Оқушылар Сыр спартакиадасында бақ сынауда

Сапалы білім – заман талабы болса, спортты да – заман тынысы деп қарастыруға болады. Өмірдің шырағы саналған білімнің маңызды екені бесенеден белгілі. Демек, өскелең ұрпақтың өрелі болғаны қандай маңызды болса, олардың салауатты өмір салтын сақтап, дене шынықтыру мәдениетін қалыптастырғаны да тиімді. Әлбетте, дене жаттығуы баланы қимыл-қозғалыспен қатар ойлылылыққа да тәрбиелейді Сондықтан білімнің қара шаңырақтарында бәсекеге қабілетті жасты даярлау мақсатында жан-жақтылыққа тәрбиелеудің рөлі зор. Тіпті, шаралардың басымдығы білім мен спортқа бағытталса, нәтиже де оң болатыны сөзсіз.

Қалалық білім бөлімі әр баланы ынталандырып, оқу мен ғылымның жолына жөн сілтеп, тұрақты түрде шараларды жалғастыруын тоқтатпай келеді. Қызылорда қаласы бойынша білім бөлімі мен қалалық дене шынықтыру және спорт бөлімінің ұйымдастыруымен мектеп оқушылары арасындағы дәстүрлі спартакиада жарысы басталды. Спартакиаданың ашылу салтанатына қала әкімінің орынбасары Ақзира Бақтыбайқызы қатысып, өрендерге сәттілік тіледі.

Бүгінде бір бағытқа ғана байланып қалған бала жоқ. Байқау десе алыстан қашпаған білімпаздар спартакиада да сан түрлі спорттан сынға түседі. Яғни, оқушылар спартакиада барысында футбол, волейбол, баскетбол, үстел теннисі, шахмат, тоғызқұмалақ, асық ату, бес асық, гандбол сынды спорт түрлері бойынша жыл бойы бақ сынайтын болады. Оқушылардың спортқа деген қызығушылығы ерекше. Спортқа жақын балалардың қарым-қабілетін әрі қарай шыңдап, өрендердің бойына өнегені сіңіріп, білімділік пен білектілікті дарытып білікті етіп шығару. 28-29 қазан күндері спартакиаданың алғашқы  жарысы қыздар арасында волейболдан басталып, өзара мықтыны анықтады. Спартакиада оқу жылының соңына дейін жалғасатын болады.

Замира ДАСТАНҚЫЗЫ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған