Отбасы – сыйластыққа, махаббатқа құрылған шағын мемлекет. Сол шағын мемлекеттің тыныштығы мен берекесін келтіретін жүректері жылулыққа толған қос адам. Екі жартының бір бүтін болып, сезімдерімен серттесіп, баянды ғұмыр кешуі кез-келген адамның арманы. Перзенттеріне тәрбие, пайдалы ілім беріп, қоғамның еңселі тұлғасына айналдыру – ата-ананың парызы. Мейірімге толы отбасыдан ғана адамгершілігін бойына жинаған, жүзінен нұр төгілетін сәбилер дүниеге келеді. Қазақ халқы отбасының берік болуы үшін барын салған десек болады. Себебі, тарихтан зиялы тұлғалардың асыл жарларының адал сезімдері, қазақ аналарының оқиғалары соны көрсетеді.
Осы ретте халықаралық отбасы күніне орай облыстық қоғамдық даму басқармасының ұйымдастыруымен «Зияткер отбасы» отбасылық интеллектуалды сайысы өтті. Сайысқа аранайы қатысып, барша қатысушыларды облыстық қоғамдық даму басқармасының басшысы Алмасбек Есмаханов құттықтап, ақжарма тілегін білдірді. Мемлекет іргетасының берік болуы үшін отбасы институтын қолдау мемлекеттік саясаттың басым бағыттарының бірі екендігін, сонымен қатар ұлттық құндылықтарды жаңғыртудың маңыздылығына Алмасбек Әбілқасымұлы тоқталып өтті.
Өңірімізде атқарылып жатқан жобалардың арқасында, халықтың жайлы тұрмыс кешуіне бағытталған игі шаралардың нәтижесінде аймағымызда демографиялық көрсеткіш артып, жас отбасылар қатары көбеюде. Қазіргі таңда Сыр елінде 17 мыңға жуық алтын құрсақты аналарымыз «Алтын алқа» мен «Күміс алқа» иегерлері атанған.
Әйелдер істері және отбасылық демографиялық саясат жөніндегі комиссия хатшысы Қ.Каримова, облыстық маслихат депутаты А.Әбибуллаева, «Батыр ана» қоғамдық бірлестігінің төрағасы Г.Әбдіхалықова, «Ақ босаға» қоғамдық бірлестігі төрайымының орынбасары З.Тәжиева, «Мерейлі отбасы – 2021» ұлттық конкурсының қалалық кезеңінің 1 орын иегерлері Қожабековтер отбасы, облыс әкімі жанындағы әйелдер істері және отбасылық-демографиялық саясат жөніндегі комиссия мүшелері мен ҮЕҰ-нің өкілдері, жастар ұйымдарының мүшелері мен БАҚ өкілдері білімді, коммуникативті, ізденгіш, тапқыр тұлғаларды даралап, отбасы құндылықтарын дәріптеуді, отбасылық тәрбие, ата-ана мен бала арасындағы қарым-қатынасты нығайтуға бағытталған жобаға қатысты.
5 кезеңнен тұратын додаға 7 команда қатысып, өзара бақ сынасты. Білімділігімен ерекшеленіп, озық болып, сайыста үздік болған Байұловтар отбасы І орынды иеленді. Оспановтар әулеті ІІ орын, Байжігітовтер әулеті ІІІ орынды қанжығасына байлады. Сайыстағы арнайы номинацияларды Исабаевтар әулеті «Көңілді отбасы», Супатаевтар жанұясы «Шығармашыл отбасы», Әбілхановтар отбасы «Креативті отбасы» жән Бисембаевтар әулеті «Дарынды отбасы» номинациясын иеленді. Жеңімпаздарға, қатысушыларға диплом, сыйлықтар табысталды.
Сайыс қонақтардың көңілінен шығып, қатысушы отбасылар керемет көңіл-күйде тарқасты. Берекелі әулеттің бастарынан бақ кетпей, сыйластыққа құрылған отбасының соңы тек бақытпен аяқталары да анық. Сыр шаһарында қазақы тәрбиеге төселген, салт-дәстүрімізді сақтайтын отбасыларды тұрғындарға таныстыру парызымыз. Өткізілген сайыс барша жас отбасыларға үлгі болып, сайысқа қатыспаса да, адамдардың өз отбасына деген көзқарасын өзгертуге ықпалы зор. Шаңырақтың берекесін сақтау әр адамның өзіне байланысты екендігін түсінсек, жұрт мақтаған әулетке айналу бір сәтте.
Қазақбай ӘНДЕШ
