Әкімдер де екі аяғы, екі қолы, қалқан құлағы бар адамдар. Олар да түс көреді. Наурыз айында оларды не күтіп тұрғанын білесіз бе? Ендеше оқыңыз.
Тоқты. Күшті болайын деп тұр. Тек жағымпаздана біліңіз. Өзіңізден биік шалқайған шенеуніктердің алдында еңкейіп, елпең-елпең қағып, етпетінен жата беріңіз. Бұл жолы тек сіздің түлкібұлаңға салынған епті қасиетіңіз аса қажет. Әйтпесе орныңыздан ығысып кетуіңіз мүмкін. Су сабындай жылпылдап, боққарындай былқылдап, «құлай» білсеңіз, емшек сұраған баладай қылқылдап, әлгі шікірейгендерден керегіңізді сұрай білсеңіз, армандап жүргеніңізге қолыңызды жеткізесіз. «Әкім қойдан да жуас» принципін есіңізге мықтап ұстаңыз.
Торпақ. Айтқаныңыздан қайтпаңыз. Бұқа болатын кезіңіз жетті. Қашанғы жер тепкілеп, «бұзаулардан» ақыңызды ала бересіз? «Баспаққа туған күн бұзауға да туатынын» есіңізден шығармаңыз. Олар да өседі, олар да бөседі. Сол кезде алдыңыздан шығады. Сондықтан күш-қайратыңызды төмендегілерге емес, мықты болсаңыз, жоғарыдағыларға жұмсаңыз. Бұл айда сіз үшін – сынақ мерзімі. Күшіңізді жұмсай білсеңіз, сынақтан сүрінбей өтесіз. Анау «көксоққан» тажалдың орнын жеңіп алуыңыз бек мүмкін.
Егіздер. Сіздің тағыңызға таласып жүрген біреу бар. Оны өзіңіз білесіз, күресіп те жүрсіз. Бірақ ылғи итжығыс түсесіз. Сондықтан «егізіңіздің» осал тұсын табу жақын арада жүзеге асқалы тұр. Ол үшін қарамағыңыздағы бір-екі адамның көзін жоюыңыз керек. Жансыздардың ізіне шам алып түсіп, шұңқырға құлата білсеңіз, жеңіс сіз жақта. Бірақ «ойынның жөні осы екен» деп, жүгенсіздікке барып жүрмеңіз, ойыныңыз осылып қалады.
Шаян. Жейтін нәрсеңізді ойланып барып жұтыңыз. Екі шоқып, айналаға бір қараңыз. Әйтпесе қақалып-шашалып қалуыңыз мүмкін. Сізді сыртыңыздан аңдып жүргендер көп. Әріптес шаяндардың шағып, жыныңызды қағып алуынан сақтаныңыз. Биені түгімен, түйені жүгімен жұтуды келесі жолға қалдырыңыз.
Арыстан. Көп ақырып, бақыра бермеңіз. Кешкілік жұмыс аяғында қалып, креслода шалқайып отырып, ішімдік ішуді доғарыңыз. Соңғы уақытта жүйкеңіз жұқарып жүр. Ішіп алсаңыз, орынбасарларыңыз бен бөлім бастықтарын жекпе-жекке шақырып, у-шу шығаратыныңыз өзіңізге мәлім. Оның аяғы түбі жақсылық әкелмейді. Сосын өзінен де биік лауазым иелерін менсінбейтін әдетіңізді тыйыңыз. Әйтпесе «арыстан айға шауып, мерт болыптының» кері келіп жүрер.
Бикеш. Бұл ай – сіз үшін қол шығатын шақ. Мәселе ақылда емес, әдемі әйелде, қылмыңдаған қызда. Бұл жолғы саунадағы «ойынға» бөлек «командалар» қатысады. Әрине, бұл – сіздің қоластыңыздағылардың сюрпризі. Сондықтан бұл «сыйлықты» жылы қабылдап, жымия беріңіз. Бірақ масайрап, мас болып, мазақ боп қалудан сақтаныңыз. Әсіресе, үйдегі сылқымыңыз біліп қойып, өткендегідей қайшы алып жүгіріп жүрмесін. Сақ болғайсыз.
