Өрнектедім өміріме өр тұлғаңды

«Адамға ең бірінші білім емес, тәрбие берілуі керек,

тәрбиесіз берілген білім адамзаттың қас жауы,

ол келешекте оның барлық өміріне апат әкеледі»

Әл-Фараби

Еліміздің елдігі, халқымыздын ұлттық рухы ел президетінің ұлы тұлғасымен, қолбасшылығымен аты тарихта қалған Тұмар ханым, аты аңызға айналған Шығыстың қос шынары Әлия мен Мәншүк, күміс көмей әнші, Халық әртісі, Халық қаһарманы Роза, бертін келе ұлттық туындыларымен қазақ елінің өнерін, әдебиетін паш етіп жүрген Ғазиза Жұбанова мен Сәнімкүл Желдербаева апаларымыздың жасаған ерліктерімен тамырланған. Тарихы да, тәжірибесі де бай М.Мәметова атындағы Қызылорда педагогикалық жоғары колледжі 90 жылдан бері кәсіби сапалы мамандар даярлауда шыңдалған ұжым. Колледж ұжымы білім мен тәрбиені қатар ұстап жастарға білім беруде, олардың азаматтық белсенділіктерін, елжанды, отансүйгіш азамат болып тәрбиеленуде аянбай еңбек етіп келеді. Оның бір дәлелі «Музыкалық білім беру» мамандығы МБ-В-21 оқу тобының «Өрнектедім өміріме өр тұлғанды» атты тәрбие сағаты. Кеңес одағының батыры М.Мәметова мен күміс көмей әнші Роза Бағланованың 100 жылдығына, ҚазССР Мемлекеттік сыйлығының лауреаты, профессор, сазгер Ғазиза Жұбанова 95 жылдығына және жергілікті ақын, осы колледждің ардагер ұстазы С.Желдербаева 90 жылдығына арналған тәрбие сағаты жастарға ерекше дайындықпен өтті.

Қазақ қыздарының ерлігі мен өнері, өнегесі туралы баяндау, студенттердің туған жеріне, еліне деген сүйіспеншілігін арттыру, батырлардың ерлігін үлгі тұтып, өнерін насихаттау мақсатында өткізілген тәрбие сағатына топ студенттері үлкен жауапкершілікпен дайындалып, жоғары деңгейде өткізді. Тәрбие сағатын жүргізген Ескелді Нұржанов пен Мөлдір Елемесова және топ студенттері тәрбие сағатының тақырыбын аша білді.

1-жүргізуші: Ұлы Отан соғысы кезінде ерліктің өшпес даңқын шығарған, әлемде теңдесі жоқ батылдықтың үлгісін танытқан қазақтын маңдайға біткен жұлдызы – Мәншүк апамыз еді. Мәншүк рухына тағзым жасап, батыл бейнесіне қарап, күн сайын ой түзейміз, бой түзейміз. «Мәншүкке арнау» орындайтын Диас Тоқтарбай.

1-жүргізуші: Мәншүк 1922 жылы 2 қазан күні дүниеге келген. Шын есімі Мәнсия, анасының еркелетіп қойған есімі – Моншақ. 1941 жылдың мамыр-маусым айларында Мәншүк Мәскеуге баруға дайындалып жүр еді. Бірақ тұтқиылдан соғыс басталып кетті. Оның ендігі мақсаты мейірімсіз жаумен қолынан келгенше аянбай шайқасу. Он тоғызға шыққан нәзік қыздың бар бітімі жігер қайратқа толы еді.

Мәншүк. (Мөлдір) «Мен Өмірге ғашық едім. Соғыс менің жаңа ғана басталған жас ару, сұлу бойжеткен кезеніме тап келді. Айналам толы жігіт, көз қырын салғандар болмай қалған жоқ. Бірақ сезім жетегіне еріп, қан майданда ерік-жігерінен айырылатын мен емес. Бәлкім, алғашқы махаббатым да да сол бір соғыстын от-жалынында бүр жарған шығар».

«Қайда Мәншүк» әні. Орындайтындар «Дарын» триосы. «Батыр Мәншүк» әні. Орындайтын Ақбота Серікқызы

2-жүргізуші: Қазақ ән өнерінің дамуына өлшеусіз үлес қосқан Роза Бағлановаға биыл 100 жыл толып отыр. Әнші, КСРО және Қазақстанның Халық әртісі, Халық қаһарманы Роза Бағланова 1922 жылы 1 қаңтарда Қызылорда облысы Қазалы ауданында теміржолшылар отбасында дүниеге келген. 1941 жылы Қызылорда педагогикалық институтын бітірген. Оның шығармашылық жолы Ұлы Отан соғысы жылдары басталды. Өнер жолын Ташкент филармониясының ән-би ансамблінде әнші болып бастаған. Сол ансамбльмен ІІ дүниежүзілік соғыс жылдары майдан даласында өнер көрсетіп, жаралыларға жігер беріп, зұлым жауға қарса аттанатын ерлерге қуат берген. Оның орындауындағы «Кестелі орамал», «Ах, Самара, городок» әндері ел арасында ерекше танымал болды.

«Асыл арман» әні. Орындайтындар Айша Пазылбекова.

1-жүргізуші: Ғазиза Жұбанова – сазгер, Қазақстанның және КСРО-ның халық артисі, ҚазССР Мемлекеттік сыйлығының лауреаты. Профессор Жұбанова – өзін ұлағатты ұстаз ретінде танытқан тұлға. Оның шәкірттері Ермек Серкебаев, Төлеген Мұхамеджанов. Консерватория ректоры ретінде ол ұлттық кадрлар – музыкант-орындаушылар мен музыка танушылардың қалыптасуына ықпал етті. Олардың бірнешеуі әлемдік атаққа ие болды. Ғ.Жұбанованың музыкасы арқылы қазақ музыка мәдениеті басқа халықтарға белгілі болды.

Ғ.Жұбанова. Фортепианоға арналған пьеса. «Күй» орындайтын «Өнер» бөлімінің оқытушысы Э.Тасымбетова

Ғ.Жұбанова Романс орындайтын А.Бақытжанұлы, сүйемелдейтін «Өнер» бөлімінің оқытушысы Б.А.Маханова

1-жүргізуші: Бабалардың ақыл-ойы, бал тілі,

Болашаққа қазақ болып қал тірі.

Өзегімнен жарып шыққан өз тілім,

Өзгелердің неге керек алтыны?

Тірлігім де, бірлігім де өзіңде

Салт-дәстүрдің бәрі-бәрі сөзімде,

Ана тілім бас қаруым, құралым,

Сен арқылы өзге тілді ұғамын,- деп жырлаған ұстаз, ақын, ана Сәнімкүл Желдербаева биыл 90 жаста.

2-жүргізуші: С.Желдербаева 1932 жылы Қармақшы ауданы, Ақжар ауылында дүниеге келген. 1952 жылы Қызылорда педагогикалық институтының тіл–әдебиеті факультетін бітірген. 1952-53 жылдары Қарағанды облысының Қарсақпай ауданында 6-орта мектепте, 1953-54 жылдарда Қармақшы ауданында өзі оқыған №26 мектепте, 1959-1992 жылдар аралығында осы біздің М.Мәметова атындағы қыздар педагогикалық училищесінде ұстаздық етті. Зейнетке шыққаннан кейін 1992-1999 жылдар аралығында Қорқыт ата атындағы Қызылорда университетінің бастауыш оқыту кафедрасының аға оқытушысы болып қызмет атқарды. Екі ғасырдың куәсі болған Сәнімкүл апай өлеңдерінде ұлттық сипат басым болып келеді. Кезекті жыр шумақтарына береміз.

Диар, Роза, Қали, Мөлдір (Сәнімкүл өлеңдері оқылады)

1-жүргізуші: Ақынның «Ақ босаға» әні қазақ ұғымындағы ең бір нәзік салтты, келін түсіру сәтінің мән-мағынасын терең бейнеленген күйінде Қазақстанға түгел тарап, талантты ақын апамыздың атын аңызға айналдырып жіберді. Олай болса кезекті осы керемет әнге берейік. Ақынның сөзіне жазылған Рүстемовтің «Ақбосаға» әнін орындайтын Сәулет Қайып және Диас Тоқтарбай, қабыл алыңыздар.

2-жүргізуші: Ерлік пен елдіктің, абырой мен намыстың, ар мен жанның қалауы таразы басына түскен зұлмат шақта бойына қазақ аруларының тектілігі мен қайсарлығы бар ер мінезді апаларымыз теңдесі жоқ қаһармандықтың үлгісін танытып, есімі алтын әріппен жазылып, ел жанында мәңгі қалды. Еліміздің егемендігінің іргесін қалауда өзінің жанын құрбан етуге дейін барған адамдар қаншама?! Солардың бірегейі Ләззат Асанова және Сәбира  Мұхамеджанова.  Ләззат  пен Сәбира – бейбіт заманның қаһарман қыздары. Олардың есімі мәңгі жанымызда.

Р.Тайманов. «Мен қазақ қыздарына қайран қалам», орындайтын «Қыздар» триосы

1-жүргізуші: Біз үшін тәуелсіздік ұлтаралық үйлесім, татулық, халықаралық бейбітшілік. Бүгінгі XXI ғасыр Қазақстан үшін жасампаз ғасыр, жаңару ғасыры, дәуірлеу ғасыры, жастар ғасыры.

«Тәуелсіз Қазақтың қызымын» әні. Орындайтындар Айымжан, Ақбота, Мөлдір

«Көкпар» әні орындайтын Сәулет Қайып, Диас Тоқтарбай

2-жүргізуші: Кең байтақ, көз жетпейтін жерім менің,

Таулы орман, жасыл жайлау көлім менің,

Бүгінде бар әлемге даңқың жетті

Тәуелсіз Қазақстан – елім менің!

Е.Хасанғалиев. «Атамекен» әні. Орындайтын «Жалын»триосы.

2-жүргізуші: Бүгінгі ұрпақ – мәңгілік қазақтың перзенті.

Қорытынды: Атадан балаға, баладан немереге, немереден ұрпаққа жалғасып, дәстүр тазалығын сақтап келе жатқан бай мұрамызды, тарихымызды әрбір жастың есте сақтап өсуі – парыз. Елдіктің бір белгісі – өзінің өткен тарихына құрметпен қарап, тарихи тұлғаларды қастерлей білу. Осындай қазақтың мақтанышы ұлы тұлғаларымыздың мерейлі жасын халықаралық, республикалық, облыстық деңгейде атап өтіп отырғанда, қазақтың қыздарын ұлықтау, насихаттау мақсатында жастардың кішкене де болса қосқан үлесі деп ауыз толтырып атап өтуге болады. Еліміздің көк аспанында әрдайым бейбітшілік күні жарқырасын!

С.ЖАЙНАЗАРОВА,

М.Мәметова атындағы Қызылорда педагогикалық жоғары колледж оқытушысы

Пікір үстеу

Э-пошта мекенжайыңыз жарияланбайды. Міндетті өрістер * таңбаланған