Алаштың анасы атанған Сыр елі қашаннан хас таланттарды тоғыстырған өнегелі өңір. Жыр елі атанған өлкемізде алаштан ән оздырып, салған әні қазақ елінің биік шоқтығына айналған әнші, жыршы даланы тербеп, сан ұрпақты тебіренткен өнер иелері жетерлік.
Рас, Қызылорда — көненің көзі, көрікті қала. «Жазса Тарас Днепрді, Жазса Пушкин Еділді. Неге маған жырламасқа, Сырда туған елімді» деп ақын Әбділда Тәжібаев жырлағандай, қазақ тарихында өзіндік үлкен рөл атқаратын қаланың тарихы да тереңде жатыр. Осы бір қасиетті мекенге жыр арнамаған ақын кемде шығар. Туған елін, сүйікті қаласын жырға қосатын ақындар легін жаңа есімдермен толықтыру мақсатында әлеуметтік қорғау жүйесі қызметкерлерінің күніне орай А.С.Пушкин атындағы орталық кітапхана және «Қызмет» салалық облыстық кәсіподағының бірлесе ұйымдастыруымен «Жырым сенсің – туған жер» атты әдеби сайыс болып өтті. Жарысқа №1 және №2 Қызылорда арнаулы әлеуметтік қызметтер көрсету орталығының, мүгедектерге арналған оңалту орталығының және арнаулы әлеуметтік қызметтер көрсету балалар орталығының қызметкерлері қатысты.
Әдеби сайыс екі кезең бойынша өтті. Бірінші кезең бойынша қатысушылар туған жерге, Сыр еліне, Қызылорда қаласына арналған жыр шумақтарын оқыса, екінші кезеңде өздері қалаған тақырып бойынша өлеңдерді ортаға салды. Әлеуметтік сала қызметкерлері арасында өз өлеңдерін оқығандар да болды. Қатысушылар Абайдың, Мұқағалидың, Мұхтар Шахановтың өлеңдерін тебірене оқығанда көрермен ризашылықпен қол соқты. Сайысқа «Ұстаз мәртебесі» газетінің бас редакторы Нұрлан Көбегенұлы, «Қызмет» салалық облыстық кәсіподағының төрайымы Сәуле Сахиқызы және орталықтандырылған кітапханалар жүйесінің әдіскері Сәуле Кеңесбекқызы қазылық етті.
Сайыс қорытындысында бірінші орынға Раушанбек Шарапат, екінші орынға Гүлзат Уәлиева мен Мақсұт Ермағамбет, ал үшінші орынға Салтанат Әмин мен Назерке Мырзаханова лайық деп танылды. Жүлделі орын иелері қаржылай сыйлықтармен, арнайы дипломдармен марапатталды.
Б.Бағдатұлы
