АУЫЛДАРДЫҢ ӘЛЕУЕТІ АРТЫП КЕЛЕДІ

Еліміздің көркеюі үшін әр облыс өздігінше әрекет етіп, атсалысуы керек. Мемлекетіміздің әсемденіп, сырттан келуші туристерді көбейтіп, туризм саласын дамыту үшін де өңірлердің даму жолына түсуі маңызды. Тұрғындардың жағдайын жасап, олардың қажеттіліктерімен толық қамтамасыз ету де жергілікті басшылардың басты міндеті болып табылады. Қазіргі таңда Қызылорда облысында мемлекеттік және жергілікті бюджеттен қаржы бөліну арқасында және жеке кәсіпкерлердің қолдауымен көптеген жұмыстар атқарылып жатыр. Халыққа қажетті нысандар бой көтеріп, ел игілігіне берілуде.

Қаламызда да көптеген мәселелер шешімін табуда. Шаһар басшысы Асылбек Шаменов халықпен тығыз байланыста болу, олардың мұң-мұқтажы мен ұсыныс-тілектерін жүзбе-жүз тыңдау мақсатында тоқсан сайын кездесу өткізіп, көтерілген мәселелер ескерусіз қалмай, кезең-кезеңімен шешілуде.

Қала әкімінің елді мекендерді аралау сапары өз жалғасын тауып, Қызылөзек, Талсуат, Ақжарма және Ақсуат ауылдық округтерінің тыныс-тіршілігі мен қазіргі атқарылып жатқан жұмыстар барысы сараланды.

Қызылөзекте «Ауыл – ел бесігі» бағдарламасы аясында 173 млн. 832 мың теңге бөлініп, 6 көшеге орташа жөндеу жұмыстары жүргізілуде. 2 көшеге жаяу жүргіншілер жолын салу және 2 көшеге түнгі жарық бағаналарын орнату бойынша мемлекеттік сатып алу конкурстары жүруде.

Асылбек Өмірбекұлы кездесуде ауыл әкіміне мемлекет ұсынған бағдарламаларға көбірек қатысуды, елді мекеннің тыныс-тіршілігін әлде де ширатуды тапсырып, ауыл тұрғындарының ұсыныс-тілектеріне құлақ түрді. Ауылдағы ағайын өзекті мәселелердің шешімін тауып келе жатқандығын айтып, қоғамдық көлік қатынасын реттеу­ді сұрады. Бұл талап қыркүйек айына дейін орындалатын болды.

Содан соң Талсуат ауылына ат басын бұрған қала басшысы елді мекен ажарын келтіруге бағытталған жұмыстармен танысты. Жергілікті бюджеттен бөлінген қаражатқа елді мекендегі көшелердің түнгі жарық бағаналарын күтіп ұстау жұмыстары жүргізілуде. Ауылдық округтегі 13 көшені электрмен жабдықтау үшін жобалау-сметалық құжаты әзірленіп, «Ауыл – ел бесігі» жобасымен қаржысы шешілді.

Сондай-ақ, «Қызылорда-Траст» және «Орда Автодор» ЖШС конкурс жеңімпазы деп танылып, ауылдағы 8 көшені асфальттау жұмыстары басталып кетті. Ауыл тұрғындарының мемлекеттік бағдарламаларға қатысу көрсеткіші артып, жыл басынан 13 тұрғын жылқы, қой, түйе, шаруашылығы, жылыжай құрылысы, жүк тасымалдау жобасымен жалпы сомасы 77 млн. 760 мың теңге несие алды.

Өткен жылы құрылысы басталған 150 орындық клуб ғимараты тамыз айында пайдалануға беріледі. Ойын алаңдарына ағымдағы жөндеу жұмыстары жасалынып, түнгі жарықтандыру сияқты инфрақұрылымды жаңғыр­туға бағытталған жоспарлары бар ауылдың тұрғындары қала әкімімен кездесуде елдімекендегі жүйелі жұмыстарға көңілі толатынын айтып, бірқатар көкейде жүрген мәселелерін жеткізді. Шаһар басшысы ұсыныстардың оң шешу жолдарын қарастыруды тиісті сала басшыларына жүктеді.

Қала әкімінің жұмыс кестесіндегі келесі елдімекен – Ақжарма ауылдық округі. Ауылда көптен бері өзекті мәселенің бірі саналып келген дәрігерлік амбулаторияның құрылысы басталды.

Округте бұқаралық спорт түрлері дамуда. Спорттық үйірмелерде 192 жасөспірім спортпен шұғылдануда. Қазіргі кезде «Талдыарал» футбол клубы облыстық «В» тобында ойын көрсетіп келеді. Ақжармалық жасөспірімдер өнерде де озық атанған. Мәдениет үйіндегі Гүлназ Рысбекова «Қазақстан дауысы» балалар мега жобасына 6000 қатысушы арасынан жолдама алып, көрмей таңдау кезеңінен жекпе-жек сынына өткен.

