Биыл 15 тамыздан бастап әкімдікте баспана кезегінде тұрғандарға әлеуметтік тұрғын үйлер жаңа әдіспен ұсынылатынын Отбасы банктің баспасөз қызметі хабарлап отыр. Бұл қадамдар Тұрғын үй-коммуналдық инфрақұрылымды дамытудың 2023-2029 жылдарға арналған тұжырымдамасы аясында қамтылады екен. 10%-дан басталатын алғашқы жарна болған жағдайда, несиелер жылдық 2% және 5% мөлшерлемесімен беріледі. Несие мерзімі 20 жылға дейін болады екен.
Жергілікті атқарушы органдарда баспана алу кезегінде тұрған бірінші және екінші топтағы мүгедектер, мүмкіндігі шектеулі балалары бар немесе оларды тәрбиелеп отырған отбасылар, жетім балалар мен ата-анасының қамқорлығынсыз қалған балалар, «Алтын алқа», «Күміс алқа» алқаларымен марапатталған немесе бұрын «Батыр ана» атағын алған, сондай-ақ I және II дәрежелі «Ана даңқы» ордендерімен марапатталған көпбалалы отбасылар, көпбалалы аналар жылдық 2% мөлшерлемесімен жеңілдетілген несие алуға өтініш бере алады. Қазір осы төрт санат бойынша 227 мың қазақстандық баспана кезегінде тұр. Оның ішінде 51 мыңы – І және ІІ топтағы мүгедектер.
Егер мүмкіндігі шектеулі адамның кірісі болмаса немесе жеткіліксіз болса, онда ол қосымша қарыз алушыларды тарта алады. Бұрын бұл мақсатқа тек жақын туыстары – күйеуі немесе әйеліне, сондай-ақ кәмелеттік жасқа толған балаларына ғана кепілгер ретінде қатысуға рұқсат берілетін.
Сондай-ақ тұрғын үй-коммуналдық инфрақұрылымды дамытудың 2023-2029 жылдарға арналған тұжырымдамасы бойынша кредит алу барысында барлық санат үшін кіріске шектеу қойылмайды. Мұнымен қоса, тұжырымдамаға сәйкес қатысушылар кредиттің ең жоғарғы сомасы бойынша шектелмейтін болады. Бұрын аймаққа байланысты ол 10 млн.-нан 18 млн. теңгеге дейін болатын. Енді кредит сомасы пәтер құнына қарай есептеліп, тұрғын үйдің 1 шаршы метрінің бағасы аясында қалыптасады. Әлеуметтік тұрғын үй 3-4 санатқа сәйкес келіп, пәтердің максималды ауданы 80 шаршы метрден аспайтын болады. Енді мемлекеттік бағдарламаға қатысу туралы өтінімдер otbasybank.kz жылжымайтын мүлік порталында жылжымайтын мүлік объектілері аясында қабылданады. Қазақстан бойынша өтінімдерді жалпылама қабылдау болмайды.
Е.Ерболұлы
