Қызылорда қаласындағы №285 мамандандырылған мектеп – лицей-интернатта «Ерлігі асқан, Жеңісі дастан» тақырыбындағы патриоттық шаралар фестивалі ұйымдастырылды. «Біртұтас тәрбие» бағдарламасы аясында жас ұрпаққа құндылықтарға негізделген шынайы патриоттық тәрбие берумен қатар Жеңіс тарихына құрметпен қарауға, бейбіт өмірдің құнын білуге баулуды, Ұлы Жеңістің 80 жылдығының маңызын түсіндіруді мақсат тұтқан шараға Қамқоршылық кеңес мүшелері, ата-аналар және облыстық 99215 әскери бөлімнің қызметкерлері қатысты.
Патриоттық шара мектеп алаңдарында ұйымдастырылды. Шараға барлық оқушылар мен педагогикалық ұжым түгел тартылды. Шара мазмұны патриоттық аялдамаларға топтастырылыпты. Айтар болсақ, «Жеңісті жақындатқандар – біздің жүрегімізде» тақырыбындағы аялдамада оқушылар соғыс және тыл ардагерлері туралы мәліметтер жинақтап, арнайы танымдық құрал дайындаған. Жинақта 20 соғыс және тыл ардагерінің өмірбаянынан бастап, наградалары түгел ұсынылды. Отбасы, немерелерімен сұхбат та енгізілген екен. Ал, «Біз – Жеңіс тарихының ұрпағымыз!» атты аялдамада мектептегі садақ ату үйірмесіне қатысатын оқушылардың мергендік өнері көрсетілді. Стенд атудан спорт шебері Азамат Жалғасбек тәрбиелеген оқушылардың өнері көпшілікке ұсынылды.
«Батырлық – жүректен, Жеңіс – бірліктен» тақырыбындағы аялдамада рух-жігері шыңдалған оқушылардың таэквандо, бокс, қазақша күрес сияқты спорт түрлерінен өнерін тамашалауға мүмкіндік болды. Қара, көк белбеу иегерлері, облыстық, республикалық турнирлерде топ жарып жүрген 8-сынып оқушылары Каналбай Ернұр, Маханбет Ерасыл, Анварбек Дәурен, Жанболат Нұрали т.б. оқушылар мықтылықтарын көрсетті.
«Жеңіске – тағзым, батырға — құрмет» аялдамасында әскери техникалық 20-ға жуық макеттен көрме ұйымдастырылды. Сонымен бірге, робототехника үйірмесіне қатысатын оқушылар түрлі әскери техникаларды — танк, самолет, машиналарды жасап, презентация жасады. Ал, «Жауынгердің жалынды ұрпағымыз!»тақырыбындағы аялдамада 10-сынып оқушылары әскери кедергілермен жылдам әрі тез жүгіру өнерін көрсетсе, 8-сынып оқушылары саптық алаңда саптық дайындық, автоматтпен жүру тәртібінің үлгісін көрсетті.
«Болмасын соғыс!»тақырыбындағы жас суретшілердің шығармашылығынан дайындалған галереяда 10-нан астам оқушының шығармашылық туындылары таныстырылды. Әсіресе, 8-сынып оқушысы Әсел Амангелдінің І.Жансүгіровтің «Аттанған азамат» деп аталатын шығармасының мазмұны бойынша бейнеленген суреті көпшілікті сүйсінтті.
Қорытындысында «Ерлігі асқан, жеңісі дастан»тақырыбындағы әдеби-музыкалық композицияның мазмұны терең болды. Өнерпаздар 1 , 7 , 9 мамыр мерекелерінің мазмұнын әдемі үйлестіріп, би қойылымдарымен, әнмен, жыр шумақтарымен жеткізе білді.
Патриоттық шараға атсалысқан оқушылар бар ынтасымен беріле қатысқандары байқалды. Шараның мазмұнының толыққанды болуына мектеп – лицей-интернат басшысынан бастап барлық ұстаздардың, оқушылардың еңбегі көрінді. Шара соңында мектеп – лицей-интернат директоры Балзия Абдуллаева сөз сөйлеп, атсалысқан барша оқушыларға рақметін айтты.
— Ұлы Жеңістің 80 жылдығын ұжым жоғары табыстармен қарсы алды. Барлық оқушылардың 58 пайызы қалалық, облыстық, республикалық деңгейлердегі пәндік олимпиадалар, ғылыми жоба байқаулары, интеллектуалды сайыстарға қатысып, жүлделі орындар иеленді,- деп білім ордасының жетістіктерін де тілге тиек етті.
Патриоттық шараны жоғары бағалаған ата-аналар, қонақтар оқушыларға, мектеп ұжымына ықылас-ниеттерін білдірді.
Н.Меңдібай