Ауылдың инфрақұрылымын жаңғырту мақсатында ауқымды жұмыстардың жобалық-сметалық құжаттары дайындалып, оң шешімі күтілуде. Яғни, Баймұрат батыр ауылындағы арықтарға науа салу, 3 көшеге орташа жол жөндеу, Талдыарал елді мекеніне тренажер жабдықтары мен футбол алаңын салу, елді мекенге газ жүргізу секілді жұмыстар атқарылады.

Елді мекендегі өзекті мәселе ұялы байланыстың, интернет жылдамдығының төмендігі. Оған қатысты шұғыл шаралар қабылданып, жауапты мекемемен бірлесе жұмыстар жасалынбақ.

Қала әкімінің жұмыс кестесін түйіндеген келесі елдімекен Ақсуат ауылдық округі. Мемлекеттің шағын және орта кәсіпкерлікті дамытуға жасап жатқан қолдауының арқасында бұл ауылда 524 кәсіпкерлік субъектісі тіркеліп, жаңа жұмыс орындары ашылған.

Ең өзекті мәселелердің бірі саналған табиғи газбен қамтамасыз ету шешімін тапқан. Жыл басынан бері «Өңірлік инвестиция орталығы» микро қаржылық ұйымы арқылы «Іскер» бағдарламасымен 42,1 млн. теңгені құрайтын 7 жоба, «Аграрлық несие корпорациясы» АҚ арқылы «Іскер» бағдарламасы аясында 10,9 млн. теңгені құрайтын 2 жоба қаржыландырылған. Сондай-ақ, «2021-2025 жылдарға арналған кәсіпкерлікті дамыту жөніндегі ұлттық жоба» бағдарламасымен 4 жоба қайтарымсыз грантқа ие болыпты.

Ауылдық округ тұрғындарының табысын арттыруға арналған «Ауыл аманаты» жобасына 127 жоба ұсынылған. Бұқаралық спортты дамыту мақсатында 3 спорт ойын алаңы, көше тренажеры және мектептерде спорттық үйірмелер жұмыс жасауда. «Samruk-Kazyna Trust» корпоративтік қоры ауыл орталығынан 239 млн. теңгеге спорт кешенінің құрылысын жүргізіп, биылғы жылы пайдалануға бермек.

Ауыл халқымен кездесуде шаһар басшысы тұрғындардың өзекті ұсыныстарын тыңдады. Асылбек Өмірбекұлы мемлекеттік бағдарламалардың мүмкіндіктер ағынын ауыл әкімдері тиімді пайдалану қажеттігін айтып, жауапты сала басшыларына жоспарланған жұмыстарды жүйелеуді тапсырды.

«Өздеріңізге белгілі, ауылда бүгінгі күнге дейін шешімі табылған және алдағы уақытта жүзеге асырылатын жұмыстардың барлығы өткен жылғы кездесуімізде көтерілген өзекті мәселелер. Бұл халықтың ұсыныс-тілектері ешқашан назардан тыс қалмайтынының айқын дәлелі. Барлық жұмыс тікелей өз бақылауымда болады»,- деді қала әкімі Асылбек Шаменов.

Қала басшысы тоғыз жолдың торабында орналасқан шаһар мен оған қарасты кент және ауылдық округтердің күрмеулі мәселелерін шешіп, даму қарқынын бәсеңдетпеу мақсатында жүйелі жұмыстар жалғаса беретінін айтты.

Облыс орталығының көркейіп, әдемі қала статусына ие болуы маңызды. Қазіргі таңда ауылдық жерден қалаға қоныс аударушылар саны артқан. Жылда қалада орналасқан оқу орындарына келуші түлектер де көбеюде. Ауылдық жерден келіп, қалаға демалып кететін жас отбасылардың да қарасы көп. Осыған байланысты, қаламыз­да лайықты демалыс орындары ашылып, тұрғындардың да бір сәтке демалып, қаланың сұлулығынан шабыт алуға жұмыстар жасалу үстінде. Жергілікті әкімшіліктің ұйымдастыруымен қаламызда көптеген нысандардың жұмыстары басталып, жыл соңына тұрғындардың пайдасына берілмек.

Қала әкімінің сөзінен кейін жыл сайын атқарылу керек мәселелердің саны артып, болашақта қаламыз одан сайын көркейе түсетініне сендік. Өңір басшысының қаламыздағы мәселелерді тікелей бақылауында ұстауы көңілге сенім ұялатады. Қалаға жақын орналасқан ауылдардың жағдайының жақсаруы жасалып жатқан жұмыс­тар нәтижесінің арқасында болып отырғаны қуантады.

Қ.ӘНДЕШҰЛЫ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған