Білімді ұрпақ – қоғамды алға сүйрейтін үлкен күш иелері. «Білімдіге дүние жарық, білімсіздің күні ғаріп» дегендей, бала санасына білім нәрін құйып, интеллектуалды ұрпақ тәрбиелеу – қазіргі білім ордаларының міндеті. Оқушылардың мектепте толыққанды жағдаймен қамтылуы, сапалы білім алу жергілікті білім саласының басшыларының бақылауында. Қызылорда қаласындағы мектептерінің аяқ-алысы, жеткен жетістіктері, білім беру бағытындағы ерекшеліктері өткізілген педагогикалық кеңесте сөз болды.
Қала мектептерінің жұмысы сараптан өтті
Мектеп – кез-келген болашақ дарынды маманның іргетасын қалайтын мекен. Мектептің білім беру жүйесі заман талабына сай болып, оқушылардың сапалы білім алуына жағдай жасау деңгейі жоғарылады.
Мемлекет басшысы Қасым-Жомарт Кемелұлы Тоқаев кезекті жолдауында: «Орта білімнің сапасы – табысты ұлт болудың тағы бір маңызды шарты. Әрбір оқушының білім алып, жан-жақты дамуы үшін қолайлы жағдай жасалуға тиіс. Сол үшін «Жайлы мектеп» ұлттық жобасы қолға алынды. Біз 2025 жылға дейін 800 мың баланың заманауи мектепте оқуына жағдай жасаймыз. Осылайша апатты жағдайдағы және үш ауысыммен оқитын мектеп мәселесін толық шешеміз. Бұл ауыл және қала мектептерінің айырмашылығын едәуір азайтады»,- деген болатын. Мемлекет басшысының жолдауынан кейін еліміздің барлық өңірінде мектептердің мәселесіне ден қойылды. Қызылорда қаласындағы білім ордаларының көштің алдында жүріп, білімді оқушылардың республикада есімдерінің айтылуы – білікті ұстаздар жетістігінің көрсеткіші.
Қызылорда қаласы бойынша білім бөлімінің басшысы Ерлан Теңізбайұлы Боданов пен қалалық кәсіподақ комитетінің төрағасы Орынша Міржақыпқызы және қалалық білім бөлімінің мамандары кезектен тыс педагогикалық кеңесті Әли Мүсілімов атындағы №101 мектеп-лицей ұжымымен өткізді.
Мектеп-лицей 2022-2023 оқу жылында мектепте 94 сынып комплектісі бойынша 2307 оқушы үш ауысымда білім алуда. Өткен жылы атқарылған жұмыстар туралы, мектептің даму жоспары жайлы мектеп директоры Айгүл Алтынбекқызы хабардар етіп, баяндама жасады.
Кез келген мектеп заман талабына сай жасақталып, білім беру жұмыстарына көңіл бөлсе, топ жарары анық. Осыған байланысты жиында мектеп-лицейдің жалпы білім беретін пәндер бойынша қалалық, облыстық олимпиададағы жетістіктері, ғылыми жобаларда жеткен табыстары, оқушылар мен ұстаздардың шығармашылық жетістіктері айтылды. Мектептің абыройын халықаралық, республика деңгейде көтеріп жүрген шәкірттер туралы да сөз етілді.
Әли Мүсілімов атындағы №101 мектеп-лицейінде салынып жатқан 375 орындық бастауыш сыныпқа арналған құрылыс жұмыстары аяқталуға жақын. Оқушылардың тығыз отырып білім алуы, мектептің шағын болғаны себепті мәселелер оң шешімін тауып, оқушылардың заманауи ғимаратқа кіріп, білім алатын күнге де жақын қалды.
Ұжымға барып, мектептің жаңалықтарынан хабардар болған Ерлан Теңізбайұлының ұстаздармен кері байланыс орнатуы алдағы уақытта да бірліктің алға жетелейтіндігін, жұмыла жасаған істердің жетістікке жеткізетіндігін көрсетеді.
№253 орта мектебінде де кезектен тыс педагогикалық кеңес өтті. Кеңеске қатысқан бөлім басшысы Ерлан Теңізбайұлы: «Мектеп балалардың білім алатын қасиетті ордасы, оқушыларға мектеп ішінде толықтай жағдай жасалуы керек, ұстаздардың сағаты дұрыс бөлінуі шарт» деді.
Мектеп директоры Зейнулла Мырзаханұлы мектепте атқарылып жатқан жұмыстарға тоқталып, білім ордасының даму жоспары жайында баяндама жасады. Мектеп директоры мектеп оқушылары мен мұғалімдер түрлі сайыстарға, байқауларға қатыстырылып, жүлделі орындарға ие болғанын баяндады.
«Республикалық пәндік олимпиадаларға қатысқан 6 оқушы жүлделі орынға ие болды. Ал, қалалық кезеңге 29 оқушы қатысып, 6 оқушы жүлдегер атанды», – деді мектеп директоры.
Жиыннан соң мектепішілік жағдайлар талқыланып, кері байланыс орнатылды. Білім бөлімінің басшысы мектепте ешқандай қиындықтар болмай, оқушының білім алуына толықтай жағдай жасалу керектігін ескертті. Ұстаздардың жұмысына сәттілік тілеп, шәкірттердің жетістіктері көп болуына тілекші екендігін де айтып өтті.
