Қазалы ауданы әкімі Мұхтар Оразбаев пен аудандық мәслихат хатшысы Бақытжан Жарылқап Жанкент ауылына арнайы барып, тұрғындармен кездесу өткізді.
Жанкент ауылындағы клубта өткен кездесуде Мұхтар Әуесұлы алдымен жақында ғана сайланған Өркендеу ауылдық округінің әкімі Қожахмет Қуанғалиды құттықтап, жұмысына сәттілік тіледі.
Аудан басшысы мұнан соң ауданымызда атқарылған жұмыстарға тоқталып, қол жеткізген жетістіктер мен алдағы мақсат-міндеттерді тілге тиек етті.
Сондай-ақ, Мемлекет басшысы Қасым-Жомарт Кемелұлы Тоқаевтың Жарлығына сәйкес елді мекен тұрғындарымен жиі-жиі кездесіп, халықтың мұң-мұқтаждарын тыңдайтындықтарын жеткізді.
Кезек ұсыныс-пікірлерге берілгенде ауылдық ардагерлер кеңесінің төрағасы Өткелбай Жолмырзаев Жанкент көшесін асфальттау, спорт кешенін салу, Құттыбай би кесенесіне барар жолға гравий тас төсеу, жаңа жедел жәрдем көлігін алу және елді мекенді газдандыру сияқты мәселелерді көтерді.
Аудан әкімі Мұхтар Оразбаев халықтың ұсыныс-пікірлері өте орынды екенін айтып, бұл мәселелерді рет-ретімен шешу үшін жүйелі жұмыс жүргізілетіндігін тілге тиек етті.
«Ұстаз-ақпарат»
