Қызылорда қаласының әкімі Асылбек Шаменов көктем басталғалы тыным тапқан емес. Бірде қаладағы жасалып жатқан жұмыстардың басы-қасында жүріп, олардың сапасына назар аударса, енді бірде азаматтарды жеке мәселелері бойынша қабылдап жатқаны. Асылбек Өмірбекұлы облыс орталығында атқарылып жатқан барлық жұмыстарды, қаланың тыныс-тіршілігін назардан тыс қалдырмай жиі аралап, бақылауында ұстап келеді. Жақында қаладағы бірқатар нысанды аралап, жөндеу жұмыстарының уақытылы әрі сапалы орындалуын қадағалап, құрылыс жұмыстарын жүргізіп жатқан мекемелердің басшыларымен кездесіп, нақты тапсырмалар берді.
Ал, кезектілік тәртібімен жазылып, қабылдауға келген үлкен-кішінің әңгімесін зейін қойып тыңдау бөлек әңгіме. Қабылдауға келетіндердің басым көпшілігінің айтары – жұмыспен қамту, әлеуметтік жәрдемақы алу, атаулы әлеуметтік көмек тағайындаудың тәртібі, баспанамен қамту, кәсіпкерлікті қолдау жөніндегі мәселелер. Ашықтық пен жариялылықты ұстаным тұтқан қала басшысы әр кезде азаматтардың уәждері бойынша мәселелерді зерделеп, салалар бойынша тиісті шаралар қабылдауға тапсырма беріп келеді.
Рас, Қызылорда қаласында биыл тың бастамалар қолға алынып, жарқын жобалар жүйелі түрде жүзеге асуда. Әлеуметтік салада соны серпілістер айқындалып, экономикалық бағытта өсімдер қалыптасуда. Құрылыс, жол салу бағытындағы жұмыстар елдің еңсесін тіктеді. Осы және өзге де ілкімді істер туралы қала әкімі Асылбек Шаменов қалалық мәслихаттың кезектен тыс VI сессиясында баяндады.
Қала бюджеті жыл басында 52,3 млрд. теңгемен бекітілген еді. Жүйелі жоспарлардың, орнықты істердің жемісі, бүгінде оның көлемі 83,8 млрд. теңгеге жетті.
— Өздеріңізге белгілі, өткен аптада облыстық мәслихаттың сессиясы өтіп, онда қала бюджетінің кірісіне қосымша 6,2 млрд. теңге қаралды. Бұл қаражатқа қаладағы көпқабатты тұрғын үйлерді абаттандыру, олардың қасбетіне күрделі жөндеу жүргізу, инженерлік коммуникациялық инфрақұрылымды дамыту, сондай-ақ көпбалалы аналарға және әлеуметтік жағынан осал топтарына жататын азаматтарымызға пәтер сатып алу жұмыстары жүргізіледі,- деп, шаһар басшысы қалада жүзеге асып жатқан ауқымды жобаларға тоқталды.
Биыл облыс орталығының тұрғын үй құрылысын дамытуға, әлеуметтік және инженерлік инфрақұрылымды жақсартуға бюджеттің барлық көздерінен 121,2 млрд. теңге бөлініп, ауқымды жобалар ел игілігі үшін қызмет етпек.
Қалада жалпы құны 1,6 млрд. теңгені құрайтын «Неке сарайы», 3,7 млрд. теңге болатын 1000 орындық «Өнер орталығы», 2,8 млрд. теңгені құрайтын «Облыстық қан орталығы», сондай-ақ, 1 млрд. теңгені құрайтын Сырдария өзенінің сол жағалауынан автовокзал құрылыстары жүргізілуде. Ауқымды жобалар арқасында әлеуметтік ахуалымыз өсіп, қаланың имиджі көтеріледі.
Сонымен қатар, шаһар басшысы Асылбек Өмірбекұлы инфрақұрылымдық әлеуетті дамытуда Болат Өтемұратовтың қолдауымен құны 25 млн АҚШ доллары болатын «Қорқыт ата» әуежайы жаңа терминалы салынып жатқанын, белгілі кәсіпкер Марат Дүйсенбаевтың демеушілігімен құны 1,5 млрд. теңгені құрайтын «Анаға тағзым» орталығының құрылысының аяқталуға жақын екенін тілге тиек ете келе, жақын күндері «Анаға тағзым» орталығы мен «Неке сарайының» пайдалануға берілетінін айтты.
Мәслихат сессиясында Қызылорда облысының 85 жылдық және қаламыздың 205 жылдық торқалы тойын кең көлемде атап өту туралы да сөз болды.
«Қаламыздың мерекесінде қаланың тарихына көз жүгірте отырып, бүгінгі күнмен сабақтастырып, жетістіктерімізді қала халқымен бөлісеміз. Айтулы мерекеге орай арнайы іс-шаралар жоспары бекітіліп, жерлестерімізге және қала қонақтарына мерекелік көңіл-күй сыйлайтын түрлі деңгейдегі мәдени-көпшілік шаралар ұйымдастырылады» деді қала әкімі Асылбек Шаменов.
Салтанатты шараның ашылуы орталық алаңнан бастау алып, «Жастар карнавалы», республикалық жайдарманшылар фестивалі және аудандардың қала аумағындағы жәрмеңкелерімен жалғаспақ. Мұнан өзге, тәрбиелік-танымдық бағыттағы түрлі іс-шаралар көпшілікке ұсынылады. Бүгінгі жасалып жатқан игі істер, жарқын жобалар қала күніне сыйлық іспеттес.
Н.Меңдібай
