Бүгінде Сыр өңірінде құрылыс қарқын алып тұр. Облыстың әр ауданында бой көтерген нысандар ел игілігі үшін қызмет етпек. Ал, Қызылорда қаласындағы ғимараттар көздің жауын алып, таң қалдырады.
Жексенбі күні облыс әкімі Нұрлыбек Нәлібаев Қызылорда қаласындағы құрылысы қарқын алған бірқатар нысанды аралап, «Қызылорда» су торабындағы жөндеу жұмыстарымен танысты. 2020 жылдан бері апатты жағдайдағы су торабы жөнделу үстінде. Мердігер мекеме «Caspian Contractors Trust» ЖШС жөндеу жұмыстарын қолға алғалы бері желтоқсан айында аяқтауға жоспар құрған. Қазірде бөгетте 16 метрлік бес аралық бар, олар қақпалармен және апаттық-жөндеу шандорларымен жабылған. Қауіпсіздікті қатаң сақтаған мердігер сапалы жұмыс жасауға бекінгені байқалады.
Облыс әкімі жақын күндері ашылған тұрғын үй құрылысы комбинатының жұмысымен де танысты. Комбинат еден, жол плитасы, іргетас блоктары, маңдайша, таспалы іргетас, баспалдақ сияқты өнімдер шығарады. Сағатына 80 текше метр тауарлы бетон және күніне 120 текше метр темір-бетон бұйымдарын өндіруге мүмкіндігі бар жүзге жуық жаңа жұмыс орнын қамтыған қуатты зауыт.
Аймақ басшысы өңірге әкім болып келгелі жоспарлаған қаладағы іргелі нысандарды да аралап, жай-күйін өз көзімен көрді. Әуелі Сұлтан Бейбарыс көшесіндегі «Неке сарайының» құрылысымен танысты. Жалпы аумағы 2 мың шаршы метрден асатын зәулім ғимараттың құрылысы былтыр қыркүйек айында басталған болатын. Көзге ерекше болып көрініп тұрған ғимарат қаланың ажарын ашатын сәулетті орынға айналғалы тұр.
Нұрлыбек Машбекұлы «Анаға тағзым» орталығының құрылысын да көрді. Нысан жақын арада халық игілігіне табысталмақ. Ғимарат белгілі кәсіпкер, меценат Марат Дүйсенбаевтың демеушілігімен 1,5 млрд. теңгеге салынып жатыр. Бұл орталықта қыз-келіншектерге, жас отбасыларға, балаларға ұлттық құндылықтар дәріптеліп, әдет-ғұрып, салт-дәстүр жаңғыртылады. Келушілерге сән мен сымбат, үй тұрмысы, қонақ күтуді үйрететін, жан-жақты психологиялық көмек беретін кабинеттер болады. Мұнан бөлек, ғимаратта шығармашыл жандарға арналған әдебиет және поэзия, дизайн студиясы мен би орталығы, жас отбасыларға қызмет көрсету бөлмелері орналасады.
Аймақ басшысы Абай даңғылы №47 а,б,в, 51, 51 а тұрғын үйлердің аулаларын абаттандыру жұмыстарын да бір көріп шықты. Маусым айынан бері демеушілердің қолдауымен 1 млрд. 100 млн. теңгеге облыс орталығындағы 50 үйдің қасбеттері заманауи панелдермен қапталып жатқанын білеміз. Оған қоса демеушілер 1 млрд. теңгеге 20 көпқабатты тұрғын үйдің ауласын абаттандыруда. Заманауи спорт алаңдары, тротуарлар, жарық бағаналары жаңартуда. Зәулім ғимараттар облыс орталығына жаңаша рең беріп, заманауи кейіпке ендірмек.
Облыс әкімі өнім өндіретін орындарда да аралады. Жылына 33 мың тоннадан астам өнім өңдеуге қауқарлы «Мағжан және К» ЖШС-ның күріш зауытында болды. Кәсіпорын заманауи жоғары технологиялық құрал-жабдықтармен жабдықталған және бірыңғай автоматтандырылған жүйе арқылы басқарылады. Н.Нәлібаев ішкі нарыққа және ішінара экспортқа жіберілетін йодталған техникалық және ас тұзын өндіретін «Ассоль» зауытында да болып, қызметімен танысты. 2021 жылы компания өнімдер мен қызметтердің сапасы бойынша ҚР Президентінің «Алтын сапа» сыйлығының жеңімпазы болғаны облыс үшін мақтаныш.
Н.Меңдібай
