Облыс әкімі Нұрлыбек Нәлібаев Құрылысшылар күні қарсаңында Қызылордада ашылған үй құрылысы комбинатындағы салтанатты рәсімге қатысты. Үй құрылысы комбинаты еден, жол плитасы, іргетас блоктары, маңдайша, таспалы іргетас, баспалдақ сияқты өнімдер шығарады. Жаңа зауыт сағатына 80 текше метр тауарлы бетон және күніне 120 текше метр темір-бетон бұйымдарын өндіруге лайықталған.
Аймақ басшысы жерлестерін жаңа өндіріс орнының салынуымен құттықтады.
— Мемлекет басшысы Қасым-Жомарт Кемелұлы Тоқаев Ұлттық құрылтай жиынында «Әділетті Қазақстанда еңбекқор адам ең сыйлы адам болуы тиіс. Маңдай термен тапқан әр тиын – нағыз ардың ісі» екенін айтты. Ал, адал еңбек етуді алтын қағидатына айналдырған құрылысшылар қауымын бағалап, лайықты құрмет көрсету – біздің міндетіміз. Темір-бетон бұйымдарын шығаратын зауытты іске қосу аймақтағы құрылыс саласын дамытуға, тұрғын үй және әлеуметтік инфрақұрылым құрылысының көлемін кеңейтуге жол ашады. Мұндай өндірістер бізге құрылыс шығындарын едәуір азайтуға, импортқа тәуелділікті төмендетуге, сондай-ақ капиталдың шет елдерге кетуін шектеуге мүмкіндік береді, — деді аймақ басшысы.
Мерекелік іс-шарада құрылыс саласының ардагері Ақмұрат Мадияров құттықтау сөз сөйлеп, Қызылорда облысының Құрметті азаматы Жарылқасын Шәріпов бата берді.
Жергілікті өнім шығарып, өңір экономикасын дамытуға үлес қосатын жаңа зауыттың ашылуынан кейін Қызылорда қаласында құрылысшылар күніне арналған мерекелік іс-шара өтті. Салтанатты жиында облыс әкімі Нұрлыбек Нәлібаев құрылысшыларды кәсіби мерекесімен құттықтады.
— Құрылысшылар – сәулет өнерінің шеберлері ғана емес, адал еңбектің иелері. Сары аяз қыста да, шіліңгір шілденің аптап ыстығы мен боз жауынды қоңыр күзге қарамастан құрыш білектің қуатын ғимарат салуға арнайтын қадірлі мамандық иесі. Сондықтан әрбір шебер қолды құрылысшының туған өлкеміздің дамуында қолтаңбасы бар. Бүгінде өңірде құрылыс индустриясы қарқын алып келеді. Заманауи ғимараттар салынып, жаңа ықшам аудандарда көпқабатты тұрғын үйлер бой көтеріп, аймақ ажарына әр қосты. Миллиардтаған теңгенің ірі жобалары да құрыш қолды құрылысшылардың табандылығының арқасында жүзеге асуда. Биыл Сыр елі құрылыс жұмыстарының көлем көрсеткіші бойынша республикада алдыңғы қатарда, — деді аймақ басшысы.
Мерекелік іс-шарада тәуелсіздік жылдары облысымыздың өсіп-өркендеуіне, әлеуметтік нысандардың бой көтеруіне ерекше атсалысқан азаматтарға, майталман мамандарға жылы ықыласын танытқан аймақ басшысы үздіктерге марапат табыстады. Атап айтқанда, «Қызылорда облысының Құрметті азаматы» атағымен мемлекет және қоғам қайраткері, «Құрмет» орденінің иегері Қожахмет Баймаханов марапатталды. Сонымен қатар сала мамандарына «Құрметті құрылысшы», «Құрметті жолшы» төсбелгілері, Индустрия және инфрақұрылымдық даму министрлігінің Құрмет грамотасы, Қызылорда облысының Құрмет грамотасы мен облыс әкімінің Алғыс хаты берілді.
Бүгінде мемлекеттік қолдаудың нәтижесінде облыс аумағында 8,8 млрд. теңгеге 26 тұрғын үйдің және 46 млрд. теңгеге 62 әлеуметтік нысанның құрылысы жүргізіліп жатыр. Соңғы 3 жылда тұрғын үй құрылысының көлемі 112 пайызға өсіп, 3 мыңнан аса азамат жаңа пәтерге ие болды. Биыл құрылыс көлемі одан әрі артып, 692,3 мың шаршы метр тұрғын үйді пайдалануға беру жоспарланған.
Қазір әртүрлі деңгейдегі 150 жобаның құрылысы жүзеге асуда. Бұған мемлекеттік бюджет есебінен 72,3 млрд. теңге бөлінген. Бұл көрсеткіш өткен жылмен салыстырғанда 3 есеге артқан.
Қызылордада ерекше аталып өтілген атаулы күні қазақ эстрадасының жұлдыздары Мәдина Сәдуақасова, Маржан Арапбаева және Әміре мен Садраддин ән шырқап, көпшіліктің көңілін көтеріп, мереке думанға ұласты.
Қ.Әндешұлы
