Өткен жылы Анаға тағзым және Отбасы орталығынан кейін Бейбарыс сұлтан көшесі бойынан салынып жатқан Өнер орталығы пайдалануға беріледі деген хабар шыққан еді. Алайда, жыл аяқталып, оның жай-күйі туралы ешкім айта қоймады. Ел ішінде сөз жатқан ба? Бірі «қаржы жетіспеушілігіне қатысты тоқтап тұр екен» десе, енді бірі «сахнасының дұрыс салынбауына байланысты қабылданбай жатыр екен» деген әңгіме шығарды. Жай-жапсарын өткен сенбіде облыс әкімі Нұрлыбек Нәлібаев Өнер орталығының құрылыс жұмыстарымен танысып, өз көзімен көрді.
Ресми таратылған мәліметтерге сенсек, қазір ғимараттың құрылыс-монтаждау жұмыстары 99% аяқталыпты. Іші әрленіп, сырланып, құрал-жабдықтары орнатылуда екен. Нысанның салтанатты ашылу рәсімі наурыз айында өткізілетін болыпты. Аймақ басшысы жаңа ғимаратты аралап, жұмысты тиянақты жүргізуді тапсырды.
Негізі 2022 жылдың қыркүйек айында Қызылордада 1000 келушіге арналған Өнер орталығының іргетасы қаланды. Құны 3,7 млрд. теңгені құрайтын екі қабатты сарайда симфониялық, эстрадалық және ұлттық өнер бағытындағы концерттік бағдарламалар, түрлі форматтағы қоғамдық іс-шаралар өткізілмек.
Былтыр көрермендерге концерттерді кәсіби әрі жанды дауыста ұсыну үшін симфония оркестрі құрылды. Ұжымның салтанатты тұсаукесер рәсімі жаңа орталықта өтетіні өнерсүйер қауымды қуантарлық жаңалық.
Ғимарат заманауи сәулет үлгісімен жобаланған, жаңа құрал-жабдықтармен қамтамасыз етілмек. Мың адамға арналған көрермен залы, үйірме бөлмелері жұмыс істейді. Алдағы уақытта жас жеткіншектердің бос уақытын тиімді өткізуіне арналған өнеге ордасы болмақ.
Айтпақшы, Өнер орталығына бұрын теміржолшылар клубында қызмет көрсеткен Қызылорда облыстық филармониясы орналасады. Клубтың халі өте төмен еді. Жылу жүйесі соңғы 15 жылдың көлемінде күрделі жөндеуден өтпеген, еденінің, электр желілерінің тозығы жеткен. Талай көрермен болып барғанда бұл жағдай сезілетін еді. Отыратын орындықтың өзі сықырлап, мазаны алатын. Ол ол ма, шатырына және іші-сыртына күрделі жөндеу жұмыстары жүргізілмеген, желдету жүйесі де қарастырылмаған. Сахналық құрылғылар техникалық қауіпсіздік талаптарына сай емес. Акустикалық тұрғыдан да осал әрі аумағы өте тар болатын. Осындай жерде сырбойылық өнерпаздар амалсыздан өнер көрсетіп, көрерменнің көңілін аулады. Енді Қызылорда облыстық филармониясы заманауи талаптарға сай және жаңа үлгідегі Өнер орталығына келіп, шабыттанатынына сенім білдіреміз.
Б.Санақұл
