Бір аптадан кейін жаңа оқу жылы басталады. Одан бұрын тамыз мәслихатының екі күндік шарасы Қызылордада жұмысын жүргізіп жатыр. Ал, облыс жаңа оқу жылына дайын ба? Алдыңғы кезекте білім саласының алға қойған қандай жоспары бар?
Жоспар бойынша аймақта жаңа оқу жылында 180 мың оқушы білім алмақ. Осы күні бірінші сыныпқа 17543 бала қабылданды. 23086 педагог жаздай демалып, оқушыларға білім мен тәрбие беруге тың ойлармен келмек.
— Бүгінде барлық білім беру ұйымдары қажетті санитарлық-гигиеналық заттармен қамтамасыз етілді. Оқулық және оқу-әдістемелік кешендерге жергілікті бюджеттен 1,2 млрд. теңге бөлініп, 412029 дана оқулық алынды. Бұған қоса, 25 тамызға дейін тасымалдау-тарату жұмыстары толық аяқталады. Мектептер толықтай интернет желісімен қамтамасыз етілді. Осы жылдың қаңтар айынан 1-4 сыныпта оқитын 70173 және әлеуметтік осал отбасыдан шыққан 5-11 сыныптағы 16777 оқушы тегін ыстық тамақпен қамтылды. Бұл жұмыстар жаңа оқу жылында да жалғасады,- деді облыстық білім басқармасы басшысының міндетін атқарушы Бағдат Бердаулетов.
Қызылорда облысында жаңа оқу жылы қарсаңында көмекке мұқтаж 37087 баланы бір реттік қаржылай көмекпен қамтамасыз ету үшін жергілікті бюджеттен 1,3 млрд. теңге бөлінген. Сондай-ақ, «Мектепке жол» акциясы аясында демеушілер тарапынан да көмектер берілуде.
— Науқан аясында 1754 бала қаржылай, 3156 балаға оқу құралдары, 485 балаға мектеп формасы, 196 балаға аяқ киім алынды. «Самұрық-Қазына» қорының бастамасымен 1 сыныпқа баратын 1830 оқушыға рюкзак пен кеңсе заттары табысталды. Мұнан өзге, «Ел-арай» қоры 500-ден астам балаға көмек көрсетпек. Бүгінде жеке мектептердің аз қамтылған отбасынан шыққан 2000-нан астам баланың мәселесін шешу қарастырылуда,-дейді Бағдат Камбозұлы.
Ал, Қызылорда облысы бойынша Білім саласында сапаны қамтамасыз ету департаментінің басшысы Ғалия Даулетова:
— Департамент қызметкерлері білім ұйымдарының жаңа оқу жылына дайындығын тексеру мақсатында мониторинг жүргізді. Нақтырақ айтқанда, күрделі және ағымдағы жөндеу жұмыстары, турникеттер мен дабыл түймелерінің болуы, спорт залдарының, асхананың және жаңа модификацияланған пән кабинеттерінің болуы қадағаланды. Мониторинг қорытындысы білім басқармасына жолданып, тиісті ұсыныстар берілді,- деді.
Қыркүйекке дейін жоспарлар жүйеленіп, ұсыныстар ескеріліп, облыс бойынша барлық білім беру мекемелері дайын болмақ.
Қ.Әндешұлы
