Сапалы білім саналы буынның бойтұмары болмақ

Сыр өңірінде білім мен ғылым саласы домбыраның қос ішегіндей үйлесім тауып, үндесіп, бірізділігімен жолға қойылып келеді. Әсіресе, «Білімді ұлт» сапалы білім беру» ұлттық жобасы аясында атқарылған шаралар жемісін бере бастады. Атқарылып жатқан ауқымды, ілкімді істер де ел іргесін, білім бәсін биіктетіп келеді. Бүгін солардың бірсыпырасына көз жүгіртіп өтсек деп шештік. Себебі, биылғы білім басқармасының жеткен жетістіктері мен білім саласындағы жарқын жаңалықтары халықтың ыстық ықыласын алуда.

Білім бағдаршамы өмір жолына жасыл түсін жаққанда ғана елдің ертеңі жарқын болмақ. Ал, жампоз жастардың жағымды жаңалықтары мен өңірдің білім саласы өз салмағын тағы да саралай түсті.

Жеңістің тәтті жемісі

Ойлы оқушылар білім жеңісінің жемісін тата бастады. 2021-2022 оқу жылының қорытындысы бойынша облыс көлемінде 7506 оқушы мектеп бітіріп, олардың 6570-і ҰБТ-ға қатысқан еді. Тестілеу нәтижесімен жоғары оқу орындарына 5439 оқушы құжат тапсырып, 4082 талапкер мемлекеттік білім беру грантына қол жеткізді. Бұл көрсеткіш өткен оқу жылымен салыстырғанда грант иегерлерінің саны – 233 түлекке көбейіп отыр.

Гранттардың бөлінісі бірнеше басым бағыттарға қарай тағайындалды. Атап айтқанда, 1562 талапкер педагогика саласына грантқа түссе, медицина мамандығына 328, ауыл шаруашылығы және техникалық мамандықтарға 1500 оқушы грант иегері атанған. Айта кетейік, 2021-2022 оқу жылының қорытындысы бойынша «Алтын белгі» белгісін алған түлектердің 160-ы, яғни 41,1 %-ы педагогикалық бағыттағы мамандықтарға оқуға қабылданған.

Мектеп мәселесі мәжілісте

Облыстық білім басқармасының басшысы Мейрамбек Шермағанбеттің төрағалығымен қала, аудандық білім бөлімдерінің басшылары және облыстық мекеме басшыларымен кеңейтілген мәжіліс өтті.

Күн тәртібінде жаңа оқу жылына дайындық барысы, «Мектепке жол» акциясын ұйымдастыру, өз-өзіне қол жұмсау мен зорлық-зомбылықтың алдын алу, балалардың қауіпсіздігі және қылмыс пен құқық бұзушылықтың алдын алу шаралары қаралды. Сондай-ақ, мемлекеттік сатып алу, бюджеттік жоспарлау жұмыстары мен күрделі жөндеу, құрылыс жұмыстарының жүргізілу барысы туралы жайы талданды.

Жиында Мейрамбек Зинабдинұлы білім беру саласындағы индикаторлық көрсеткіштер мен жаңа оқу жылына дайындығын саралап, күн тәртібінде талқыға түскен мәселелерді жеке-жеке талдады. Отырыста облыстық білім басқармасының бөлім басшылары Нұрлан Дәулеталиев, Шолпан Жүнісова, Берік Мамбетов, Нұрлан Аймаханов пен Ернат Алпысбаев өз салалары бойынша атқарылған жұмыстар шеңберінде баяндама жасап, алдағы міндеттерге қатысты есеп берді.

Басқарма басшысы білім беру ұйымдарының сыртқы және ішкі тазалығын, балаларды оқулықтармен қамтамасыз ету, мамандарды жұмысқа қабылдауда сыбайлас жемқорлыққа жол бермеу, білім беру ұйымдары басшыларының ротациясы мен аттестациясын заңдылыққа сәйкес жүргізуді және жылу маусымына дайындық пен «Мектепке жол» акциясын тиянақты әрі уақытылы орындауды тапсырды. Сондай-ақ, өз-өзіне қол жұмсау мен зорлық-зомбылық, мемлекеттік сатып алу жұмыстары бойынша орын алған кемшіліктерге орай білім бөлімі басшыларына қателіктерге жол бермей, тапсырмалар уақытында орындалу керектігін еске салды.

«Мектепке жол» – мейірім материгі

«Мектепке жол» акциясы басталған уақыттан бері облыс бойынша 1601 балаға жалпы құны 18 млн. 953 мың теңге көлемінде материалдық көмек көрсетілген. Мемлекеттік мекемелер, шағын және орта кәсіп иелері, жауапкершілігі шектеулі серіктестер және демеушілер көмегімен балаларға оқуға ең қажетті – мектеп және спорттық костюмдер, кроссовкалар, сөмкелер және кеңсе тауарлары берілген. Ең бастысы, халықтың әлеуметтік қорғалмаған топтарындағы балаларды мектепке дайындауға ерекше көңіл бөлініпті.

