Сенаторлар Қазалы ауданында іссапарда болды

Қазыналы Қазалы – дамудың даңғыл жолындағы аудандардың бірі. Мұхтар Оразбаев басшылық ететін аудан орталығында, алыс-жақын елді мекендерде ел игілігі үшін жасалып жатқан жұмыс жетерлік. Биыл Әйтеке би кентінде 250 емделушіге арналып салынған емхана пайдалануға берілсе, 140 орындық балабақша алдағы уақытта жұмысын бастамақ. Сырдария өзенінің «Қарлан» учаскесінде темір бетон көпірінің де құрылысы бастау алып, ел игілігіне берілетін күн де алыс емес. Қазалы ауданына жұмыс сапарымен келген Қазақстан Республикасы Парламенті Сенатының депутаттары Мұрат Бақтиярұлы мен Ақмарал Әлназарова аталған оң бастамалармен танысты.

Сенаторлар алғаш Әйтеке би кентінде салынған емханада болды. Жаңадан қазалылықтардың қолданысына берілген ем қабылдау орны бір ауысымда 250, күніне 500 науқастың дертіне дауа бола алады. Жабдықталған құралдары да заман талабына сай, соңғы үлгідегі фиброгастроэндоскопия, ЛОР комбайн, электроэнфалография секілді медициналық аппараттармен қамтамасыз етілген емхана тұрғанда, Қазалы тұрғындары облыс орталығына сабылмайды. Қазірде орталықта 52 дәрігер, 120 орта буын қызметкер жұмыс істейді. Екінші кезекте Қазалы қаласында құрылысы бастау алған 140 орындық балабақша мен Сырдария өзенінің «Қарлан» учаскесіндегі темір бетон көпірінің құрылысымен танысты. Көпір аудан территориясында «Қазалы-Қожабақы-Бозкөл-Кәукей» автомобиль жолының 16 километрі Қарлан елді мекенінде салынбақ. 2021 жылдың 25 мамырында құрылыс жұмысын жобалау сметалық құжаттары әзірленді. Жобаның жалпы құны 4844,7 млн. теңге. Құрылыс нысанының жалпы ұзындығы 2,5 км деп жоспарлануда. Оның ішінде көпірдің ұзындығы 248,29 метр болса, 2,305 км ұзындықта кірме жол салынады. Бас аяғы мердігер компания 17 ай ішінде ІІІ автожол санатына жататын көпір құрылысын аяқтауға міндеттелген. Қазіргі таңда жобаның комиссия құрамының шешімімен үздік деп танылған «СтандартОйлКзо» ЖШС қызметкерлері құрылыс жұмысына қызу кірісіп кеткен. Ол жайлы құрылыс нысанының бригадирі Оңдасын Сырманов: «Бұл көпір аудандық маңызы бар жол болмақ. Дарияның арғы бетінде он беске жуық елді мекен бар, ол жақтың тұрғындары тезірек аяқтауымызды күтіп отыр. Сондықтан көпірді уақытылы тапсыруды мақсат етіп, барынша жауапкершілікпен жұмыс істеудеміз. Дәл қазір бұрғылау жұмыстары жүргізілуде. Бұйырса келер жылдың қазан айына дейін толық тапсыруды ойлап отырмыз»,-деді.

Сонымен қатар, сенаторлар егін алқабында болып, егіншілермен тілдесті. Сахи Татаев жетекшілік жасайтын егін тобы бес жылдан бері қара жерден нәпақасын теріп жеп жүрген адал еңбек иелері. Сәбіз, қызылша, картоп, қызанақ, қияр, қызыл бұрыш секілді бау-бақша өнімдерін егіп, жаз айының аяғы мен күз, қыс мезгілдерінде ішкі нарыққа саудалап отыр. Биылғы өнім көлемі де жақсы. Ол жайлы өз сөзінде егінші С.Татаев: «Биыл егін егуге қолайлы ауа райы болды. Сол себепті мол өнім аламыз деп жоспарлап отырмыз. Он күндей болды, өніміміздің алды пісіп, қияр мен помидор секілді көкөністер аудан тұрғындарына ұсынылды. Еңбек еткен жерде береке бар ғой, маңдай терімізді төгіп, еңбектің зейнетін көріп жүрміз. Ең бастысы, таза өнім ұсынып отырмыз»,- деді.

Аудан әкімі сенаторларға әлеуметтік маңызы бар азық-түлік тауарларының бағасын қалыпты нормада ұстап тұру үшін қабылданып жатқан шаралар легін баяндады. Биыл Қазалы ауданы бойынша 17402 га жерге ауыл шаруашылығы дақылдарын орналастыру межеленіп, қазірде жоспар 100% орындалған. Оның 2365 га жеріне бау-бақша өнімдері егілген. Нақты айтсақ, 330 га картоп, 970 көкөніс, 1064 бақша дақылдары егілген. Сонымен қатар мемлекет басшысының тапсырмаларын орындау және әлеуметтік маңызы бар азық-түлік тауарларының бағасын ұстап тұру бойынша қабылданып жатқан шаралар туралы кеңесте берген тапсырмасын жүзеге асыру мақсатында, облыс әкімі Н.Нәлібаевтың тапсырмасына сәйкес тағы да қосымша 114 га жер дайындалып, 30 га жерге картоп, 70 га жерге көкөніс, 14 га жерге бақша дақылдары егіліпті. Ауданда жеке егіншілердің де аяқалысы жаман емес. Биыл өңір басшысының әлеуметтік маңызы бар өнім тапшылығын тудырмау мақсатында берген тапсырмасы аясында Саркөл ауылдық округінен Түркіменбай Таубаев 7 га, Алға ауылдық округінен Келес Бұқарбай 2 га, Майдакөл ауылдық округінен 3 га жер алып, егін егуде.

Қазалы ауданы бойынша жұмыс сапарында депутаттар Жанкент ауылында болып, ондағы тұрғындармен кездесу өткізді. Әлеуметтік мәселелерге қатысты ойларын ашық білдіріп, ұсыныстарын тыңдады. Парламент деңгейінде аудан әлеуетін арттыру мақсатында көтеріліп жатқан мәселелер туралы сөз етті. Кездесу барысында жанкенттіктер әйелдердің зейнет жасын қысқарту жөніндегі ұсынысын айтып, ҚР Парламенті Сенатының депутаты Мұрат Бақтиярұлы қазірде заң жобасы қаралып жатқанын, жыл аяғына дейін өз шешімін табатынын жеткізді.

Іссапар барасында сенат депутаттары Мұрат Бақтиярұлы және Ақмарал Шәріпбайқызымен бірге аудан әкімі Мұхтар Оразбаев, аудандық мәслихат хатшысы Бақытжан Жарылқап, облыстық мәслихат депутаттары Мнажадин Өтеев, Ібайдулла Тілеп кездесулерге қатысып, көпшілік көкейіндегі сұрақтарға жауап берді.

Ш.ЖАЛҒАСБЕКҰЛЫ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған