1992 жылғы 23 маусымда Қазақстан Республикасының Жоғарғы Кеңесі «Қазақстан Республикасы Ішкі істер органдары туралы» заңды қабылдады және 2007 жылы 5 маусымда Мемлекет басшысының Жарлығымен 23 маусым – Полиция күні деп бекітілді.
Қазақстан полициясы күнінде осы жауапты қызметті жолға қоюдың басы-қасында болғандарға, ардагерлерге және бүгінде еңбек етіп жүргендерге ризашылық пен алғысын білдіреді. Сонымен қатар, бұл күн бейбіт уақытта қазақстандықтардың тыныштығы мен қауіпсіздігі үшін өз өмірлерін құрбан еткендерге құрмет көрсету күні болып саналады.
Расында, бейбіт өмірде тұрғындардың түн тыныштығын күзеткен полицейлерге елді құрметі ерекше. Осы күні егеменді елімізде Қазақстан полициясының іргетасын қалаған ардагерлерге құрмет көрсетіп, тыныштық пен азаматтардың қауіпсіздігін сақтауда жан қиған әріптестерді еске алады. Тәуелсіздік жылдары қызметтік міндеттерін атқару кезінде Қызылорда облысы Полиция департаменті бойынша 4 қызметкер қаза тапты. Олар милиция лейтенанты Есен Бектұрсынов, милиция капитаны Кеңесбек Әбішев, милиция сержанты Қайрат Қалеков және полиция аға лейтенанты Талғат Қозыбаев.
![](https://ustazmartebesi.kz/wp-content/uploads/2024/06/policiya-foto-2-1024x683.jpg)
«Бұл батырларымыздың жасаған өшпес ерліктері, жанқиярлық әрекеттері мен есімдері тек біздің ғана емес, барша халықтың жүрегінде сақталады деген үміттеміз. Ал, біз өз кезегінде Қызылорда облысының Жалағаш ауданындағы №124 орта мектебінде қызметтік міндеттерін атқару кезінде қаза тапқан полиция капитаны Кеңесбек Махметханұлының және Сырдария ауданындағы №131 орта мектебінде, 2003 жылы қызметтік міндеттерін атқару кезінде қаза тапқан полиция лейтенанты Талғат Есентайұлының құрметіне «Кадет сыныбы» және «Батылдық бұрышы» салтанатты түрде ашылды. «Кадет сыныбын» ашу өз жалғасын табуда.
Біз бүгін еңбек жолын ішкі істер органдарына арнап, бірнеше жас буынды тәрбиелеген ардақты ардагер ағаларымыз бен апаларымызға алғыс айтамыз» дейді Қызылорда облысы ПД бастығы, полиция генерал-майоры Махсудхан Аблазимов.
Қазірде полиция қатарында ерлермен бірге погон таққан 200-ден аса әйел қызметкер болса, оның ішінде 4-уі басшы лауазымында қызмет атқарады. Ел тыныштығы, тәуелсіз Қазақстанымыздың өркендеуіне өз үлестерін қосуда. Мемлекет басшысының «Жұртқа жақын полиция» қағидатын орындау аясында жұмыстарды жасап жатыр.
Полицейлердің кәсіби мерекесінде облыс әкімі Нұрлыбек Нәлібаев: «Ішкі істер органдары — қоғамдағы құқық тәртібін, азаматтардың қауіпсіздігін қамтамасыз ететін маңызды мемлекеттік құрылым. Мемлекет басшысы Қасым-Жомарт Кемелұлы Тоқаев «Полиция қызметкерлерінің жұмысы тәртіп пен қауіпсіздікті сақтауға байланысты, сол себепті халық сіздерге үміт артады»,- деп атап өтті.
Дамыған мемлекеттің тірегі – тәртіп, ережелер мен заңдылықтар сақталған қоғам. Тұрақтылық жолында тәуекелге бел буып, қызметтік парызын мүлтіксіз орындаған тәртіп сақшыларының еңбегі құрметке лайық. Отанымыздың өркендеуіне, тыныштығына бағытталған еңбектеріңіз жемісті де табысты болғай! Аспанымыз ашық, елімізде бейбітшілік болсын» деп құттықтап, жылы лебізін білдірді.
