Қазірде Қызылорда қаласындағы Қожа Ахмет Яссауи көшесін қайта жаңғырту және абаттандыру жұмыстары жүріп жатыр. Ә.Бөкейхан көшесінен Әйтеке би көшесіне дейінгі аумағын қайта жаңғыртуды мердігер мекеме «Қыран» ЖШС наурыз айында бастады, жоба құны – 3 млрд. теңге. Жоспар бойынша ұзындығы 3 шақырымға жуықтайтын көше 4 жолақтыға ауыстырылып, толығымен жарықтандырылады, арық қазылып, жаяу жүргіншілер жолы төселеді және жарықшамдары орнатылады.
Сонымен бірге көшені абаттандыру жұмыстарына 725 млн. теңге бөлінді. Мердігер мекеме «BSG Инжиниринг» ЖШС жұмысты жуық арада бастап, қараша айында аяқтамақ. Жоба бойынша теміржолдың екі бетіне тұрғындардың серуендеуіне ыңғайлы аллеялар, жаяу жүргіншілер жолы салынады, көшелер кеңейтіліп, көркейтіледі. Бұл көше пойыз жолын жағалай орналасқандықтан жолаушыларға қаланың көркі, тазалығы анық көрініп тұрады. Сондықтан көшенің әдемі әр таза болуы өзгелерде жақсы ой қалдыруы тиіс. Қызылорда қаласының әкімі Серік Қожаниязовтың бұл ойы қала тұрғындары үшін де жылы естіледі. Оның үстіне осы жұмыстарды атқаруда өзі бас болып облыс әкімімен бірге қадағалап жүр.
Тағы бір жағымды жаңалық, Қызылорда қаласының жол-көлік инфрақұрылымын дамытуға республикалық және облыстық бюджеттерге 28,3 млрд. теңгеге бюджеттік өтінім беріліп, оның 12 млрд. теңгесі қолдау тапты. Өткен жылы Қызылорда қаласында 11 млрд. теңгеге 82 шақырым болатын 267 көше жөндеуден өткен болатын.
Қарқынды құрылыс алаңына айналған Қызылорда қаласының сол жағалауы да ұмыт қалған емес. Жаңа автовокзал ғимаратының аумағына ағаш көшеттері отырғызылып, барлық ауданда елді мекендер көгалдандырылып жатыр. Сонымен қатар «Қорқыт ата» әуежайы және оған іргелес аумақта абаттандырылуда. Осы аумаққа 615 шаршы метр гранит жабыны, 16,2 шаршы метр асфальт, 4038 шаршы метр кеспетас және 3630 шаршы метр қиыршықтас төселетін болады. «Қызылорда қаласындағы әуежайдың іргелес аумағын абаттандыру құрылысы» жобасына 634050 млн. теңге бөлініп, 4 жолақты, ұзындығы 480 метр, әр жолақтың ені 3,5 метр болатын жол салынуда. Құрылыс-монтаждау жұмыстары осы айдың соңында аяқталмақ.
Қарап тұрсаңыз, қаланың келбеті ажарланып келеді. Қала тұрғындары жайлы әрі әсем шаһарда тұрып, өз өлкесін мақтанышпен айтатын күн алыс емес.Б.Санақұл
