Бүгінде еліміздегі барлық аймақтарында білім беру мекемелеріне ерекше көңіл бөлінуде. Балалардың оқулықтармен толықтай қамтамасыз етілуі, түскі аспен де түгелдей қамтылуы басты назардағы мәселе. Соған сай білім беру сапасы да артып келеді. Айтқандай, ұстаздардың берген білімінің нәтижесін Қызылорда қаласы мектептерінің оқушылары республикалық, облыстық байқауларда көрсетіп жүр. Түрлі сайыстардан жүлделі оралып, қала абыройын асқақтап жүргені де баршаға аян.
Тағы бір оқу жылы аяқталып, оқушылар жазғы демалыстарына шыққан болатын. Мектептерде өткізілетін емтихандар да өз мәресіне жетті. 9-сыныптарда білім алушылардың қорытынды бітіру емтихандары 2-13 маусым аралығында, 11-сынып білім алушылардың мемлекеттік бітіру емтихандары 2023 жылғы 5-19 маусым аралығында өткізілді.
2022-2023 оқу жылында мектепті жеке мектептерді қосқанда 2827 оқушы бітірді. Қала бойынша 159 оқушы «Алтын белгі» иегері атанды. Оның 147-і мемлекеттік мектептер үлесінде болса, 12-сі жеке мектептерге тиесілі. Ал, жалпы орта білім туралы үздік аттестат иегері 286 оқушы болды.
Қала бойынша негізгі орта мектепті, яғни 9-сыныпты 6021 оқушы аяқтады, оның 777-і негізгі орта білім туралы үздік аттестатқа үміткер оқушылар.
— Кеше барлық мектеп бітіруші түлектерге салтанатты түрде жалпы орта мектепті бітіргені жөніндегі аттестат табысталды. 9-сыныптан кейін техникалық және кәсіптік, орта білімнен кейінгі білім беру ұйымдарына 2270 оқушы барады деген болжам бар, — деді Қызылорда қаласы бойынша білім бөлімінің басшысы Ерлан Боданов. – Ағымдағы жылдың 22 мамыры мен 5 шілде аралығында 2827 бітіруші түлектің 2695-і үш лек бойынша ҰБТ-ге қатысады. Бүгінгі күнге дейін қала бойынша 134 ең жоғарғы баллды Жақыпбек Махамбетов атындағы №43 орта мектеп түлегі Аман Жансая жинады. Таңдау пәні химия-биология. Оның алдында 133 баллды Көмекбай Қаракөзов атындағы №235 орта мектеп түлегі, математика-информатика пәнін таңдаған Төлеген Нұрдаулет жинаған болатын.
Бұл көрсеткіш ұлттық тестті тапсырғандардың алғашқы легі. Алда әлі мектеп бітірушілердің емтиханы бар. Осы күні алған баллдан да жоғары көрсеткішке жетеді деен үмітіміз бар.
Келесі 2023-2024 оқу жылына 1-сыныпқа қабылдау да жүргізіліп жатыр. Болжам бойынша қала мектептеріне 8157 оқушы қабылданады деп күтілуде. Қазіргі таңда 5256 оқушы 1-сыныпқа қабылданған.
Жылда үздік түлек шығаруда Қызылорда қаласының білім ордалары алдыңғы қатардан көрінетін. Биылғы қарқын да жаман емес. Келесі оқу жылында да үлкен табыстарға қол жеткізіп, шәкірттердің білімін арттырудан күтілетін үміт көп. Қалалық білім бөлімінің қолдауымен түрлі шаралар өткізіліп, кері байланыс жасаудың арқасында мектептердің мәселесі оңтайлы шешімін тауып жүр. Биылғы бітіруші түлектер грант иегері болып, ұстаздардың мерейін көтереді деген сенімдеміз.
Қ.НАЙМАН
