Қоғамға қажетті негізгі салаларды назарға алып, оларды бірізді етіп қалыпқа түсіру үшін тиісті әрекеттердің тетігін таба білу керек. Сонда ғана жетекші салалар даму жолында тұраламай, тұрақты сипатқа ие болады. Қайткенмен де, дағдарыстың дағдыға айналғанынан гөрі ілкімді істерден ілгері басу байқалса, көпшілік көңілі де жай болмақ. Әсіресе, жоспарлардың жүйесі бұзылмай, қолдау табылса, жаңа жобалардың да тұсауы кесіліп, жалғасы жарқын, нәтижесі жемісті болатыны ақиқат. Өнімді болатын қайсыбір жобаға қаржы құю қуантпаса қапаландырмайтыны белгілі. Ал, жүйелі жұмыстардың қарқынды жүруіне қуат беретін инвесторларды тауып, бірлікпен бірлесе жұмыс істеу ел экономикасының дамуына оң әсер етпек.
Мемлекет деңгейіндегі жан-жақты қолдаудың және бірлескен жұмыстардың нәтижесі Сыр еліндегі тың жобалардан көрінеді. Ауқымды инвестициялардың тартылуы тіректі салаларда серпінді қадамдар жасауға мүмкіндік берді.
— Облысымыз 2022 жылдың қорытындысымен әлеуметтік-экономикалық дамудың макрокөрсеткіштері бойынша республика өңірлері арасында жоғары орындарға көтерілді. Өңдеу өнеркәсібінің көлемі 5,6 пайызға, ауыл шаруашылығының жалпы өнімі 1,8 пайызға, инвестициялар тарту 26,8 пайызға, пайдалануға берілген тұрғын үйлер көлемі 3,3 пайызға, құрылыс жұмыстарының көлемі 16,6 пайызға және сауда көлемі 2,3 пайызға артты.
Аймағымыз инвестиция тарту қарқыны бойынша республика көлемінде бірінші орынға шықты. Өткен жылы атқарылған шаралардың нәтижесінде инвестиция көлемі 2021 жылмен салыстырғанда 100,6 млрд. теңгеге артты,– деді облыс әкімі Н.Нәлібаев облыстық қоғамдық кеңес отырысында.
Еске салсақ, индустрияландыру бағытындағы құны 1 млрд. теңге болатын 5 жоба, биылға жоспарланған құны 13,4 млрд. теңгені құрайтын 9 жоба шикізатқа тәуелділіктен арылуға, экономиканы әртараптандыруға бағытталған.
Әрбір бастама өз берекесі мен нанымды нәтижесін беруде. Әлбетте, бұл да еңбектің еш кетпегенін, жобалардың өміршең болатындығын білдіретіндей. Айта кетсек, «Акса энерджи» түрік компаниясымен бірлесіп жылу электр орталығы іргетасының қалануы, «Коч Холдинг» компаниясымен Жаңақорған ауданында «Қызылорда – Агроплюс» серіктестігінің томат пастасын өндіру жобасы, «TAT» компаниясымен бірлесіп, тамшылатып суару әдісімен 10 гектар жерге тәжірибелік қызанақ тұқымы егіліп, жаңа өнім жиналуы – шетелдік инвесторларды тарту бойынша жүргізілген жүйелі жұмыстардың нәтижесі.
Шыны зауыты жанынан құны 100 млрд. теңге болатын 8 ілеспе кәсіпорын құру жоспарланып, төртеуі бойынша жобалау жұмыстары басталса, қалған жобаларға инвестор іздестірілуде.
З.Ахмет
