Жақында жаңа отауын құрып, шығармашылық қуатпен жұмысқа кіріскен Жастар театрында жаңа премьера өтті. Белгілі жазушы, қоғам қайраткері Төлен Әбдікұлының туындысының желісі бойынша театрдың белді әртісі, жас драматург Нұрдәулет Баймаханның «Оң қол» психологиялық драмасы қалың көрерменге жол тартты. Қойылымның режиссері Берік Ахмед. Көркемдік жетекшісі ҚР мәдениет қайраткері Оңталап Нұрмаханов.
Қойылым психиатриялық ауруханаға түскен 21 жастағы Алма туралы өрбіді. Сұлу бойжеткеннің сырқаты — жан түршігерліктей қорқынышты. Қыз қалың ұйқы құшағына кеткен шақта, оң қолы өзін қылқындырып өлтіруге әрекет жасайды. Дәрігерлер аурудан арылудың сан түрлі амалын жасағанмен, Алманың оң қолына бөгет бола алмайды. Ақырында Алманы емдеуші дәрігер «қолын алып тастау керек» деген шешімге келеді. Оқиға емханадағы Мұхтар, Айша есімді емделушілердің тағдырымен шиеленісіп, адам ағзасын сату, жемқорлық секілді қоғамдағы өзекті мәселелерді қозғайды. Сонымен қатар спектакльде өмірге деген құлшыныс, махаббат, қорқыныш пен зұлымдық сюжеттері шебер бейнеленеді. Жас әртістердің рольге беріле ойнауы көрерменді таң қалдырды.
Қойылым соңында Қызылорда қаласының әкімі Серік Салауатұлының Жастар театрының әртістеріне арналған ықылас гүлі табысталды. Қазақстанның еңбек сіңірген қайраткері, театр саласының майталманы Хұсейін Әмір-Темір, Қызылорда облысының мәдениет, архивтер және құжаттама басқармасы басшысының орынбасары Қуаныш Қуантқанұлы және Т.Жүргенов атындағы қоғамдық қордың төрағасы Сәпен Аңсатов қорытынды сөз сөйлеп, ұжымға сәттілік тіледі.
Б.Бағдатұлы
