Демалыстағы қызықты сәттер

Фоторепортаж

Балалардың демалысын тиімді ұйымдастыруды жолға қойған қалалық білім бөлімі жоспарға сай жұмысын жалғастырып келеді. Бүгінде жолдама берілген оқушылар «Арай-Санрайс» лагерінде тынығып, уақыттарын көңілді өткізуде. Әр ауысым сайын мұнда шабаданын жинап, көтеріңкі көңілмен 180 бала келеді. Аталған лагерьде баланың жақсы демалуы үшін жағдай жасалып, қауіпсіздік шаралары да қарастырылған. Біз «Арай-Санрайс» лагеріне барған кезде 3-ауысым бойынша демалуға келіп жатқан балалардың қуанышының үстінен түстік. Әуелі лагерьдің аға тәрбиешісімен сөйлестік.

– Лагерімізде 9-14 жасқа дейінгі балалар демалады. Демалыс уақыты 12 күнді құрайды. Осы уақыт аралығында балалардың шығармашылықпен айналысуына да ықпал етуге тырысамыз. Сондай-ақ, дұрыс тамақтануы да біздің назарда. Арнайы аспаздар күнделікті тағамдар әзірлеп, балалар 5 мезгіл тамақтанады. Сонымен қатар, дәрігер мен медбикелер де демалушылардың денсаулығына жауап береді. Әсіресе, балалар алаңда спортпен айналысқанда, медбикелер бізбен бірге болады,- деді «Арай-Санрайс» лагерінің аға тәрбиешісі, «Үміт желкені» қоғамдық қорының директоры Гүлжайна Имашева.

Демалушылар лезде жайлы орынға жайғасып, бір-бірімен танысып, лагерьдің аурасына сіңісіп кетті. Мұнда барлығы 20 үйірме бар. Яғни, өнерге жақын өрендер демалып ғана қоймай, өз қабілетін шыңдай алады. Лагерьде қызмет атқаратын 21 тәрбиеші әр баланың дарынын байқап, бағдар беруде үлесін қосады. Таңғы сағат 9:00-11:00-ге дейін балалар үйірме жұмыстарымен шұғылданып, ағылшын тілі бойынша қосымша сабаққа қатысады. Қысқасы, балаға бақыт сыйлау үшін білім бөлімі мен лагерь ұжымы барын салады.

Шынында да үйірмелердің үйретері көп. Бала қандай өнерді таңдаймын десе де ешқандай шектеу жоқ. Мәселен, қыздар қолөнермен айналысып, сырмақ, кілем тоқу, құрақ көрпеше тігуді үйренеді. Тіпті, қолданбалы өнерге де қолын жаттықтырып, бисермен көздің жауын аларлық өнімдер даярлайды. Мұнан өзге хореграфия, ән айту, аспаптарда ойнап өзін жан-жақты көрсетуіне мүмкіндік мол. Қағытпа қалжың мен сөз қадірін түсінетін жігіттер де жайдарман ойнап, сол салаға бейімделе алады. Сайып келгенде, спорттық секциялармен шұғылданатын жасөспірімдер жетерлік. Олар футбол, баскетбол, волейбол және асық атып, бәрі бірлесе ойнап, жеңіс жалауын көтеруге тырысады. Сонымен қатар, кешкі уақытта балаларға аранлған арнайы шаралар мен кештер ұйымдастырылады. Біз алғашқы қызықты сәттерімен тыныстық.

Тынығу лагері – әр ауданнан, қаладан жиылған балалардың басын қосатын орта. Достықтан бауыр болуға дейін апаратын бірліктің бастауы һәм жанашырлықтың жаршысы. Татулықпен табысқан жасөспірімдер лагерьде өткізген шуақты һәм шаттыққа толы күндері балалық жүректе таңбаланып, есті естелік боп сақталатындықтан қайта баруды аңсайтындар көп. 3 ауысым бойынша жиналған балалардың лагерьге келген күнінен бастап көздерінен қуаныш көрінді. Себебі, жазғы демалысының жарқын күнмен тағы бір толығатынына сенімді.

Айта кетейік, биыл «Арай-Санрайс» тынығу лагеріне 25 жыл толады. Лагерь ұжымы алдағы уақытта мерейтой кешін тойлауды жоспарлап отыр екен. Ал, біз осы жолы көзімізбен көрген балалардың қуанышымен бөлісіп отырмыз.

«Ұстаз-ақпарат»

Пікір үстеу

Э-пошта мекенжайыңыз жарияланбайды. Міндетті өрістер * таңбаланған