, талқылады. Қазіргі күні әуежай жылына 137 мың адамға қызмет көрсетсе, жаңа терминал қосылғаннан кейін шамамен 220 мың жолаушыны қабылдай алады. Ал, жүк тасымалдау көлемі 150 тоннадан 240 тоннаға дейін ұлғаяды. Құны 12 млрд. теңгені, алаңы 7500 шаршы метрді құрайтын әуежайда телескопиялық трап екіқабатты болады, ал жолаушыларға, оның ішінде қозғалыс қабілеті шектеулі азаматтарға ыңғайлы болу үшін эскалаторлар мен лифттер қарастырылмақ. Жылдам әрі жайлы қызмет көрсету өзін-өзі тіркеу бағандары мен жүктерді беру және өңдейтін автоматтандырылған жүйемен жабдықталады. Терминал 2024 жылы аяқталады деп жоспарланған.
Облыс әкімі әуежай өңірдің негізгі қақпасы және оның заманауи сипатқа ие болуы тиіс әрі халыққа қолайлы қызмет етуі қажет деді. Бұл ретте орынбасары М.Жайымбетовке, қала әкімі А.Шәменовке, жауапты басқарма және әуежай басшысына әуежайды күтіп ұстау және тазалығына ұдайы мән беруді жүктеді. Сондай-ақ, қор өкілдерімен бірге терминал құрылысына қажетті жұмысты үйлестіріп, уақытылы аяқтауды тапсырды. Мұнан бөлек, қаладағы кәсіпкерлік және әлеуметтік нысандардың қасбеттерін әрлеп, аумағын тазалау жұмыстарын міндеттеді.
Бұл бір. Екіншіден, әуежайдан бөлек Сыр абыройын әуелетіп отырған өнер орталықтары да өңір басшысының назарында. Нұрлыбек Нәлібаев Нартай Бекежанов атындағы Қызылорда облыстық музыкалық драма театрының жөндеу жұмыстарын да көріп, бақылап қайтты.
Өрелі өнер ордасы Сыр өңірінде 1960 жылдан бері жұмыс жасауда. Театр ғимараты ескіргендіктен жөндеуді қажет етті. Аймақ басшысының тікелей қолдауымен театрдың қасбетіне жөндеу жұмыстарын жүргізу басталды. Демеушілер есебінен ғимараттың ішкі жұмыстары да заманауи талапқа сай қайта жаңарады. Облыс әкімі киелі өнер шаңырағы қаланың басты мәдени нысаны болғандықтан, орынбасары Н.Сақтағановқа, жауапты басқарма басшысы мен мердігер компания өкіліне қысқа уақыт ішінде жөндеу жұмыстарын уақытылы әрі сапалы орындау қажет екенін еске салды. Сондай-ақ, театр аумағын таза әрі жинақы ұстауды тапсырды.
Осы тұста айта кетейік, облыс орталығында 1000 орынға арналған көпфункционалды Өнер орталығы салынуда. Құны 3,7 млрд. теңге екі қабатты өнер орталығының құрылысы шамамен келер жылдың соңында ел игілігіне берілмек.
Әрі қарай облыс әкімі шыны зауытындағы өндірісті іске қосуға дайындық барысын саралады. Аймақта өңдеу өнеркәсібін дамыту мақсатында құрылысы басталған зауыт қазан айының ішінде алғашқы өнімін шығарады деп жоспарлануда. Бұл ретте облыс әкімінің тапсырмасы негізінде осыған дейін арнайы штаб құрылды. Туындаған мәселелер шұғыл шешліп, инвесторларға көмек көрсетілді. Нәтижесінде өндіріске қажетті газ, су, электр желілері тартылып, теміржол тұйығын жеткізу құжаттары әзірленуде. Балқыту пеші қосылып, қазірдің өзінде 1450 градус температураға жетті.
Алдағы уақытта шыны зауытының айналасында жаңа өнім түрлерін шығаратын 8 ілеспе кәсіпорын ашу көзделді. Мұнда шыны-талшықты, композиттік материалдар, айна, смартфондармен планшеттерге арналған ультражұқа шыны жобалары да шығарыла бастайды. Өндірісте жергілікті шикізат Аралдың кварц құмы қолданылады. Облыс әкімі жұмыс процесін бақылап, орынбасары Серік Қожаниязовқа және шетелдік компания өкілдеріне өндіріс орнының алғашқы өнімін шығару жұмыстары іркіліссіз және уақытылы басталуы қажет екенін тапсырды.
Кез келген жас отбасы үшін үй салу, оны көркейту қаншалықты маңызды болса, тәуелсіз еліміз үшін де жаңа құрылыстардың көбеюі соншалықты маңызды деп түсінеміз. Мемлекеттің жыртық-тесігі міне, осылайша бүтінделетін болады. Демек, құрылыс саласының дамуы Қазақстан һәм Сыр елі үшін стратегиялық басымдықтардың біріне айналғанына жаңа деректер мен жанды мысалдар арқылы тағы бір көз жеткізгендейміз.
Халықтың тұрмыс-тіршілігінің деңгейін салынған құрылыс нысандарынан аңғару қиынға соқпайды. Бүгінде Қызылорда облысында бұл бағытта атқарылған шаруалар ауыз толтырып айтарлықтай. Бүгінде қаланың ауқымы ұлғайып, көріктене түскен. Кең көшелер, сәулетті нысандар, әсем үйлер қаланың көрікті мекенге айналарын дәлелдеп тұрғандай. Бұл аталған салаға мемлекет тарапынан жасалған жанашыр көзқарас, қазынадан бөлінген қомақты қаржы, өңір тізгінін ұстаған азаматтардың ұйымдастыру шараларының жемісі, құрылысшы қауымның төгілген терінің өтеуі екені даусыз.
Айдар Әділжанұлы
