Кейінгі екі жылдың ішінде Қызылорда облысында құрылыстың және құрылыс қарқынының аясында абаттандыруға ерекше көңіл бөлінді. Құрылыс ел экономикасы өсімінің басты драйвері болса, биыл бұл сала өңірімізде көлемі жағынан өсу бойынша да алға шықты. Кез келген мемлекеттің, қоғамның ілгері басуына оның құрылыс, сәулет саласына қарап баға беруге болады. Құрылыс саласы – қашанда экономиканың негізгі іргетасы екендігі айқын. Сондықтан да, құрылыс саласының дамуы елдің экономикалық күш-қуаты мен әлеуметтік жағдайының артуына тікелей байланысты екені даусыз.
Қызылорда қаласын абаттандыру және көркейту шараларына ерекше мән берілсе, бұл бағыттағы жұмыстар қала тұрғындарына қолайлы жағдай жасау мақсатында жүзеге асырылуда. Сондай игілікті істердің бірі – орталық алаңда бастау алды. «Қызылорда қаласындағы Әйтеке би көшесін Желтоқсан көшесінен А.Байтұрсынов көшесіне дейін, Ы.Жақаев көшесін, Әйтеке би көшесінен Қорқыт ата көшесіне дейін абаттандыру» жобасына орай, мердігер мекеме құрылыс жұмыстарына кірісті. Жоба бойынша субұрқақтары аумағына брусчаткалар, жолжиек тастар орнатылады. Жарықдиодты шамдар қойылып, газондар, көпжылдық жасыл көшеттер отырғызылады. Сонымен қатар, шағын архитектуралық пішімдемелер орналастырылады. Ы.Жақаев көшесінің Қорқыт ата көшесінен орталық алаңға дейінгі аралығы да толықтай абаттандырылады.
Заманауи кейіпте жаңғыртылатын алаң жанға жайлы, көңілге қонымды болмақ. Мұнда, әсіресе көпшіліктің алаңсыз демалуына толыққанды жағдай жасалады. Брусчаткалар төселіп, жолжиек тастар қойылады. Бұл балалар қауіпсіздігін қамтамасыз етпек. Жарық диодты шамдар мен газондар, көпжылдық жасыл көшеттер көз тояттайтын көрікті орынға айналады. Жаңа үлгідегі орындықтар, жарық бағаналары мен балалар ойын алаңы шаһар келбетіне шырай бермек.
Ең маңыздысы, құрылысқа қазына қаржысынан бөлек, кәсіпкер Асқар Әубәкіров 1,5 млрд. теңгеге қаржылай қолдау көрсеткен. Орталық алаңның жайқалып тұрғанын қалаған азаматтың қаржысы халық игілігі үшін игерілуде. Ал, орталықтағы жиек тастары мен кеспе тастары, төсеуді қажет етілетін өзге де әлеуметтік нысандарға көшірілді.
Рас, бүгініміз бен болашағымызға бей-жай қарамаған азаматтардың туған жерге деген ыстық ықыластарының көрінісі ретінде демеушілердің көмегімен бой көтеріп жатқан әлеуметтік нысандарды неге айтпасқа? Облыс орталығында бір мезетте үш ғимараттың іргетасы қаланды: «Неке сарайы», «Өнер орталығы», «Анаға тағзым» орталығы. Бұл ғимараттар қаламыздың сәулеттік келбетіне көрік қосып, ынтымағы жарасқан тұрғындарымызға ерекше тарту болары сөзсіз.
«Қазгермұнай» ұлттық компаниясы басшылығы заманауи үлгідегі «Оқушылар сарайының» жобасын қолға алды. Қуаттылығы 240 мегаватты құрайтын жылу электр орталығының да іргетасы қаланды. «Акса энерджи» түрік компаниясымен бірлескен жұмыстар 2025 жылы аяқталып, жаңа нысан ел игілігіне беріледі. Бұл арқылы қала аумағы сапалы жылу және электр энергиясымен толық қамтылатын болады.
Жақсы жолда жайлы көліктің қатынауы халық үшін үлкен игілік. Қызылорда қаласының қоғамдық көлік қызметі жақсарып, үлкен сыйымдылықтағы жаңа автобустармен толықтыру бойынша да ауқымды жұмыстар жасалуда. Облыс орталығындағы жолаушылар тасымалдау қызметінің сапасын арттыру мақсатында өткен жылы лизинг арқылы 150 дана жаңа автобус алынды. Биылғы қоғамдық көлік қызметі мәселесін түбегейлі шешу мақсатында қосымша 150 автобус алу үшін жұмыс белсенді жүруде.
Сонымен қатар, қала орталығындағы Назарбаев, Астана даңғылдары мен Яссауи көшесіне де ағымдағы жөндеу жұмыстары жүргізіліп, абаттандырылатын болады. Тұрғындардың игілігі үшін «Белкөл», «Құлагер» теміржол өткелдері салынуда. Қаланың тек орталық көшелері емес, шет аймақтарында да жолдарды жөндеу, жаяу жүргіншілер жолы сияқты қарқынды жұмысты көзбен көріп жүрміз.
Тағы бір қуанышты жаңалық, Сырдария өзененінің сол жағалауындағы басты көше жолының «Батыс Европа-Батыс Қытай» көлік дәлізімен жанасатын жерінде көлік айырығын салу жобасы таяу арада аяқталады.
Бүгінгі таңда заман талабына сай жаңа үлгілермен салынған құрылыс кешендері аймақтың айбынын арттырып, келбетіне сән қосып, өңірдің өсіп-өркендеуіне жаңаша серпін беруде. Ал, осы ауқымы үлкен саланың дамуында білікті де білімді, іскер де қабілетті мамандардың қолтаңба қалдырып жатқан қаншама құрылысшының маңдай тері мен табанды еңбегі барын ұмытпауымыз керек.
А.Әділжанұлы
