Бюджеттік өтінімге оң көзбен қаралса, жол мәселесі шешіледі

Өткен жылдың басында, нақты айтқанда 2021 жылдың 3 қаңтарында, Арал ауданына қарасты Шөмішкөл ауылына барғанымызда көзімізбен көрген проблемаларды жіпке тізіп, әлеуметтік желіге жария еткенбіз. Кейін газетіміздің бетіне де жарияладық. Көп ұзамай Арал ауданы әкімдігі көтерген мәселеге орай жауап берді.

«Құрметті Нұрлан Көбегенұлы! Cіз айтып отырған 12 шақырымды құрайтын «Қызылжар-Шөмішкөл» аралығына жол салу үшін жобалаушы мекемемен өлшеу жұмыстары жүргізіліп, жөндеуді қажет ететін автожолдардың тізіміне енгізілді. Қазіргі таңда жоба-сметалық құжаттамалары әзірленіп, сараптама қорытындысы алынды. Осы жоба-сметалық құжаттамаға сәйкес, 2021-2022 жылдарға республикалық, облыстық бюджеттен қаржыландыру мақсатында тиісті салалық басқармаларға бюджеттік өтінім тапсырылып, нәтижесі күтілуде.

Ал, 23 шақырым болатын «Шөмішкөл-Бекарыстан би» автомобиль жолы аудан теңгеріміне алынғаннан кейін жоба-сметалық құжаттары әзірленіп, жөндеуді қажет ететін жолдардың тізіміне енгізілетін болады.

Ауданымыздағы автожолдарды жөндеуден өткізу кезең-кезеңімен жүргізілуде. Бұл жұмыс­тар үлкен көлемді қаржыны қажет ететіндіктен барлығын бірден шешу мүмкін болмауда.

Ұялы байланыс қызметіне келер болсақ, аудан бойынша «Ксеll» АҚ арқылы 14 елді мекенді ұялы байланыс желісімен қамту көзделген. Бүгінгі күні 11 елді мекенде байланыс желісі іске қосылса, қалған 3 елді мекенге ұялы байланыс қызметін орнату жоспарлануда. Олардың қатарында Шөмішкөл де бар. Бұл бағыттағы жұмыстар еліміздің көптеген өңірінде жүргізілуде, осыған орай кейбір жерлерде техникалық ақаулар орын алуда.  Осы ретте, орын алған кемшіліктерді қайта ретке келтіру және байланыс желісінің сапасын жоғарылату негізінде «Ксеll» АҚ-на ұсыныс берілді. Алдағы уақытта тиісті жұмыстар жүргізілетін болады. Аталған мәселелер аудан әкімдігінің бақылауын­да екендігін білдіреміз» депті.

Арада 1 жыл өткенде, яғни 2022 жылдың 3 қаңтарында «Жергілікті билік берген жауабына сай халықтың мұңына құлақ тосып, айтқан сөздерінде тұрып, берген уәделерін орындады ма?» деп, бір жылдан кейін көтерілген мәселеге орай Шөмішкөлге хабарласқанымызда, байланыс желісі жөнге келгенімен Қызылжар мен Шөмішкөлдің арасындағы жолдың мәселесі әлі шешімін таппағанын айтты.

Себебін білмекке Арал ауданы әкімдігіне хабарластық. «Қызылжар – Шөмішкөл, Қызылжар автожолы, Бекбауыл автожолдарының құрылысын жүргізуге қаржы сұратылып, облыстық басқармаға бюджеттік өтінім тапсырылды»,- деді Арал аудандық тұрғын үй, коммуналдық шаруашылығы бөлімі­нің басшысы Аманбай Тасқын­баев.

Арада бір жыл өтсе де, жауап сол күйінде. Былтыр «… тиісті салалық басқармаларға бюджеттік өтінім тапсырылса», биыл «облыс­тық басқармаға бюджеттік өтінім тапсырылыпты». Шүкір, «тапсырылып жатыр». Ауданнан сайланған депутаттар «тапсырылғанды» жылжытуға жұмыс жасаса дейміз ғой. Әйтпесе, қаржының қаралуын күтіп отыра беретін түріміз бар. Дегенмен үміт те жоқ емес. Ауыл тұрғындары «биыл жол мәселесінің шешілетініне уәде берді» деп, билікке кәдімгідей сеніп отыр. Шамасы, «Жаңа Қа­зақстанда бәрі жаңаша болады» деп, жаңа Үкіметке сенім артса керек.

Айтпақшы, өткен жылдың басында Қазақстан Республикасының Президенті Қасым-Жомарт Тоқаев: «Жаңа стандарттарға сәйкес 3500-ден астам ауылды жаңғыртамыз. Айналасындағы елді мекендердің тірегі саналатын әрбір ауылға баратын жолдар мен республикалық маңызы бар күре жолдар 100 пайыз жөнделеді» деп, сүйіншілеп еді. Бірақ Қызыл­орда облысында нәтиженің неше пайыз екенін біліп отырсыз. Енді биыл 3500-ден астам ауылдың ішінен Шөмішкөл қалып қоймаса екен дейміз. Ендеше аймақ басшысының құлағына алтын сырға тақтық.

Біздің айтарымыз, «Шөміш­көл-Бекарыстан би» автомобиль жолы биліктің сөзімен пайымдасақ, «бұл жұмыс үлкен көлемді қаржыны қажет ететіндіктен барлығын бірден шешу мүмкін болмауда». Дегенмен жоспарда бар екені көңілге үміт ұялатады. Әйтпесе өздері жауап бергендей, «аудан әкімдігінің бақылауында» болады ма?

Сонымен бірге биыл ауданда өзге ауылдардың да жол мәселесі шешімін тарқататын түрі бар. 2021 жылы Аманөткел – Жаңақұрылыс жолының құрылыс жұмыстары басталса, биыл қаржысы бөлініп, жалғасын табатын болады. «Сонымен қатар биыл Жаңақұрылыс – Бекарыстан би, Сазды елді мекенінің кіреберіс жолдарын және Хан елді мекеніндегі қалқымалы көпірді жөндеуге қаржы бөлініп, жұмыстар жүргізіледі. Ал, Бөген – Аманөткел, Бөген – Ақлақ бағытындағы жолдарды жөндеу биыл жалғасын табады деп күтілуде»,- деді Арал аудандық тұрғын үй, коммуналдық шаруашылығы бөлімінің басшысы Аманбай Тасқынбаев.

Біз не дейік? Жоспардағы жұмыстар жарты жолдан кері қайтпай, жүзеге асуын тілейміз. Егер жүзеге асса, жергілікті тұрғындар қолдарын жайып, батасын беруге әзір.

Н.Көбегенұлы

Пікір үстеу

Э-пошта мекенжайыңыз жарияланбайды. Міндетті өрістер * таңбаланған