Қазір мықты денсаулықтың кепілі мен бойға күш-қуат беретін негізгі дәрумен көзі – тамақ. Сондықтан азық-түлік қоры да азайып, тапшылықтың табы сезілмеуі тиіс. Егер қапшықтың түбі бос қалса, өнімдердің қымбаттап, яки тапшы болып қалатынын халық беске біледі. Оған жақында болған қант тапшылығы кезінде көзіміз әбден жеткен. Ойламаған жерден қанттың таусылып, бүкіл дүкеннің сөресінен сырғып кететінін кім білген? Қажеттісіне қапы қалмай қол жеткізгендер және құр қалып, кейінгі қымбатшылыққа ұрынғандар бар. Осылайша, шекермен шай ішу де бір мұң болды-ау. Хош. Сөзіміздің түп-төркіні тұрақтандыру қорында тақыр-тұқыр тапшылық бар ма екен? Әлде бұл мәселенің шешімі шегіне жетіп, тиісті келісімдер жүргізілді ме? Осы сауал төңірегінде әңгімені тарқатып көрелік.
Тұрақтандыру қорында тонналаған өнімдер бар екен. Облыстық бюджеттен бөлінген қаржыға әлеуметтік маңызы бар тауарлар сатып алынған. «Қазіргі таңда тұрақтандыру қорында барлық азық-түлік тауарлары жеткілікті. Бүгінде 85 тонна сәбіз және 50 тонна қырыққабат, 220 тонна өсімдік майы, 204 тонна қарақұмық жармасы, 204 тонна бірінші сортты ұн сатып алынды. Ұн бағасын тұрақтандыру үшін «Азық-түлік келісімшарт корпорациясы» ҰҚ АҚ мекемесімен арзандатылған бидай алуға меморандум жасалып, бірінші сортты бидай ұнын 125 теңгеден сатып алуға келісімшарт жасалды. Сонымен қатар Ы.Жақаев атындағы Қазақ күріш ғылыми зерттеу институтымен 50 тоннадан картоп, пияз, сәбіз, қырыққабатты сатып алуға меморандум жасалды» дейді тұрақтандыру қорының басқарма төрағасы Талғат Бекішов. Айналым схемасы бойынша әлеуметтік дүкендер мен бұрыштарда әлеуметтік маңызы бар тауарлардың 19 түрін қамтамасыз ету және белгіленген бағада сату үшін 21 кәсіпкерлік субьектісіне қаржылай қарыз берілген.
Азық-түліктің қоры жеткілікті болғандықтан, әлеуметтік дүкендерде аяқ астынан жоқшылық туындамауы және баға да шарықтап кетпеуі әрі «бәрі бар» деп, жалған ақпарат та берілмеуі тиіс. Өйткені, халық «нарықтағы бағадан төмен» дегенге басы ауырып, «арзан» дегенге сенбейтін болған. «Бәрі көзбояушылық» деп қапа болып, салғырттықтан сан соғып отырмауы керек. Сала мамандары өнім бағаларына күн сайын мониторинг жүргізу мақсатында жауапты қызметкерлермен тұрақты бақылау жасайтынын жеткізеді. Нәтижесінде, барлық әлеуметтік дүкендерде азық-түлік тауарларының белгіленген бағада сатылып жатқандығын айтады. Әрі өнімдерді әрбір отбасына жеткізу мақсатында тапшы тауарларға шектеу енгізілген. Мәселен, бір сатып алушыға тауық жұмыртқасы 20 дана, нан 4 дана, қант 2 кг, картоп 5 кг, сәбіз 2 кг, өсімдік майы 1 литрден беріледі.
Тағы бір айта кетерлігі, белгілі уақыттарда жәрмеңке жарнамасы жасалып, ауыл шаруашылығы өнімдері сатылады. Яғни, облыс әкімі бекіткен кестеге сәйкес тұрақтандыру қорының тауарлары 2021 жылдың қыркүйек-желтоқсан айларында ұйымдастырылған жәрмеңкелерде сатылды. Бұл жәрмеңке жалғасын тауып осы жылдың әр апта сайын жәрмеңкелер өткізілуде. Мәселен қаңтар айынан бастап 14 жәрмеңкке ұйымдастырылды.
Замира ДАСТАНҚЫЗЫ
