Мүгедектігі бар жандар мәселесіне басшылар енді мойнын бұрды

Тағдыр тәлкегіне ұшыраса да, тауы шағылмаған түрлі тағдыр иелері қоғаммен бірге тіршілік етуде. Өмір өкпелеткен талай тағдыр иесімен жолымыз түйісіп, тілдестік. Сондағы тілектері «қоғамнан қолдау болса» дейді.

Қоғамнан қолдау күтетін жандардың талап-тілектері мен мәселелерін тыңдау үшін облыс әкімі Гүлшара Әбдіқалықова мүгедектігі бар жандардың орталықтарына арнайы барды. Алдымен аймақ басшысы А.Иманов көшесінде орналасқан «Қазақ соқырлар қоғамы» қоғамдық бірлестігінде болды. Мүгедектердің мүмкіндіктерін арттырып отырған орталық 2014 жылы грант ұтып, арнайы құрал-жабдықтарын сатып алған. Өз бастамаларымен 16 адамды қосымша жұмысқа тартқан. Ал, 30-ға тарта азаматқа қайта даярлау тігін курсын оқытып, сертификат табыстаған.

Қазіргі таңда орталықтың жанында ашылған оқу-өндірістік кәсіпорнында тігін цехы мен картон өңдеу цехы жұмыс жасауда. Мекеме төрағасының міндетін атқарушы Данияр Нұрымбетов облыс әкіміне кәсіпорындағы өндірістерді таныстырып, ғимаратты абаттандыру және қосымша құрылыс салу жұмыстарына қолдау көрсетуді сұрады.

Өз кезегінде Гүлшара Әбдіқалықова қаладағы бірқатар кәсіпкерлерге орталықтың шағын көлемдегі жөндеу жұмыстарына көмек көрсетуге ықпал жасау қажет екенін қаперге салды.

Әрі қарай аймақ басшысы «Қызылорда облыстық мүгедектер қоғамы» қоғамдық бірлестігі құрған орталыққа келді. Арнайы орталық мүгедектігі бар азаматтарға әлеуметтік қолдау көрсетіп, психологиялық тренингтер өткізіп, құқықтық кеңес береді. Мұнан бөлек, инва-СТО, арба жөндеуді үйрету және өзге де қызметтері де бар. Сондай-ақ, мұнда қолөнермен айналысып, төмен бағамен шаштараз қызметін ұсынып, маникюр жасайды.

Бірлестік төрағасы Сағатбек Сиюов орталықта жұмыс істейтін ерекше жандардың әрбір ісін таныстрып, бастамалы жұмыстарын тізбелеп берді.

–       Орталық бұрынғы емхананың орны болғаннан соң ішінде 15-ке жуық бөлме бар. Көмекке қолұшын созған қала жастары мен волонтерлері, түрлі әлеуметтік орталықтар мен облыстық жұмыспен қамту бөлімдерінің қызметкерлері қолұшын созып, өз күшімізбен орталыққа әктеу-сырлау жұмыстары мен тазалық жұмыстарын жүргіздік. Енді, бұдан бөлек, күшіміз келмейтін жұмыстар бар. Еденде ескі кафель болғаннан кейін, линолеум төсеп, электр энергиясы ашық-шашық, баяғы ескі күйінше болғаннан соң жаңадан жүргізуді жоспарлап отырмыз,– дейді ол.

Облыс әкімі талпынысы ерек жандардың жұмысын көріп, олардың табанды ісі мен дамуға деген ұмтылысы көптеген азаматтарға үлгі-өнеге екенін жеткізді. Сондай-ақ, олардың ұсыныс-негіздерін ескеріп, әрбір бастамаларына қолдау болатынын айтты.

Е.ЕРБОЛҰЛЫ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған