«Аурудың емі – саудың сәлемі» деген нақылдың күші мен мәні жойылмақ емес. Себебі, денесін дерт дендеп, ауырған адамның көңілін сұрау, жылы сөзбен жұбаныш болу жанына демеу болғанмен бірдей. Сайып келгенде, сырқат жанның аман-саулығын білу сауапты іс екені сіз бен бізге мәлім. Қиналғанда қолқанат болып, қолдау білдіру, сауығып кетуіне тілектес болудың өзі қуарған жүзге өң беріп, аурумен күресте мықты болуға жігерлендіреді. Яғни, аппақ көңіл мен шуақты күн қалжыраған жанға қуат беріп, сәуле-нұр төгетіні даусыз. Осы ретте, Көрісу күніне орай облыс әкімінің орынбасары Нұрымбет Сақтағанов көпбейінді облыстық ауруханадағы науқас жандардың жағдайымен танысып, мерекемен құттықтады.
– Өздеріңізге белгілі, бұл күн қыс мезгілінен аман-есен шығып, адамзат баласының бір-бірімен қауышатын күні. Көрісу – жаңа жыл, жаңа өмір, жана күн. Бұл күнді Амал мерекесі деп те айтады. Бұл күні халық көктемге аяқ басып, туыс-туған, көрші-көлеммен жүздескеніне қуанып, қол алысып, төс қағысады. Бір-біріне деген араздық, өкпе-ренішті ұмытып, амандық тілейді. Ендеше әулеттің көпті көрген үлкеніне амандық-саулық тілеп, ізеттілікті дəріптейтін, алыстағы туған-туыспен көрісіп, татулыққа бастайтын халқымыздың ежелден келе жатқан мерекесі əр шаңыраққа құт-береке əкелсін,- деді Нұрымбет Аманұлы.
Береке мен бірліктің бейнесі іспетті, татулық пен жылылықтың жарқын үлгісіне айналған мерекеде құттықтау тілегін айтып, жағдай сұрасқан Нұрымбет Аманұлына емделушілер де алғысын білдірді. Қайткенмен де, риясыз сенім мен ыстық ықылас һәм жылы лебіз көбеңсіген көңілді көркем етпей ме?! Меңдеген ауру мезі еткен, жанарына жәудір мұң ұялаған кей жанның жүрегіне жарық төгіп, жүзіне күлкі үйіріп, мерекелік көңіл-күй сыйлайтыны ақиқат. Сондықтан кеңдік пен кішіпейілділік танытып құттықтау көпті қуанышқа кенелтетіні сөзсіз.
Айтулы мерекеде басшылық көңілге медет боларлық жақсы амал жасап, науқастардың халін біліп ғана қоймай, олар ем алатын орынның жағдайын барлап, бақылау жүргізді. Облыстық денсаулық сақтау басқармасы басшысының міндетін атқарушы Жангелді Мырзагелдіұлы мен медицина саласының ардагері Тұрғанбай Маханұлы аурухана мұражайымен қатар кардиохирургия, эндоваскулярлы хирургия, хирургия №1 бөлімше жұмыстарымен таныстырды. Атап айтар болсақ, кардиохирургия бөлімі 20 төсек орынға арналса, оның ішінде жүрек тамыр хирургиясы 10 төсек орынға, қан тамыр хирургиясы 10 төсек орынға арналған. Қазіргі таңда 26 науқас ем алуда. Эндоваскулярлы хирургия бөлімінде екі ангиограф орнатылған. Жылына 3752-4266 ота жасалады. Ал, хирургия №1 бөлімшесі 25 төсек орынға арналған, оның ішінде бет жақ хирургиясына 5 төсек орын бөлініп, бүгінде 19 науқас ем алуда.
Жалпы, көпбейінді облыстық ауруханасында 525 тәуліктік төсек орын қызмет көрсетеді. Оның ішінде 170 хирургиялық, 105 кардиология, 45 инсульттік, 95 реабилитациялық, 110 терапиялық бейінді. Сонымен қатар, 115 төсек орындық күндізгі стационар жыл бойына халыққа медициналық көмек көрсетуде.
Әр бөлімшенің жұмысына жеке-жеке тоқталып, көрсететін қызмет сапасына айрықша мән берілді. Мәселен, 2021 жылы 30 төсек орындық хирургиялық және терапиялық салаға арналған ақылы бөлім ашылған. Одан бөлек 2020 жылдың 1 шілдесінен бастап короновирусты инфекция індетін жұқтырған соматикалық патологиясы бар науқастарға арналған инфекциялық бөлімше қызмет атқарады. Өткен жылы аталған бөлімшенің төсек орын саны эпидахуалға байланысты 5 төсек орыннан 30 төсек орынға дейін өзгеріп отырса, жылдың аяғында 5 төсек-орын қызмет атқарды. Жалпы ауруханада 675 төсек орын бар.
Адамды айтып келмейтін аурудан айықтырып, өмір мен өлім арасындағы қыл көпірден сақтайтын облыстық ауруханада науқасқа ыңғайлы жағдай жасалған. Қажетті құрал-жабдықтармен толықтырылып отыратын медициналық мекемеде түрлі ота да жасалады. Бұл аурухана – өңірдегі үшінші деңгейдегі стационарлық көмек көрсететін жалғыз ұйым. Адам жанының арашысына айналған ақ халаттылардың біліктісі де осында. Жанын шүберекке түйіп жанұшыра келген науқасқа жылы шырай танытып, ажалмен арпалыста аман сақтап қалу үшін аянбайтын абзал дәрігерлердің еңбегі ерен. Мұнда дәрігерлердің 80 пайыздан астамы мен орта медицина қызметкерлерінің 60 пайызының біліктілік санаттары, 74 қызметкердің денсаулық сақтау үздігі, 2 дәрігердің медицина ғылымдарының кандидаты атағы бар.
Сондай-ақ, аурухананың медициналық мақсаттағы бұйымдармен жабдықталуы 95,78 пайызды құрайды. Өткен жылы тәулік бойы жұмыс істейтін стационарда 19534, күндізгі стационарда 5386 науқас емделді. Денсаулығы сыр бергеннің сырқатын емдеп жазамын деп зыр жүгіретін дәрігерлер кенеттен келетін қауіпті аурудан құтқару мақсатында түрлі тәуекелге барып, тіпті күрделі ота жасауға бел буатыны белгілі. Олқылыққа жол бермеуге тырысатын облыстық ауруханада да хирургия, жүрекке ашық ота жасау, эндоваскулярлық кардиохирургия, қан тамырлары хирургиясы, офтальмологиялық хирургия, травматология және ортопедия, гинекология, урология, нейрохирургия, жақ-бет хирургиясы және оториноларингология салаларында барлығы 10 мыңнан аса ота жасалады.
Замира Ахмет