Таразы. Өткеніңізге есеп беріп, жеп қойған кездеріңізді таразылайтын шақ туды. Өзіңізден үстем, үстіңізде тұрған дөкей күшіне мініп, «қаһарлы шешім шығарамын» деп қоқан-лоққы көрсете қойса, көп қорқа бермеңіз. Бұл әрекет оның жемсауының ортайғандығының белгісін танытқаны. Сондықтан кімге не беру керектігін елеп-екшеп барып жұмсаңыз. Қорыңызды бекерден-бекер шаша бермеңіз. Керек болады.
Сарышаян. Сіздікі қышып жүр. Жаман ойламаңыз, әңгіме алақан жайында. Өзіңіз тісіңізді қайрап жүрген Бытпылдық ауылдық округінің әкімі мен «Банкрот» серіктестігінің директоры айдың аяғында топ-томпақ алақаныңызға сарт еткізіп ақша салғалы тұр. Алақаныңыздың қышуы қанатын тұс осы. 10000 $-ға қанағат тұтып, әзірге ашуыңызды басыңыз. Көк қағаздың тақияңызға тар келмейтіні белгілі.
Мерген. Құралайды көзге атқан мықты болмасаңыз да, он метр жерден есектің құлағынан тигізетін өнеріңіздің бары рас. Мың жерден рұқсат етілмесе де, табиғат қорғаушылардың алдын ала дайындап, жем шашып қойған жеріне мылтығыңызды шошаңдатып жүгіре беретін әдетіңізден бұл жолы да арыла қоймайсыз. Соқтықпайтын жеріңіз жоқ. Іссапарға да жол түсіп тұр. Қолдан құжат жасап, іссапардың аяғын демалысқа айналдырыңыз. Сізді іздеп жатқан ешкім жоқ. Көңіліңізді көтеріп, демалып жүре беріңіз.
Тауешкі. Тұрақсыз әкімдердің қатарындасыз. Өзіңіз әкім боп, өзге жерде ел басқаруға тыраштанғаныңызбен, отбасыңыз басқа аймақта өмір сүріп жатқанын ұмытпаңыз. Қазір уақытты текке өткізіп, шошқа тағалап, періште боп жүрмегеніңіз белгілі. Алайда қазір екі кеменің құйрығын ұстап тұрсыз. Бірі – әкім деп сенім артқан жұртыңыз, екіншісі – отағасы деп сүйенген шаңырағыңыз. Сең бұзылып, суға кетпес үшін осы кезден бір жағына шығуға ұмтылыңыз. Біріншісінің қолдан келмейтінін о баста жақсы білгенсіз, сондықтан екіншісін ойланбай таңдап, тездетіп табаныңызды жалтыратыңыз. Әйтпесе кейін кеш болады.
Суқұйғыш. Сіз тума суайтсыз. Сөзіңіз сылдыр су екенін ұмытпаңыз. Әкімдіктің бұндай бір белгісі сіздің маңдайыңызға туғаннан жазылып қойған. Сондықтан қуанудан басқа реті жоқ. Сізді өзіңізден биік, одан да биіктегілердің сыйлайтыны, қадірлейтіні осы тума қасиетіңізден. Сіз бұл жолы да халқыңызға көп уәде бересіз. Жұмыссыздарға жұмыс тауып, тұрмысы төмен отбасыларға азық-түлік үлестіресіз. Жолды жөндеп, ауылдарды газбен толық қамтамасыз етесіз. Қылмыстың жолын кесіп, әйда, олай да бұлай есіп, бұлай да олай бөсіп, көпшілікті құр сөзбен тойдырасыз. Бұл айдағы шабытың жүз пайыздан асады. Сондықтан ешнәрседен қам жемеңіз.
Балықтар. Сізге қауіп төніп тұр. Өзіңізден төмендегілерді төмпештегеніңізбен Жайынның кең аузы жұтып жіберуі мүмкін. Тек бұл апаттан ашылып-шашылып қана құтыла аласыз. Әзірге Акула жоқ. Тек Жайынның аузын ала біліңіз. «Балық жеген ет сұрамайды» дегендей, Жайынның мұртшаларын майлап, желбезегін желпіп жіберсеңіз, Жайекең бақа-шаяндардың шуылдағандарын құлағына да ілмейді. Тек тоя біл, тойдыра біл.
Жорамалдаған К.Масин
