Бұл күні бірлік берекенің бастауы болатындығы, ынтымақпен ырыстың артатындығы белгілі. Сондықтан көктем келісімен кетпенін дайындап, құрал-сайманын сайлап шығатын шаруалардың шашетектен болған жұмысы жәрмеңке уақытында жандана түседі. Егіннің ебін, істің көзін танығандардың еңбегі еленіп, тамшы тері ақталатын мезеті де – жәрмеңке. Сыр елінің жомарттығы бөлек. Ақжарма тілегін арнаған адамның алғысына риза болып, кең пейілділік көрсетіп, көсегесін көгертіп келеді. Бұл жолы да облысымыз жолынан жаңылмады. Облыс әкімдігінің ұйымдастыруымен 10-11 қыркүйек аралығында елордадағы «Тұран» даңғылының бойында орналасқан «Астана Арена» стадионының жанында ауыл шаруашылығы өнімдерінің жәрмеңкесі өтті. Екі күнге созылған жәрмеңкеде жұрт толастамай, қамбасына ұны мен дақылын, қоймасына күрішін тасыды. Асылында, жайылған жәрмеңкеге асығып келгенінен Сыр еліне деген сағынышы сезіліп және өнімге сұраныстың жоғары болғанын байқауға болады.
Әсте, тірлігіне бірлігі жарасқан елдің базары тарқайтын ба еді?! Таңмен таласып ша-тырын құрып бастайтын сырбойылықтар қара кешке дейін мәрттікпен міндетін мінсіз орындап, әр тұтынушыны жақынындай жылы жүзбен қарсы алып тұрды. Бұл көріністің бәрін жарияланған бейнежазбалардан аңғаруға болады.
Сағыныш сазын әуелетіп келген елорда тұрғындарының жанарына қуаныш, езуіне күлкі үйірілгені, жиналған жұрттың мәре-сәре күйде болуы тап бір тойдың атмосферасын сезіндірді. Оның үстіне, асыға күткен өнімдері көңілден шыққан соң қуаныштың еселенетіні тағы бар. Шірік те, құрт та түспеген дақылдың дымын қоймай тиеп, Аралдың сазан балықтарын санамай алып, Қазалының тәттілерін қап түбінен бастап толтыруы өнімге сұраныстың жоғары екенін сараптап берді. Аралдың балығы үшін кезек күткендер көп. Негізі қазақ халқы ежелден жоқшылықты жомарттықпен жойып, молшылық пен кең пейілдің үлгісін көрсете білген. Сондықтан тұрғындар Сыр елінің сақтап әкелген сыйын сыбағасындай қабылдады. Өзге қалалар өңіріміздің басты өнімі — күрішті қаптап алғызып, өздері жолдан күтіп алып жүретін. Бұл жолы мүмкіндікті қалт жібермей Сырдың күріші мен ет өнімдерін көпшілік таласа-тармаса сатып алды. Әсіресе, Қармақшы ауданының «Жаңажол» ЖШС-нің «Ақ маржан» күріші үлкен сұранысқа ие болып, ұсынылған 25 тонна күріштің 24 тоннасы жәрмеңкенің алғашқы күні-ақ сатылды. Қолдың құртын да тапсырыспен алдыратындар сүт өнімдеріне де қарық болып, айраны мен шұбатына, дәмі тіл үйіретін ірімшігін алуда іркілмеді.
— Сыр елінен Нұр-Сұлтан қаласына барған өнерпаздар әсем әндерден шашу шашып, елордалықтарға әсерлі көңіл-күй сыйлады. Сонымен қатар, облыс тарапынан қайырымдылық қоры аясында жағдайы төмен отбасыларға азық-түлік себеттері таратыл-ды. Жәрмеңкеде 70-ке жуық Сыр диқандары 50 жүк автокөлікпен жалпы құны 200 миллион теңгені құрайтын 500 тоннадан астам өнімдер елордалық тұрғындарға ұсынылды. Арқа төріндегі тұрғындарға Қызылорда облысының брендіне айналған аппақ күріш, балығы мен ас тұзы, қауыны мен қарбызы жеткізілді. Сырбойылықтар жәрмеңкеге 100 тонна күріш, 15 тонна ет және 30 тонна балық өнімдері, 80 тонна көкөніс пен жеміс-жидек, 210 тонна бақша өнімдері, 50 тонна асқабақ, 3 тонна ас тұзы, 10 тонна сүт өнімдері мен 5 тоннаға жуық кондитерлік өнімдерін ұсынды,- деді облыстық ауыл шаруашылығы және жер қатынастары басқармасының басшысы Талғат Дүйсебаев.
Сонымен, барша адамға шаттық шапағаты мен қуаныш сыйлаған жәрмеңке аяқталды.
— Ақ күріштің аймағы атанған сыралғы Сыр елінен керуен тартқан екі күндік жәрмеңкемізді Арқа төріндегі ағайын ыстық ықыласпен қарсы алды. Кетпені күнмен шағылысып, ала жаздай алғаусыз еңбек еткен шаруа биылғы жәрмеңкеге 500 тонна өнім апарды. Елорданың ел-жұрты Сырдың дәмін сағынғаны шығар, халықтың қарасы көп болды. Молшылық мерекесіне тілектестік танытқан елге сыйлы зиялы қауымның құрметін сезіндік. Сырдың ақмаржаны мен балығына деген сұраныс бірінші күннен-ақ байқалды. Бұл диқандарды ғана емес, жерлестерімізді де ерекше қуанышқа бөледі.
Еңбекті қадірлеп, бірлікке бас иген шаруаларымыз биыл судан таршылық көрмеді. Ел Президенті мен Үкіметтің қолдауымен су деңгейін арттыруға айрықша көңіл бөлінді. Соның нәтижесінде күріштің көлемін сақтап, әртараптандыруға басымдық беріп, жаңа дақылдар егуді қолға алдық.
Бейнеттен береке іздейтін кең қолтық, жомарт жандар жәрмеңке күндері әлеуметтік аз қамтылған отбасыларға азық-түлік себеттерін таратып, игілікті іске бірікті. Жәрмеңкенің жоғары деңгейде өтуіне атсалысқан кәсіпкерлерге, тілеулес ел ағаларына, өнерлі өнерпаздарға, жерлестеріме алғаусыз алғыс білдіремін. Сырдың несібесі молайып, берекесі арта берсін,- деп лебізін білдірді облыс әкімі Нұрлыбек Нәлібаев.
Замира ДАСТАНҚЫЗЫ