Білім бөлімінің басшысы Ә.Тыныбаев атындағы №11 мектеп-лицей ұжымымен де кездесті. Жиында мектеп директоры Ғани Қамбарұлы жұмыстарға тоқталып, мектеп туралы баяндама жасады. Ә.Тыныбаев атындағы №11 мектеп-лицейде 2232 оқушы және 5 мектеп алды даярлық тобында 105 оқушы оқып, тәрбиеленуде. Мектептің пәндік олимпиадалық командасы биылғы жылы қала көлемінде «Ең үздік команда» ретінде көш басында келеді. Жыл көлемінде ұстаздары қалалық деңгейде өткізілген түрлі кәсіби конкурстарға қатысып, 7 мұғалім жүлдегер атанған. Оқушылардың бос уақытын тиімді пайдаланып, спортты дамыту мақсатында соңғы үлгідегі екі спорт алаңы оқушыларға пайдалануға берілген. Жиын соңында білім бөлімінің басшысы өз ұсыныстарын айтып, атқару керек тапсырмалар берді.
IT мектеп бәсекеге қабілетті оқушыларды шығарады
Мемлекеттің бет-бейнесі білім саласында аянбай тер төгіп жүрген мамандар, білімді ұрпақ екендігі даусыз. Білім саласында IT мектептерінің үлесі жоғары. Әлем жаңашылдыққа ұмтылған технократ ғалымдарға құрметпен қарайды. Еліміз әлемдік арнада бой көрсетуі үшін, болашаққа қажетті білімді ұрпақты даярлауды қолға алды. IT жоғары оқу орындарынан бөлек, IT мектептері де балаларға лайықты білім беріп жүр.
Осы орайда Қызылорда қаласы бойынша білім бөлімінің басшысы Ерлан Теңізбайұлы І.Қабылов атындағы №12 IT мектеп-лицейіне барып, ұжымымен кезектен тыс педагогикалық кеңес өткізді. Білім бөлімінің басшысы мектептің жай-күйімен танысып, оқушыларға жайлы жағдай жасау керектігін, мұғалімдердің сағат бөлінісін дұрыс бөлінуін қатаң ескертті. Оқушылардың білімді, өнерлі болып өсуі білікті ұстазға байланысты екендігін де тілге тиек етті.
Мектеп директоры Жадыра Садыққызы өз кезегінде сөз алып, мектепте атқарылып жатқан жұмыстармен бөлісті. Мектептің жеткен жетістіктері, оқушылардың білім саласындағы жүлдерін айтып, мектептің даму жоспарынан да хабардар етті.
— «Айбын-2023» әскери-патриоттық жастар жиынының әскери-спорттық сайысының облыстық кезеңінде 10-сынып оқушысы Аяжан Сүгірбаева І орынды иеленіп, республикаға жолдама алды. Байқоңыр қаласындағы «Восход» МАИ-де «Гагарин оқулары» XLIX халықаралық жастар ғылыми конференциясында 6-сынып оқушысы Нурислам Мухомедали информатика пәні бойынша І орынға қол жеткізді. Алматы қаласындағы ғарыштық технологиялар мен техникалар бойынша мектептер, колледждер және жоғары оқу орындары студенттері арасындағы ІІ халықаралық қазақстандық SMART SPACE конкурсында 8-сынып оқушысы Айвар Қуаныш зымыран модельдері үйірмесі бойынша ІІ орынды иеленді,– деді мектеп директоры.
Ерлан Теңізбайұлы IT мектеп мүмкіндік мекені, сол себепті оқушылармен IT бағытта жұмыс жасап, шәкірттерге жол көрсетіп, шығармашылықтарын шыңдау керектігін айтты. Қазіргі таңда IT мектеп-лицей мәртебесі Қызылорда қаласындағы 6 білім ордасына берілген. Шәкірттер түрлі бағытта жетіліп, өңіріміздегі білім сапасын көтеруге, білім жүйесіне жаңашылдық әкелуде аталмыш мектептердің үлесі зор.
Сыр өңірінің білім саласындағы бағыты нәтиже көрсетуде. Білім ордаларының жұмысы талаптарға сәйкес атқарылуда. Оқушылардың білім алуға деген құлшынысы артып, сапаның да көтеріліп жатқандығын байқауға болады. Жыл сайын жергілікті басшылықтың, білім бөлімінің тарапынан мектептерге қолдау көрсетіліп келеді. Қалалық білім бөлімінің басшысы Ерлан Теңізбайұлының мектеп ұжымымен жолығып, жұмыстарымен танысып, оқушылардың білім алу деңгейін бақылауы қаладағы білім сапасының дамуына сеп болары сөзсіз. Басшылық пен мектептердің арасында тосқауыл болмай, еркін кері байланыс орнатылуы жұмыстардың сапалы атқарылуына үлкен септігін тигізеді. Қызылорда қаласы мектептерінде оқып жатқан оқушылардың түрлі жарыстардан жүлдегер атануы өңір имиджіне де оң әсер етері сөзсіз. Бөлім басшысы жанашырлық танытып, білім ордаларының жай-күйін өз көзімен көріп жүрсе, алдағы уақытта мектептегі түйткілді мәселелер толығымен шешіліп, білім сапасының артуына толық негіз бар.
Қ.ӨТЕБАЙ
