Қай кезеңде болмасын, қоғамның өркендеуі мен мемлекеттің дамуы ең алдымен сапалы білім мен саналы ұрпақ тәрбиесіне байланысты. Ал, сол ұлы міндетті атқаратын тұлға – педагог.
Ұстаз – тек білім беруші ғана емес, ол – ұлттың рухани құндылықтарын бойына сіңіріп, келер ұрпақтың дүниетанымын қалыптастыратын, азаматтық ұстанымын бекітетін ұлағатты ұстаз. Сондықтан да мемлекетіміз педагог мәртебесін көтеруді стратегиялық маңызы бар мәселе ретінде қарастырып келеді.
Қазақстан Республикасында «Педагог мәртебесі туралы» заңның қабылдануы – ұстаздарға деген мемлекеттік қолдаудың нақты көрінісі. Бұл заң мұғалімдердің құқықтарын қорғауға, кәсіби қызметіне қолайлы жағдай жасауға, олардың әлеуметтік мәртебесін арттыруға бағытталған маңызды құжат болды. Нәтижесінде педагогтердің қоғамдағы орны айқындалып, олардың шығармашылықпен жұмыс істеуіне жаңа мүмкіндіктер ашылды.
Бүгінгі мұғалім – заман ағымына сай үздіксіз ізденетін, жаңашылдықты игерген, ЖИ мүмкіндіктерін меңгерген, цифрлық технологияларды тиімді қолданатын кәсіби маман. Қазіргі білім беру жүйесі ұстаздан тек пәндік білімді ғана емес, оқушының сыни ойлауын дамытуға, функционалдық сауаттылығын қалыптастыруға, ұлттық құндылықтарды дәріптеуге бағытталған жаңа тәсілдерді меңгеруді талап етеді. Сондықтан педагогтің кәсіби дамуы – уақыт талабы.
Ұлы ағартушы Ахмет Байтұрсынұлының «Мектептің жаны – мұғалім» деген сөзі бүгінде жаңару кезеңінде өз маңызын жойған жоқ. Шынында да, мектептің жетістігі де, шәкірттің табысы да ұстаздың біліктілігі мен жауапкершілігіне тікелей байланысты. Мұғалімнің әрбір сабағы – болашақ азаматтың тағдырына әсер ететін маңызды қадам. Сол себепті педагог өзінің білімін үнемі жетілдіріп, кәсіби шеберлігін арттырып отыруы қажет.
Педагог мәртебесінің артуы – тек заңмен бекітілген құқықтар мен әлеуметтік кепілдіктер ғана емес. Бұл – қоғамның ұстазға деген құрметі, ата-ананың сенімі, шәкірттің алғысы. Ұстаз еңбегі жоғары бағаланған жерде білім сапасы да артады, тәрбиенің де нәтижесі жоғары болады. Сондықтан әрбір азамат мұғалім еңбегін бағалап, оған құрметпен қарауды азаматтық парызы,- деп түсінуі тиіс.
Бүгінгі таңда білім беру саласында көптеген оң өзгерістер жүзеге асуда. Мұғалімдердің кәсіби міндетіне қатысы жоқ жұмыстарға тартуға заң жүзінде шектеу қойылды. Біліктілікті арттыру курстары жүйелі түрде ұйымдастырылып, педагогтердің шығармашылық бастамалары мен ғылыми-әдістемелік ізденістеріне кең мүмкіндік берілуде. Мұның барлығы – білім беру сапасын арттыруға бағытталған игі қадамдар.
Қазақ халқы қашанда ұстазды ерекше қадірлеген. «Ұстазы жақсының – ұстамы жақсы» деген даналық сөздің астарында үлкен мән жатыр. Өйткені елдің ертеңі болатын ұрпақтың бойына адамгершілік, отансүйгіштік, еңбекқорлық, ұлттық құндылық, ұлттық рух секілді қасиеттерді қалыптастыратын – мұғалім. Сондықтан ұстаздың қоғамдағы орны әрдайым биік болуы тиіс.
Мен қазақ тілі мен әдебиеті пәнінің мұғалімі ретінде әрбір шәкірттің бойынан ұлттық рухты, ана тіліне деген құрметті, кітап оқуға деген қызығушылықты қалыптастыруды басты міндетім деп білемін. Әдебиет – адамның жан дүниесін тәрбиелейтін, рухани байлығын арттыратын ұлы күш. Ал, мемлекеттік тіл – тәуелсіздігіміздің тірегі. Осы құндылықтарды жас ұрпақтың бойына сіңіру – әрбір сөз өнері мұғалімінің қасиетті борышы.
Ұстаздық– жүрек қалауын қажет ететін мамандық. Бұл жолда сабыр, жауапкершілік, мейірім мен үздіксіз еңбек қатар жүреді. Нағыз педагог шәкіртінің әр жетістігін өз жеңісіндей қабылдайды. Білім мен тәрбиені қатар ұстанған ұстаз ғана ел болашағын тәрбиелей алады.
Президент Қасым-Жомарт Тоқаев өз Жолдауларында білім саласын дамыту мен педагог мәртебесін көтеру мәселесіне әрдайым ерекше назар аударып келеді. Бұл – мемлекетіміздің білімді ұлт қалыптастыру жолындағы айқын бағытының дәлелі. Өйткені сапалы білім – қуатты мемлекеттің негізгі кепілі.
Қорытындылай келе, педагог мәртебесін көтеру – тек ұстаздың ғана емес, бүкіл қоғамның ортақ міндеті. Ұстазын құрметтеген елдің болашағы жарқын, келешегі кемел болады. Ұрпақ тәрбиесіне адал қызмет етіп жүрген әрбір мұғалімнің еңбегі әрдайым лайықты бағаланып, мерейі үстем болсын. Себебі ұстаз мәртебесі – мемлекет мәртебесі, ал білімді ұрпақ – Тәуелсіз Қазақстанның ең қымбат байлығы.
Сабира Мусаева,
Ә.Бердаулетов атындағы №34 орта мектептің
қазақ тілі мен әдебиеті пәнінің мұғалімі.
Жалағаш ауданы, М.Шаменов ауылы
