Жастар – ел болашағының жарқын бейнесі. Көзінде жалыны сөнбеген, бойында ұлттық рухы семіп кетпеген өскелең ұрпақ барда алға ұмтылуға ешкім бөгет болмас. Сайып келгенде, мемлекеттің жастарды қолдауды күшейтуі, қолдау көрсетуі ертеңгі ел еңсесін тік ете түспек. Маңдайдан тамған ащы тердің тәтті жемісін тату үшін көп еңбектену керектігі даусыз. Ендеше ізденіс пен ізгіліктің ізін жалғап, тәлім мен тәжірибені тоғыстырып, санада салмақтанған дүниені сүзгіден сұрыптап өткізетін ойлы азаматтардың болғаны жақсы. Яғни, жас болса да бас болып, жастар саясатын жүргізуде саябырсымай, жауаптылық таныту, жүгіріп жүріп бәрін бақылауда ұстау қабілет пен көшбасшылық қасиетті талап етеді. Кішінің үлкеннің ісінен үлгі, сөзінен өнеге алатынын ескерсек, жастарды ұйымшылдықпен ұйыстыру үшін де көшбасшының ұстанымы нық болуы шарт. Оның үстіне еліктеушілік кең етек алған кезеңде жамандықтың жетегіне ермей, игілікті іспен айналысуға бағыт беретін басшылықтың бары да көңіл қуантады.
Жасөспірімге айқайлап ақыл айтпай, керісінше кемелдікпен екі жақты еркін пікірлесе отырып кеңес беру танымын арттырудың тиімді тетігі тәрізді. Осы ретте, А.С.Пушкин атындағы орталық кітапханада «Халық алғысы» медалінің және Ғ.Мұратбаев атындағы республикалық жастар сыйлығының иегері, облыстық Жастар ресурстық орталығының директоры Талғат Тілеспен «Көшбасшы жолы – жастарға өнеге» атты іс-шара өтті. Іс-шараның басты мақсаты – жастарды білімді, жан-жақты болуға баулу. Білуге, үйренуге деген қызығушылығын арттыру. Жарысуға, жарыста жеңімпаз болуға ұмтылуын дамыту. Көшбасшылық қабілеттерін ояту. Білімді, дарынды, озық болуға тәрбиелеу. Алтын қазынаның асыл мекеніне айналған кітапханада арнайы кездесуге сай кітап көрмесі де ұйымдастырылып, қос колледжден келген жастарға танымдық бағытта түсіндірме жүргізілді. Ал, жарқын жүздесудің тізгінін «Әлімсақ» журналының тілшісі Айдар Сайлауов ұстады. Алдымен жастар назарына Талғат Оспанұлының өмір жолына арналған бейнебаян ұсынылды. Сонымен қатар, Бексұлтан Орынбасар домбырамен терме орындап, жиылған жастар мен қонақтарды тебірентсе, Ысқақ Серік домбырамен күй тартып, Жамбыл Бақытәлі өз өлеңдерін оқыды.
Өзіне жауапкершілік жүгін жүктеп, абыройлы қызмет етіп келе жатқан Талғат Тілеспен кездесу жас буынға жақсы ықпал етті десек артық айтқандық емес. Өйткені, көбісі көкейдегі сұрақтарын қойып, нақты жауаптарын алды. Сөзі мен ісі сабақтасқан көшбасшының ойлары көпке үлгі болғаны анық. «Адамды адам еткен – кітап» демекші, өзі оқыған бірнеше кітаптарға тоқталып, тіпті бүгінгі өмір келбетімен келістіре отырып мысал айтып, қандай кітап оқуға болатыны жөнінде кеңес берді. Сонымен қатар, қарапайым қасиетімен қайран қалдырған басшы бәрінен де еңбектің маңызды екенін, еріншектің ертеңі бітпейтінін, жастарға жалқаулықтан қашық болу керектігін қаперге салды. Сонымен қатар, отбасындағы құндылықтарды да тілге тиек етіп, келелі кездесуге келген қыз-жігіттерге түйсікте сақталатындай түйінді ойларын айтты. Сондай-ақ, алдағы уақытта тың идеялары, берік бастамасы бар жастармен бірлесе отырып жұмыс істеуге қуана келісетіндігін, қолдау көрсетуге дайын екендігін жеткізді.
Әр сөзі даналықпен ұштасқан Талғат Оспанұлын ұйып тыңдаған жастар тағылымды шарадан біраз дүниені түйіп кеткені анық. «Алдыңғы жақсы артқы жасқа тәлім айтпаса, ел болғаның қайсы?!» деп М.Әуезов айтпақшы, көш ілгері жүрген ел азаматтары кейінгі жасқа жөн сілтеп, жол нұсқаса, шығар шың мен бағындырар белесіміз биік болмақ.
Замира АХМЕТ
