Білім ордаларында бей-берекеттік пен бассыздық орын алмасы үшін бақылаудың күшейтіліп, бейнекамералардың орнатылғаны жөн. Әйтпегенде, мектепте орын алатын жаға ұстатын жағымсыз әрекеттер жоқ емес. Тетелес балалардың текетіресі немесе үлкен сынып оқушыларының өзінен кішіге зәбір көрсетуі сынды санаға сыйымсыз оқыс оқиғалар көбейсе, білім ошағына сын болар еді. Тіпті сын мен кемшілікті былай ысырып қойғанның өзінде баланың қауіпсіздігіне кім жауап бермек? Саулығына титімдей зақым келсе, баласының амандығын ойлап аласаұрған ата-ананы кім, қалай жұбатады? Жеткіншіктердің бір-біріне жұдырық ала жүгіріп, аяусыз соққыға жығуы қазір таңқалатын жағдай емес. Өйткені, осы тектес жаңалықтарды күнде естіп, күнде құлағдар болып отырсыз. Әрине, осы тұста ата-аналардың да алаңдауы орынды-ақ. Түптеп келгенде, кішкентай кикілжің үлкен дауға ұласып, екеуара ерегіс ессіздікпен аяқталуы ықтимал. Асылында, әрбір білім ұйымында оқыс оқиғаның алдын алу бойынша тиісті жұмыстардың жүргізілгені көңілдегі күмән мен күдікті сейілтетіні хақ.
Осы бір өзекті мәселеге қатысты облыс әкімінің орынбасары Нұрымбет Сақтағановтың төрағалығымен аймағымыздағы білім беру ұйымдарында қауіпсіздікті күшейту бойынша селекторлық мәжіліс отырысы өткізілді. Жиынға аудан әкімінің орынбасарлары, құқық қорғау органдарының өкілдері, білім, денсаулық сақтау саласының басшылары, мектеп және колледж директорлары, балабақша меңгерушілері қатысты. Күн тәртібінде білім беру ұйымдарындағы қауіпсіздік шараларын алдын алу, бейнебақылау мен дабыл түймелерімен толық қамтамасыз ету мәселелері қаралды.
Мәжілісте облыстық білім басқармасының басшысы М.Шермағанбет және полиция департаменті жергілікті полиция қызметі басқармасының бастығы Б.Ибраев білім беру ұйымдарындағы қауіпсіздігі бойынша баяндама жасаса, денсаулық сақтау басқармасы басшысының орынбасары М.Мирзанова мүмкіндігі шектеулі балаларды білім беру ұйымдарына жолдау мәселесіне тоқталды.
Облыс әкімі орынбасары Нұрымбет Аманұлы Президент тапсырмасына сәйкес, барлық білім беру ұйымдарының қауіпсіздігін жүз пайызға келтіру қажеттігін, білім нысанын инженерлік-техникалық жабдықталуын министрліктің №117 бұйрық талаптарына сәйкестендіру қажеттігін ерекше атап өтті.
Білім беру ұйымдарының қауіпсіздігінің алдын алу және оған жол бермеу мақсатында барлық білім беру ұйымдарында тоқсан сайын түсіндірмелік сабақтар ұйымдастыру, жасөспірімдердің білім нысандары аумақтарына әкелуге тыйым салынған заттарын алып өтуін қатаң бақылау, білім беру ұйымдарының қауіпсіздік жағдайына бірлесіп зерделеу жүргізу қажет. Сонымен қатар, денсаулық сақтау саласы бойынша мүдделі мекемелермен бірлесіп білім ұйымдарында білім алатын ерекше күтім қажет ететін, есепте тұратын балалармен тиісті шаралар қабылдау қажет,- деді облыс әкімінің орынбасары.
Замира ДАСТАНҚЫЗЫ
