Жаңажылдық шырша шамы не үшін жағылады?

Өткен жылы Жаңа жыл алдында орталық алаңға тігілген шырша ұзаққа бармады. Қаңтар оқиғасы кезінде көтерілісшілер өртеп жіберді. Бұл барлық облыс орталығында болған жағдай. «Содан кейін елімізде шырша қойылмайтын шығар» дегенбіз. Жорамалымыз теріс кетті. Биыл шыршаға дайындық өте қарқынды болды. Орталық алаңда жаңа шырша бой көтерді. Анау-мынау емес, биіктігі – 25 метр, ені – 11 метр. Оның шамын жағуды әкімдіктен бастап өте ықтиятты дайындық шаралары болып, ақыры әкімнен бастап депутаты бар, үлкен-кішісі бар, бәрі шыршаның айналасына жиналды.

«Шырша қою міндетті ме?» деген сауалды бір-бірімізге жылда қоямыз. Бірақ нақты жауапты ешкім айтқан емес. Биыл жаңа Қазақстанның имамы Нұрлан Байжігітұлы ашық пікірін білдірді.

– Бірінші, мынаны түсіну керек. Жаңа жыл – мемлекеттік мереке. Оны араластырып, дінге қосуға болмайды. Мәселен, Тәуелсіздік күнін алайық. Бұл да қанмен, термен келген мемлекеттік мерекеміз. Ал, шариғат бойынша Тәуелсіздік күні де, Республика күні де жоқ. Сонда бұл мерекелерді де тойламаймыз ба? Осылай ойлап, жабайы заманға апарудың қажеті жоқ. Бір ғана нәрсені айта кеткім келеді.

Аяз ата – ойдан шығарылған кейіпкер. Оның шын мәнінде дене шынықтырудан сабақ беретін мұғалім екенін, одан емес, құдайдан сұрау керектігін ұмытпасақ болды.

Содан соң шырша мәселесі бар. Негізі, шырша қойған дұрыс емес. Егер расымен орнына бір зат қойғыңыз келсе, декорация үшін сурет, портрет немесе қазаққа жақын өсімдік жусанды қойыңыз.

Ал, шайды 12-де емес, түнгі 11 жарымда ішем деушілерге де айтарым бар. Шайды қашан ішсең де маңызды емес. Егер 12-дегі Президенттің құттықтауын жіберіп алсаңыз, ертеңіне интернеттен көріп алыңыз. Түнгі 12-ден басқа уақытта да шай ішуге болады», – деді Нұрлан Байжігітұлы.

Бұл сөзге көбісі күлді. «Шырша өзіміздікі, құрамыз ба, өзіміз білеміз» деді. «Шыршада тұрған ештеңе жоқ» дегендер де табылды. Президент шыршасы жөнінде әзіл-шыны аралас «Президент те түсінсе болады ғой» деп пікір айтқанды да естідік.

Сонымен не болды? Айтылған сөз айтылған жерде қалды. «Молданың айтқанын істе, істегенін істеме» деген сөз кері кетті.

Не болса да, орталық алаңда құрылған шыршаға облыс әкімі Нұрлыбек Нәлібаев барды. Шырша жағу рәсіміне қатысты. Мерекелік шарада аймақ басшысы тұрғындарды Жаңа жыл мейрамымен құттықтап, өңір үшін биылғы жылдың табысты болғанын тілге тиек етіп, әр отбасыға бақ-береке тіледі. Облыстың бас шыршасын жағу мәртебесі өңіріміздің мақтаныштары облыстық және республикалық байқаулардың жеңімпазы Бақтыгүл Шаймұрат пен грек-рим күресінен ҚР-ның еңбегі сіңірген спорт шебері Айдос Сұлтанғалиға табыстады. Әрі қарай әдеттегідей мерекелік концертпен жалғасты.

Біздіңше, Жаңа жылды қуанышты көңіл күймен қарсы алған дұрыс. Ескі жылға өзінше есеп беріп, атқарылмай қалған жұмыстарды жаңа жылға жоспарлап, тілек айтқанның артықтығы жоқ.

Сыр елінде де сондай атмосфера болды. Жаңа жыл мерекесі қарсаңында облыс орталығында ауыл шаруашылығы өнімдерінің жәрмеңкесі ұйымдастырылып, 60 пәтердің кілті табысталды. Жыл соңына дейін бірқатар әлеуметтік нысан пайдалануға берілетіні де айтылып қалды. Ендеше, ағайын, Жаңа жыл құтты болсын! Елімізге тыныштық, бейбітшілік, әрбір отбасыға амандық, береке-бірлік, ырыс-ынтымақ тілейміз!

Н.Меңдібай

Пікір үстеу

Э-пошта мекенжайыңыз жарияланбайды. Міндетті өрістер * таңбаланған