Қоғамдық тәртіпті сақтау, қылмысқа қарсы күрес, тұрғындарды қауіп-қатерден қорғау үшін Полиция департаментінің материалдық-техникалық жағдайының жақсаруына жергілікті атқарушы органдарының көмегі зор, полицияның жұмысына барынша қолдау көрсетіліп, оңтайлы жағдай жасалуда. Мереке қарсаңында облыс әкімдігінің қолдауымен жергілікті бюджет есебінен учаскелік полиция инспекторларына отандық су жаңа «Jac JS4» маркалы 18 бірлік қызметтік автокөліктері берілді. Бұл ретте барыс-келісі қиын шалғай ауылдардың учаскелік полиция инспекторларына басымдық берілді.
Облысымызда 262 учаскелік полиция инспекторы жұмыс істейді, оның 79 облыс орталығында. Жыл басынан олар 300-ге жуық қылмыстың бетін ашып, 21 мыңнан астам құқық бұзушылықты анықтады.
Жергілікті полиция қызметі басқармасының алаңында өткен шара барысында Қызылорда облысы Полиция департаментінің бастығы, полиция генерал-майоры Махсудхан Аблазимов учаскелік полиция инспекторларына жаңа жер талғамайтын автокөліктердің кілтін табыс етті. М.Нұғманұлы көліктерді тапсырып, өңірдегі қауіпсіздіктің артатынына сенім білдірді.
Барлық автокөліктер заманауи арнайы техникамен, бейнетіркегіштермен және аса қуатты көк, қызыл түсті жарық диодты қондырғымен және навигациялық жүйелермен жабдықталған.
«Бүгінде елімізде полицияның жұмысына барынша қолдау көрсетіліп, оңтайлы жағдай жасалуда. Жергілікті атқарушы органдардың көмегімен автопарк отандық жаңа көліктермен толықты, барлығы да «Jac» маркалы автокөліктер. Олардың барлығы ішкі істер органдарының негізгі буыны — халықпен тікелей жұмыс жасайтын учаскелік полиция инспекторларына берілді. Бұл ең алдымен өңіріміздің шалғай ауылдарындағы криминогендік жағдайды жақсартуға мүмкіндік береді.
Облысымызда бүгінгі күні қылмыс деңгейі айтарлықтай азайып, қазіргі уақытта өңірдегі криминогендік ахуал тұрақты. Осы тұрғыда полиция қызметкерлерін материалдық-техникалық жабдықтау – қылмыс санын азайтуға септігін тигізуде деп ойлаймыз» деді Полиция департаментінің бастығы Махсудхан Аблазимов.
Жаңа авокөліктермен учаскелік полиция инспекторларының қызмет атқару сапасы артып, құқық бұзушылықпен қылмысқа жол бермеуге, ел тыныштығын күзетіп, темірдей тәртіпті сақтап жүрген полицейлер қызметінің жеделдігін арттырып, облыстағы қоғамдық тәртіпті қамтамасыз етуге өз септігін тигізбек.
Ішкі істер министрлігінің бастауымен ішкі істер органдарын жаңғырту жөніндегі жол картасы қабылданып, оның шеңберінде қызметкерлердің әлеуметтік жағдайы да едәуір жақсарды, жалақысы көбейді, тұрғын үйді жалға алғаны үшін өтемақы алатын қызметкерлердің тізімі артты. Сол себептен полиция қызметкерлері антына адал, еліне адал қызмет атқаруы тиіс. Осы полиция күні мерекесі қарсаңында департамент бастығымен бірқатар іс-шаралар жоспары бекітіліп, орындалуда.
Мереке марапатсыз болмайды. Министрдің бұйрығымен кезектен тыс арнайы атаққа лайықтылар марапатталып, қызметте жоғары жетістіктерге жеткен мамандардың кеудесіне төсбелгілер тағылды. Одан бөлек, қоғамдық тәртіпті қадағалауға қажетті жұмыстарды ұйымдастырған мамандарға «Құқық тәртібін қамтамасыз етуге қосқан үлесі үшін», «Ішкі істер органдарының үздігі» төсбелгілері табысталды.
Департамент бастығы Махсудхан Нұғманұлының бұйрығымен 250-ден аса қызметкер және 60 ардагер марапатталды. Атаулы күні құттықтау сөзін арнаған департамент бастығы қоғам тыныштығы үшін бар күш-жігерлерін жұмсап жүрген полицейлердің жұмысына сәттілік тіледі.
Е.АСАН