Қызылорда облысы Полиция департаменті бастығының міндетін атқарушы полиция полковнигі Ілияс Жұмағұлов облыс тұрғындары алдында есептік кездесу өткізді. Ілияс Байжұманұлы жыл басынан атқарылған жұмыстың нәтижесі сараланған есептік кездесу барысында тікелей эфирде тұрғындармен тілдесіп, олардың сұрақтары мен толғандырған мәселелері бойынша жауап берді.
Ілияс Байжұманұлы қылмыстық ахуал мен қылмыстық құқық бұзушылықтың алдын алу бағытындағы атқарылған жұмыс туралы айтып өтті. Облыс көлемінде қабылданған шаралар нәтижесінде қылмыс саны төмендеп, қылмыстық ахуалдың тұрақты екендігін сөз етті. Мәліметтерге көз салсақ, облыс көлемінде тіркелген қылмыстар саны 3 пайызға, оның ішінде, аса ауыр қылмыстар, ұрлық, мал ұрлығы, бұзақылық, интернет-алаяқтықтың саны азайыпты. Қоғамдық орындарда, көшеде, мас күйінде, қарумен жасалған қылмыстар азайдағанын айтты.
Тікелей эфир барысында өткен есеп беру кездесуі барысында Ілияс Байжұманұлы бүгінгі күні қоғамдағы өзекті мәселелердің бірі жасөспірімдер арасындағы қылмыстылыққа жіті тоқталып өтті. Ағымдағы жылы жастар арасында 42 қылмыс орын алып, 53 жасөспірім қылмыстық жауапкершілікке тартылған. Оның ішінде, 16 мектеп оқушысы, 32 колледж түнгі уақытта заңды өкілінсіз тұрғын-жайдан тыс жерде жүрген 4700 кәмелетке толмаған жастың заңды өкілдері әкімшілік жауапкершілікке тартылған.
Рейдтік шаралар барысында түнгі уақытта ойын-сауық мекемелерінде болуына жол берген 112 кәсіпкер, жасөспірімге алкоголь өнімін сатқаны үшін 9 сатушы анықталыпты. Полиция есебіне 101 жасөспірім, 112 қолайсыз отбасы алынған. Ілияс Байжұманұлы құқық бұзушылықтың алдын алу мақсатында «Жасөспірім», «Түнгі қаладағы балалар», «Бала – Заң — Қауіпсіздік» профилактикалық іс-шаралары мен «Мен және менің полицейім», «Абайлаңыз балалар» атты акциялары өткізіліп тұратынын айтты.
— Жасөспірімдердің қылмыс жасауына әсерін беретін факторлар – отбасындағы қолайсыз жағдай, тәрбиелік жұмысты аз жүргізу, сабаққа бармау, интернет желілерін дұрыс қолданбау және ата-аналар тарапынан бақылаудың әлсіздігі. Осы ретте қоғам болып, ата-ана, ұстаздармен бірлесіп, жас ұрпақ тәрбиесіне немқұрайлық танытпауымыз қажет. Тек бірлесіп қана еліміздің болашағының қауіпсіздігін қамтамасыз ете аламыз,- дейді Ілияс Жұмағұлов.
Азаматтардың сауалдарын, толғандырған мәселелерін мұқият зерделеп, түйткілді мәселелерін жақын арада шешуге тырысатынын жеткізген Ілияс Жұмағұлов тікелей эфир барысында полиция жұмысын жаңғырту, азаматтардың құқығын қорғайтын тәртіп сақшысының имиджін қалыптастыру, сонымен қатар, цифрландыру жөнінде айта келіп, тәртіп сақшылары мен халық арасындағы өзара іс-қимылды жандандыру полиция қызметінің ашықтығы мен тиімділігін арттыратынын алға тартты.
Онлайн режимде өткен есептік кездесу барысында тұрғындардың бірі белгілі бір аймақтарда жол белгілерін орнату, көші-қон заңнамасы бойынша, интернет-алаяқтық қылмыстарын болдырмау және алдын алу үшін нақты қандай шаралар қабылданғаны туралы толық мәлімет алғысы келсе, енді бірі полиция қызметкерлеріне алғысын білдіріп, қызметтеріне сәттілік тіледі.
Департамент бастығының міндетін атқарушы полиция полковнигі Ілияс Байжұманұлы тікелей эфир барысында түскен арыз-шағымдар мен сұрақтарды жіті назарға алып, жауапты мамандарға нақты тапсырмалар жүктеді. Барлық өтініштер Полиция департаменті басшылығының қатаң бақылауына алынғанын жеткізді.
Е.Ерболұлы