– Бүгінде «Мектепке жол» акциясы жалғасуда. Барлық білім беру мекемелерінде микроаудандар бойынша балаларды тіркеу, есепке алу шаралары ұйымдастырылуда. Бүгінгі күнге дейін басқарманы сенім телефонына 3 мыңнан астам ата-ана тарапынан «Мектепке жол» акциясы жөнінде түсіндірме беру жөнінде хабарлама түсті,- дейді облыстық білім басқармасының бөлім басшысы Шолпан Жүнісова.

Айта кетейік, аталған акцияға «Қызылдихан» ШҚ, «БАҚ» ШҚ, «Ақжарма» ШҚ, «Сейфуллин Жер» шаруа қожалықтары, «Жан-Рос», Мереке» ательесі, «Ақжүрек», «Ел Арай» компаниялары демеушілік танытып көмек көрсеткен.

Алдағы уақытта «ПетроКазахстан Кумколь Ресорсиз» АҚ 100 оқушыға оқу құралын алып беруді, «Dalatex» ЖШС 400 балаға форма тігіп беруді жоспарлауда. Сондай-ақ, қаламыздағы А.Тоқмағамбетов мәдениет үйінің аумағында жергілікті тауар өндірушілердің қолынан шыққан мектеп формалары сатылуда. Бұл жәрмеңкелер 5 қыркүйекке дейін жалғасатын болады. Иә, қайырымдылықтың қайыры болатыны сөзсіз.

Сыр білімі басшылар бағамында

Қызылорда облысы әкімінің орынбасары Нұрымбет Сақтағанов, облыстық білім басқармасының басшысы Мейрамбек Шермағанбет жұмыс сапарымен Қармақшы, Жалағаш, Жаңақорған, Шиелі, Сырдария аудандарында болып, жаңа оқу жылына білім беру нысандарының дайындық барысын пысықтады.

Облыс әкімінің орынбасары мен басқарма басшысы Қармақшы ауданындағы күрделі жөндеу жүргізіліп жатқан №121, №85, №28 мектептеріне және 2017 жылы салынып, бүгінде іргетасы сөгілген №5 Айгөлек балабақшасына барып, құрылыс жұмыстарымен танысты. Мұнан соң Жалағаш ауданы, Таң ауылдық округіндегі №118 орта мектепке жүргізілген күрделі жөндеуді көріп, Ақтерек сауықтыру лагерін жөндеуден өткізу жайын талқылады. Сонымен қатар жаңадан салынған 200 орындық Оқушылар үйінің жұмысымен танысты.

Құрылысты жүйелі жүргізу, оны сапалы әрі дер кезінде аяқтауды қадағалау мақсатында облыс әкімінің орынбасары Жаңақорған ауданы, Ақүйік ауылдық округіндегі №55 орта мектептің күрделі жөндеу жұмыстарын көрді. Одан кейін кент орталығындағы «Маи бекеті» мен «Ипподром» мөлтек ауданындағы 300 орындық мектептердің құрылысы мен жаңа оқу жылында пайдалануға берілгелі жатқан №169 орта мектебінде болды.

Ары қарай жұмыс сапары Шиелі ауданында жалғасты. Онда Бидайкөл ауылындағы №148 орта мектеп ғимараты жылу қазандығын табиғи газға ауыстыру жұмыстарының барысы мен №46 А.С.Пушкин атындағы мектеп-лицейге қажетті қосымша 300 орындық қосымша ғимарат салу жұмыстарымен танысты. Сондай-ақ, №133 негізгі мектеп ғимаратының жағдайын көріп, 100 орындық жаңа мектептің құрылысын салу жөнінде тиісті ұсыныстарды жан-жақты зерделеп, қарау қажеттегін жеткізді. Мұнан соң Шиелі индустриалды-аграрлы колледжінің алдағы оқу жылына дайындығын, №155, №251 мектеп ғимараттарының шатырларын және ішінара шатырлары ұшып кеткен білім нысандарының төбе жабындыларын тез арада қалыпқа келтіру керектігін тапсырды.

Сонымен қатар Сырдария ауданындағы білім беру ұйымдарының жаңа оқу жылына дайындығын пысықтау мақсатында №126, №210, №132 мектептерін жай-күйін көріп, қыркүйек айына дейін жөндеу, тазарту жұмыстарын аяқтауды тапсырды.

Қалай десек те күн сайын құбылатын дәуірде білім саласын алақанда ұстап, жұдырықтай жұмылдырып отыру маңызды. Сонда ғана көш жүре түзелетін болады.

Айдар САЙЛАУОВ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған